Նառա Սարգսյանը՝ հղիության, բալիկի սեռի և անվան ընտրության մասին

Երեւանի Պատանի հանդիսատեսի թատրոնի դերասանուհի Նառա Սարգսյանը, ով «Արտավազդ 2016»-ում արժանացել է «Լավագույն երիտասարդ դերասանուհու» կոչմանը, այս շրջանում վայելում է հղիության  բերկրանքը: Նառան առաջինը Life.panorama.am-ին է պատմել գեղեցիկ կարգավիճակի եւ իր ու ամուսնու զգացողությունների մասին, երբ առաջին անգամ տեղեկացել են՝ ծնողներ են դառնալու:

«Գիտեք, 32 տարեկանում մայրանալը լրիվ ուրիշ զգացողություն է: Գուցե կոպիտ հնչի, բայց ես այս կարգավիճակին երկար էի սպասում: Հետեւաբար, երբ առաջին անգամ իմացա, զգացողություններս պարզապես աննկարագրելի էին: Ի դեպ՝ այդ օրը տանը մենակ էի, ոչ մեկ չկար, որ իր հետ ուրախությունս արտահայտեի, ուրախությունից բարձր գոռայի: Միաժամանակ, այդ շրջանում շատ կասկածամիտ էի դարձել, սկզբում անգամ չէի հավատում, եւ միայն համոզվելուց հետո զանգեցի ամուսնուս ու ասացի՝ «Գոռ, մենք ծնողներ ենք դառնալու, գալու է մեկն, ով ինձ ասելու է մամա, քեզ՝ պապա»: Ասեմ, որ ամուսինս ինձնից շատ էր սպասում այդ նորությանը, նա էլ հենց իմացել է, իր աշխատավայրում է իրարանցում առաջացրել: Մի խոսքով՝ երկուսիս զգացողություններն էլ բուռն էին, երբ առաջին անգամ իմացանք, որ Աստված մեզ ծնողներ է դարձնելու»,- պատմեց Նառան:

Հղիության 6-րդ ամսում գտնվող դերասանուհին բացահայտեց նաեւ բալիկի սեռը:

«Մենք որդի ենք ունենալու: Ասեմ, որ իմ ու Գոռի համար իսկապես ոչ մի տարբերություն չկար՝ մենք տղա, թե աղջիկ կունենանք: Մենք ուզում ենք, որ մեր բալիկը առողջ լինի, եւ կարծում եմ՝ յուրաքանչյուր ծնող պետք է միայն ու միայն դրա մասին մտածի, այլ ոչ թե սեռի»,- ընդգծեց նա:

Նառայի խոսքով՝ բալիկի անունը եւս արդեն որոշված է, այդ հարցում երջանիկ ծնողները հատուկ պատմություն ունեն.

«Երբ նոր էինք ամուսնացել եւ ես էլ դեռ հղի չէի, ես ու ամուսինս որոշել էինք, որ եթե աղջիկ ունենանք, անունը Արսինե կդնենք, իսկ տղա ունենալու դեպքում նրան Անրի անունը կտանք: Այնպես որ, երբ իմացանք, որ տղա է, անվան շուրջ անգամ չենք մտածել. նա Անրին է»,- նշեց դերասանուհին:

Հարցին, թե Նառա Սարգսյանը հղիության ընթացքում ի՞նչ նոր հատկանիշներ է իր մեջ բացահայտել, դերասանուհին խոստովանեց.

«Մինչեւ 31 տարեկան ես միայն ինձ համար եմ ապրել, շատ ինքնուրույն եմ եղել, ինչու ոչ, նաեւ մի քիչ էգոիստաբար եմ ապրել: Տարիքից ելնելով՝ ես շատ հասուն եմ արդեն, կայացած եմ թե որպես մարդ, թե որպես մասնագետ: Ու հանկարծ, այդ ամենից հետո ես հասկացա, որ այլեւս ես առաջինն ինձ համար չեմ մտածում: Այդ գիտակցությանը եկա, երբ առաջին անգամ ուլտրաձայնային հետազոտության ժամանակ լսեցի բալիկիս սրտի բաբախը: Այդ պահից ի վեր՝ ամեն ինչ փոխվեց ու ես էլ փոխվեցի: Մի պահ անգամ ապշեցի, երբ ինձ բռնացրի այն մտքին, որ իմ ողջ ուշքն ու միտքը միայն այն բանի շուրջ է պտտվում, որ երեխայիս մոտ ամեն ինչ լավ լինի, ե ւայդ ժամանակ էլ հասկացա՝ վերջ, իմ մեջ արդեն բնությունն է խոսում՝ մորը հատուկ բնությունը: Ինչ վերաբերվում է այլ հատկանիշներին, ես էմոցիոնալ մարդ եմ, եւ այս շրջանում դա ասես կրկնապատկված լինի իմ մեջ: Հիմա ավելի շատ եմ ուշադրության կարիք զգում, ամեն մի փոքր անտարբեր վերաբերմունք իմ նկատմամբ ինձ համար զգալի է: Նվնվան լինելով՝ գուցե անգամ ամուսնուս եմ շատ նեղություն պատճառում, բայց երեւի նա հասկանում է ինձ»:

Ի դեպ՝ Նառան սնոտիապաշտ չէ, բալիկի հետ կապված գնումներ սկսել է կատարել հղիության 3-րդ ամսից: Ամուսնու հետ արդեն կատարել է գրեթե բոլոր գնումներրը:

Նառա Սարգսյանը եւս մեկ ամիս կաշխատի թատրոնում եւ կգնա դեկրետային դադարի:

«Արդեն երկու ամիս է, ինչ բեմ չեմ բարձրանում, քանի որ հղիությունս տեսանելի է, եւ արդեն իսկ անասելի կարոտել եմ, բայց բալիկին ունենալուց հետո երկար դադար չեմ վերցնի, կարծում եմ՝ ամենաուշը 1,5 տարի անց ես կրկին կվերադառնամ թատրոն»,- ավարտեց դերասանուհին:

Այս թեմայով Նախագահը հանդես է եկել հայտարարությամբ Գիտնականները պարզել են՝ որ տարիքում ծննդաբերելն է ամենաճիշտը ՀՀ նախագահը կարգադրություններ է արել Նախագահը հանդիպել է Սերժ Սարգսյանի և Կարեն Կարապետյանի հետ «Չեմ կարող անտարբեր լինել». «Միսս Արմենիա» Լիլի Սարգսյան