«Ես ու նա հիմա գործընկեր ենք». Վարուժան Մարգարյանը` անձնական կյանքի մասին

Դերասան Վարուժան Մարգարյանը, ով հայտնի դարձավ «Կայարան» հեռուստասերիալից, նոր ֆոտոշարք է անցել, որը տրամադրել է Tert.am Life-ին: Դերասանը պատմեց, որ առաջին անգամ ֆոտոշարքի շրջանակում է եղել ձիարշավարանում։ Ըստ նրա` ձիավարության առաջին փորձը հեշտ է անցել:

«Ինքս ինձ համար եմ նկարվել: Վաղուց ցանկություն ունեի ֆոտոշարք անել, բայց գործի բերումով չէի հասցնում: Ձիավարելը  հեշտ ստացվեց, քանի որ մասնագետն օգնում էր ինձ»,-ասաց նա:

Դերասանն այս տարի կավարտի Թատերական ինստիտուտը։ Այժմ նա պատրաստվում է ավարտական դիպլոմային ներկայացմանը: Վարուժանի կարծիքով` թատրոնում խաղալը պարտադիր պայման է յուրաքանչյուր դերասանի համար:

«Թատրոնը դերասանին միշտ պահում է ճիշտ «մարզավիճակում», թատրոնում եփվում ես որպես դերասան։ Այդ ամենը կարողանում ես տանել նաև կինո:

Ճիշտ է, տարբեր ոլորտներ են, բայց մեկը մյուսին շատ է օգնում,-ասաց նա ու ավելացրեց, որ մասնագիտական հմտությունները խորացնելու նպատակներ ունի։ –Ուզում եմ մյուս տարի մեկնել Լենինգրադ` մագիստրատուրան այնտեղ ուսանելու: Ցանկությունս մեծ է, թե կյանքն ինչպես  կդասավորվի, չգիտեմ, բայց դեռ դա է նպատակս։ Ուզում եմ ավելի պրոֆեսիոնալ մակարդակի հասնել»:

Վարուժանն նկատեց, որ մինչև այս տարի տեսախցիկի հետ աշխատանքը որպես առարկա ներառված չէր Թատերական ինստիտուտում, այդ բացը լրացնել իր դեպքում օգնել է սերիալում նկարահանվելը:  

Մեկ տարի 8 ամիս «Կայարան» հեռուստասերիալում նկարահանվելուց հետո, Վարուժանի համար հիմա փոքր-ինչ դադար առնելու հարմար ժամանակահատված է։ Նա նշեց, որ մասնագիտական առումով այս կամ այն գործնական առաջարկն ընդունելիս կոնկրետ սկզբունքներ չունի, որոնցով առաջնորդվում է. «Քանի որ ես դեռ ուսանող եմ, մտածում եմ՝ շատ բան պետք է փորձեմ այս ընթացքում: Սա այն տարիքն է, որ պետք է եփվես: Ինձ թվում է՝ ցանկացած դերասան պետք  է պատրաստ լինի ամեն բանի, եթե սիրում է իր մասնագիտությունը»:

Վարուժանն անկեղծացավ, որ ինքն իր խաղին շատ քննադատաբար է մոտենում։ Նրա խոսքով` տեսակով չափազանց ինքնաքննադատ է: «Ես իմ անձի նկատմամբ շատ պահանջկոտ եմ։ Ամեն ինչ անելիս ձգտում եմ լավն անել: Պետք է ամեն բան իդեալական լինի, ամեն դեպքում, ես  ձգտում եմ դրան՝ ոչ միայն մասնագիտական առումով, այլև անձնական կյանքում»,– նշեց նա:

Դերասանի անձնական կյանքը տևական ժամանակ շատերի քննարկման առարկան էր, քանի որ սերիալում սիրահար զույգի մարմնավորող Վարուժանն ու Քրիստինա Կույումչյանն իրական կյանքում էլ էին ընկերություն անում: Խոսելով իր և Քրիստինայի երբեմնի հարաբերությունների մասին՝ Վարուժանը նշեց, որ այսօր էլ իրեն  շատ են հարցնում անձնականի մասին:

«Դա ինձ մի փոքր նյարդայնացնում է, բայց փորձում եմ ժպիտով պատասխանել: Ես ու Քրիստինան հիմա գործընկերային հարաբերություններ ունենք, մենք նույն կուրսում ենք սովորում, չէր կարող այդպես չլինել»,-եզրափակեց նա:

Այս թեմայով Անելյա Գուբրյանը՝ անչափահաս լինելով` սիրային տեսարաններում նկարահանվելու մասին Լուսանկարներ նոր սիթքոմի նկարահանման հրապարակից «Գաբին բացառություն է». Լուիզա Ղամբարյանը՝ դստեր մասին Լուիզա Ղամբարյանի դուստրը․ լուսանկարներ Ռոզա Ֆիլբերգը՝ առօրյա հագուստով․ լուսանկար