Ի՞նչ անցյալ ունի 22-ամյա տղային դանակահարած Վահան Ղազարյանը

Հասարակություն 21 Հոկտեմբեր, 2016 19:24

«Հրապարակ»-ը գրում է․

2005 թվականին Գյումրիում ստեղծվել է «Վան» հեռուստաստուդիան, որը հիմնականում զբաղվել է ֆիլմերի, սոցիալական գովազդների արտադրությամբ: Ինչպես տեղեկացանք «Վան»-ի նախկին աշխատակիցներից մեկից, հեռուստաստուդիան վերջին տարիներին գրեթե չի գործում, համարվում է կազմալուծված, քանի որ տնօրենը` Վահան Ղազարյանը կանգնել էր ֆինանսական խնդիրների առջև, ստուդիան իր գործունեությամբ այլևս եկամտաբեր չէր: Թերևս սա է պատճառ դարձել, որ 40-ամյա Վահան Ղազարյանը տեղափոխվել էր Երևան` բնակվելու եւ նոր գործունեություն ծավալելու: Ինչպես արդեն երեկվանից բոլորին հայտնի է, նա Երևանում «Պատանի լրագրողների» դպրոցի տնօրենն է եւ 22-ամյա սևանցի Լևոն Սահակյանին դանակահարողը: Հիշեցնենք, որ դպրոցի տնօրենի եւ երիտասարդի վեճի պատճառ է հանդիսացել վերջինիս նշանածի ամիսների չվճարված աշխատավարձը: hraparak.am-ի տեղեկություններով` Վահան Ղազարյանն անձամբ է կանչել Լևոն Սահակյանին` նշանածի աշխատավարձը վճարելու համար, որի ընթացքում էլ դանակահարել է նրան:

Հարազատ քաղաքում` Գյումրիում, իրենց համաքաղաքացու արարքը գյումրեցիները դատապարտում են, մանավանդ ճանաչողները ագրեսիվ վարքագծով նրան բնորոշեցին: «Վան» հեռուստաստուդիայի նախկին աշխատակիցն էլ, որ խնդրեց անունը չհրապարակել, ասաց, թե խնդիրներ ինքն անձամբ ունեցել է տնօրենի հետ, աշխատանքից դուրս է եկել կամովի` հետագա կոնֆլիկտներից խուսափելու համար: Մեր ճշգրտող հարցին, թե տարաձայնությունները գումարային էին, նա պատասխանեց. «Եղել են եւ գումարի հետ կապված եւ այլ հարցերի»: Ասեկոսեների համաձայն` Վահան Ղազարյանը գրպանում ծալովի դանակ էր պահում: Այս իրողությունը նրա ծանոթներից ոչ ոք թեև չհաստատեց, բայց ասացին, որ լայն շրջապատ ուներ, ռազբորկաներով հարցեր լուծում էր:

Նրա հետ համագործակցած դերասանուհիներից մեկն էլ նկատեց. «Գյումրիում նրան հայտնիությունը պակասեց, դրա համար հասավ Երևան»: Սակայն պետք է նկատենք, որ ամեն դեպքում գտնվեցին մարդիկ, ովքեր Գյումրիում նրա դերակատարությունը արժևորեցին ժամանակին կատարած իր աշխատանքներով: Քաղաքացիներից մեկը հիշեցրեց, թե գրեթե ամեն տարի 1988-ի աղետալի երկրաշարժի տարելիցին 2008թ-ից այս կողմ «Հոկտեմբեր» կինոթատրոնում ցուցադրվում է «Ձեռքեր» խորագրով փաստավավերագրական ֆիլմը, որը «Վան» հեռուստաընկերության արտադրանքն է: