Քաղաքապետի գլխին սեւ ամպեր են կուտակվում․ «Հրապարակ»

«Հրապարակ»-ի տեղեկություններով՝ Հրազդանի քաղաքապետարանի իրավաբանական բաժնի նախկին պետ Ռադիկ Հարությունյանի դիմումի հիման վրա Հրազդանի քաղաքապետ Արամ Դանիելյանի դեմ հարուցվել է քրեական գործ՝ ՀՀ քրեական օրենսգրքի 308 հոդվածի 1 մասով, այն է՝ պաշտոնատար անձի կողմից իր պաշտոնեական դիրքը ծառայության շահերին հակառակ օգտագործելը կամ ծառայողական պարտականությունները չկատարելը՝ շահադիտական, անձնական այլ շահագրգռվածությունից կամ խմբային շահերից ելնելով, որն էական վնաս է պատճառել անձանց, կազմակերպությունների իրավունքներին ու օրինական շահերին, հասարակության կամ պետության օրինական շահերին (գույքային վնասի դեպքում՝ հանցագործության պահին սահմանված նվազագույն աշխատավարձի հինգհարյուրապատիկի չափը գերազանցող գումարը կամ դրա արժեքը), այն պատժվում է տուգանքով՝ նվազագույն աշխատավարձի երկուհարյուրապատիկից երեքհարյուրապատիկի չափով, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը հինգ տարի ժամկետով, կամ կալանքով՝ երկուսից երեք ամիս ժամկետով, կամ ազատազրկմամբ՝ առավելագույնը չորս տարի ժամկետով: Տեղեկությունը ճշտելու համար Hraparak.am-ը կապ է հաստատել Հրազդանի քաղաքապետարանի իրավաբանական բաժնի նախկին պետ Ռադիկ Հարությունյանի հետ. 

-Պարո´ն Հարությունյան, ճի՞շտ է, որ ձեր դիմումի հիման վրա քրեական գործ է հարուցվել: 

Այո, առգրավվել են որոշակի փաստաթղթեր, կատարվում է քննություն: Քննության գաղտնիությունից ելնելով՝ ես ոչինչ չեմ կարող ասել:

-Համոզվա՞ծ եք, որ օբյեկտիվ քննության կգնա:

Իհարկե համոզված եմ, եթե համոզված չլինեի, չէր դիմի, ամեն ինչ անելու եմ, որ գնա օբյեկտիվ քննություն:

Հիշեցնենք, որ դեռ ամիսներ առաջ ՀՀ ԱԱԾ-ն է սկսել հետաքրքրվել Հրազդանի քաղաքապետարանի ենթակայության հիմնարկներով, փորձել է համապատասխան ստուգումների միջոցով պարզել, թե որքանո՞վ է ճիշտ կատարված քաղաքապետարանի աշխատակիցների ընտրությունն ու արդյոք նրանց կրթական ցենզը համապատասխանո՞ւմ է այն պաշտոններին, որոնք զբաղեցնում են: