Վենգերը հույսը կապում է Մխիթարյանի հե՞տ

1in.am | Եվրոպա լիգայի խաղարկության կիսաեզրափակչի պատասխան խաղում վաղը Լոնդոնի «Արսենալը» Մադրիդի «Մետրոպոլիտանո» մարզադաշտում կմրցի «Ատլետիկոյի» հետ: Հիշեցնենք, որ այս թիմերի միջև մեկ շաբաթ առաջ Լոնդոնում տեղի ունեցած հանդիպումն ավարտվել էր ոչ-ոքի՝ 1:1 հաշվով: Ունենալով թվային գերակշռություն՝ «Արսենալը» ձեռքից բաց էր թողել հաղթանակը, ինչը նշանակում է, որ դիմակայության ֆավորիտը իսպանական թիմն է:

Այսօր դժվար է պատկերացնել, թե ինչի հաշվին և ինչպես «Արսենալը» կարող է դրական արդյունքի հասնել առաջիկա մրցավեճում: «Ատլետիկոն» սովորաբար տակտիկապես գրագետ է գործում՝ հասնելով ցանկալի արդյունքի: Սպասվում է, որ վաղը ևս «Ատլետիկոն» կխաղա փակ ֆուտբոլ: Փաստ է, որ Վենգերը և նրա ֆուտբոլիստները հաջողության են հասնում այն դեպքում, երբ մրցակիցը տարածություններ է տալիս:

«Արսենալում» քիչ են ֆուտբոլիստները, որոնք կարող են գնդակ պահել և մանյովրել: Թերևս Մեսութ Օզիլն է, որը բարձր տեխնիկայի շնորհիվ կարողանում է կատարել դիսպետչերի պարտականությունը: Ոմանք շարունակում են մնալ այն կարծիքին, որ «Ատլետիկոն» Լոնդոնում դրական արդյունքի հասավ բախտի բերմամբ՝ «Արսենալի» ֆուտբոլիստների կոպիտ սխալի հետևանքով: Ընդունենք, սակայն, որ տակտիկապես Արսեն Վենգերը բացահայտ պարտություն կրեց, և իսպանական թիմն արժանի էր դրական արդյունքի: Այս մրցավեճում գնդակին տիրելու հարաբերակցությունը կազմել է 75-25՝ հօգուտ «Արսենալի»: Ունենալով տարածքային ահռելի առավելություն՝ «Արսենալին» չէր հաջողվում իրացնել գոլային պահերը:

Ամեն դեպքում «Ատլետիկոյի» հետ առաջին խաղում համոզվեցինք, որ «Արսենալում» խնդիրները շատ են՝ հատկապես պաշտպանությունում և հարձակման օղակում: «Առաջին խաղում պարզունակ սխալները սպանեցին մեզ: Կրկին ասում եմ, որ անհաջողության համար մեղավոր ենք մենք: 1:1 հաշվի ժամանակ պետք է մեծացնեինք ճնշումը, սակայն չարեցինք դա: Այնպիսի տպավորություն էր, կարծես ոչ-ոքի արդյունքը ձեռնտու էր մեզ: Նկատվում էր կոնցենտրացիայի պակաս: «Արսենալի» պես թիմը իրավունք չունի կարևորագույն խաղերում նման խաղ ցուցադրելու: Պետք է լուրջ հետևություններ անենք և վաղվա խաղում հաղթենք: «Ատլետիկոն» ցուցադրեց կամք և, խաղալով ընդգծված պաշտպանողական ֆուտբոլ, հասավ դրական արդյունքի: Մեր գործողությունները համոզիչ չէին հարձակման գծում: Ցավում եմ, որ խաղն այդպիսի ընթացք ունեցավ: «Ատլետիկոյի» արգելքը հաղթահարելու մի քանի տարբերակներ ունենք: Վերջնական որոշումը կկայացնեմ վերջին մարզումից հետո»,- ասել է Արսեն Վենգերը:

Դեռևս հայտնի չէ՝ առաջիկա հանդիպմանը կմասնակցի՞ Հենրիխ Մխիթարյանը, թե՞ ոչ: Հիշեցնենք, որ Անգլիայի Պրեմիեր լիգայի 36-րդ տուրի «Մանչեսթեր Յունայթեդի» հետ մրցավեճում հայ ֆուտբոլիստը կրկին հարված էր ստացել ծնկին և փոխարինվել: Խաղից հետո կայացած մամուլի ասուլիսի ժամանակ Վենգերը հայտարարել էր, որ «Ատլետիկոյի» հետ մրցավեճին Մխիթարյանի մասնակցելու վերաբերյալ հստակություն կլինի բուժզննումից հետո: Մխիթարյանի բուժզննման արդյունքները առայժմ չեն հրապարակվել: Ըստ որոշ փորձագետների՝ Մխիթարյանի վերաբերյալ լռությունը տակտիկական նկատառում ունի:

«Մանչեսթեր Յունայթեդի» հետ հանդիպումը ապացուցեց, որ Մխիթարյանը «Արսենալի» առանցքային ֆուտբոլիստներից է: Արսեն Վենգերը ըստ ամենայնի լուրջ հույսեր է կապում Մխիթարյանի հետ: Հայ ֆուտբոլիստի, ինչպես նաև հարձակվող Պյեր Էմերիկ Օբամեյանգի բացակայության պայմաններում բավական դժվար կլինի առջևի գծում սուր գործել: Հիշեցնենք, որ Օբամեյանգն իրավունք չունի «Արսենալի» կազմում ելույթ ունենալու Եվրոպա լիգայի խաղարկությունում: Սպասվում է, որ վաղը ևս որպես նոմինալ հարձակվող կխաղա Ալեքսանդր Լակազետը: «Մանչեսթեր Յունայթեդի» դեմ խաղում Արսեն Վենգերը հանգստանալու հնարավորություն էր տվել մի խումբ առաջատար ֆուտբոլիստների: Մասնավորապես հայտացուցակից բացակայում էին Օզիլը, Ռեմսին, Ուիլշերը, Կոսելնին, Մուստաֆին, Լակազետը:

Միջազգային բուքմեյքերական ընկերությունները վաղվա խաղում բացահայտ ֆավորիտ են համարում «Ատլետիկոյին»: Վերջինիս հաղթանակի համար սահմանված է 1.7 գործակից։ Ոչ-ոքին գնահատված է 3.75, իսկ «Արսենալի» հաղթանակը՝ 5 գործակցով: Չնայած վաղվա խաղում Մխիթարյանի մասնակցությունը հարցականի տակ է, այնուամենայնիվ բուքմեյքերական ընկերությունները խաղադրույք են ընդունում հայ ֆուտբոլիստի գոլի հեղինակ դառնալու համար: Հայաստանի ազգային հավաքականի ավագի հաջողության հասնելու համար սահմանված է 4.4 գործակից:

«Ատլետիկո»-«Արսենալ» հանդիպումը կսկսվի Երևանի ժամանակով 23:05-ին: