Lragir.am-ը անհարկի շահարկում է Գագիկ Ծառուկյանի անունը

Հայկուհի Թոքմաջյանը ֆեյսբուքյան իր էջում գրում է.

Այսօր Lragir.am կայքը անդրադարձել է գազի գնագոյացման խնդրին, որում անհարկի շահարկել է նաև Գագիկ Ծառուկյանի անունը։ Ընդհանրապես անհարկի շահարկումները միշտ արվում են որոշակի նպատակներով, և այս անգամ նպատակը, որքան էլ քողարկված լինի, բայց ամեն դեպքում դուրս է ցցվում։ 

Բանը նրանում է, որ համաժողովրդական շարժման հաղթանակից հետո ժողովրդի թեկնածուին սատարած «Ծառուկյան» դաշինքը և նրա ղեկավար Գագիկ Ծառուկյանը հայտնվել են նախկին իշխանությունների հատուկ ուշադրության ներքո, ինչը արտահայտվում է նախկին իշխանամերձ լրատվամիջոցների միջոցով Ծառուկյանի անունը անհարկի շահարկելով։

Ընդ որում դա արվում է այնպիսի գործընթացների կամ իրադարձությունների դեպքում, որոնց հետ Ծառուկյանը ընդհանրապես կապ չունի։ Այսպես, այսօր Lragir.am-ը որոշել է Ծառուկյանի անունը շրջանառել այնպիսի մի ոլորտի մասին խոսելիս, որի հետ Ծառուկյանը, անգամ մանրակրկիտ ուսումնասիրության դեպքում, որևէ կապ չունի։ Խոսքը գնում է Հայաստանում գազի գնագոյացման մասին, այն մասին, որ Հայաստանը սահմանին գազը ստանում է 1000 խմ-ի համար 150 դոլարով և այն բնակչության վրա վաճառում 280-290 դոլարով։ 

Խնդիրը ամբողջությամբ գտնվում է «Գազպռոմի» և Հանրային ծառայությունները կարգավորող հանձնաժողովի տիրույթում։ Բայց հոդվածի հեղինակը, հասկանալի պատճառներով, որոշել է անպայման Ծառուկյանի անունը ինչ-որ կերպ «խցկել» հոդվածի մեջ, այդպես էլ չհիմնավորելով, թե ինչ կապ ունի այդ ամենի հետ Ծառուկյանը։ 
Իսկ չհիմնավորված «խցկումները» միշտ մատնում են, որ դրանք արվում են որոշակի պատվերի շրջանակում, ինչի պատճառը, ինչպես արդեն նշվեց, վերջին քաղաքական իրադարձություններն են։ Նախկին իշխանությունները այսօր սարսափած են, և կարելի է ասել, նաև վառված «Ծառուկյան» դաշինքի բարձր վարկանիշից, ինչպես նաև այն պատկերացումից, որ առաջիկա հնարավոր արտահերթ ընտրությունների արդյունքում հնարավոր է վերջնականապես անհայտանան Հայաստանաի քաղաքական երկնակամարից։ 

Դա է նրանց ստիպում դեռևս որոշակի վճարի դիմաց իրենց կողքին գտնվող լրատվամիջոցներով ամեն օր գրոհել «Ծառուկյան» դաշինքի և նրա ղեկավար Գագիկ Ծառուկյանի վրա։ Սակայն հանրությունը արդեն նկատել է նման լրատվամիջոցներին և այլևս լուրջ չի ընդունում նրանց, քանի որ անհնար է լուրջ ընդունել մի լրատվամիջոցի, որը սպասարկել է նախկին իշխանությունների շահերը։