Ինչի՞ մասին են խոսել Փաշինյանն ու Պուտինը

«Նեմցովա: Ինտերվյու»-ի հյուրն է Հայաստանի նոր վարչապետ Նիկոլ Փաշինյանը

— Մայիսի 9-ին դուք այցելեցիք Լեռնային Ղարաբաղ: Արդյոք Վլադիմիր Պուտինի հետ բարձրացրեցի՞ք ղարաբաղյան հակամարտության կարգավորման թեման:

Իհարկե, նաեւ այդ մասին խոսեցինք: կարեւոր է ընդգծել, որ հարցի լուծման խաղաղ ճանապարհը միակ ուղին է, որն իրատեսորեն կարող է լուծման բերել: Ոչ մի ուժային լուծում չկա: Կարծում եմ, որ սա սկզբունքային դիրքորոշում է՝ ոչ միայն Հայաստանի, այլ նաեւ ՌԴ-ի:

— Իսկ դուք անդրադարձե՞լ եք Ռուսաստանի կողմից Ադրբեջանին զենքի մատակարարումների թեմային:

Իհարկե՝ այո: Մենք այս առումով կառուցողական քննարկում ենք ունեցել: Ես չեմ կարող ասել, թե այդ մասին Պուտինն ինչ է ասել:

— Ինչպիսի՞ն կլինեն Հայաստանի տնտեսության զարգացման ձեր առաջնահերթությունները:

Ես կարող եմ խոսել երեք առաջնահերթության մասին: Առաջին՝ Հայաստանում տեղեկատվական եւ բարձր տեխնոլոգիաների զարգացում: Մեզ մոտ տնտեսության այս ոլորտը դինամիկ է զարգանում: Մենք ծրագրում ենք ուժեղացնել նաեւ Հայաստանի ռազմաարդյունաբերական համալիրը, քանի որ այս ոլորտը կարող է երկրի ամբողջ տնտեսության լոկոմոտիվը դառնալ: Երկրորդ փուլը տուրիզմի զարգացումն է: Եվ երրորդ՝ գյուղատնտեսությունը:

— Հայաստանի տնտեսության վրա ազդո՞ւմ է խոշոր կապիտալը կամ օլիգարխները։ Որոշ հայ օլիգարխներ գտնվում են խորհրդարանում, նրանցից մի քանիսը, որքանով ես գիտեմ, ձեզ աջակցում էին։ Մտադի՞ր եք արդյոք պայքարել օլիգարխների դեմ:

Մենք մտադիր ենք երաշխավորել ժողովրդի իշխանությունը, այլ ոչ թե մի խումբ մարդկանց, ու ոչ ոք չպետք է դրան խանգարի, բայց որեւէ մեկի դեմ մենք չենք պայքարելու։ Եթե մենք կարողանանք ստեղծել նման իրականություն, հարցը ինքնին կլուծվի։ Բացի դրանից, մեր հեղափոխության ընթացքում օլիգարխները չեն կարողացել ազդել երկրում քաղաքական իրավիճակի վրա։ Քանի որ ժողովուրդը իր ձեռքն է վերցրել իշխանությունը ու մտադիր չէ բաց թողնել այն:

— Մայիսի 17-ին Դուք ցուցարարներին կոչ արեցիք հրաժարվել քաղաքացիական անհնազանդության ակցիաներից։ Որքանով ես գիտեմ՝ նրանց պահանջը քաղաքապետ Տարոն Մարգարյանի հրաժարականն էր, որը, ինչպես ասում են, եղել է Ձեր նախորդի՝ Սերժ Սարգսյանի մտերիմ համախոհը։ Ինչո՞ւ եք համարում, որ այլեւս պետք չէ բողոքի ակցիաներ անցկացնել:

Ես ասել եմ, որ քաղաքացիական անհնազանդության ակցիաներն իմաստ ունեն այն ժամանակ, երբ երկրում չկա այնպիսի իշխանություն, որը գործում է ժողովրդի շահերին համապատասխան։ Իսկ հիմա Հայաստանում կա իշխանություն, որն ունի Հայաստանի բնակչության աջակցությունը։ Դա նշանակում է, որ եթե ինչ-որ մեկը փակում է փողոցները, դա կարող է մեկնաբանվել որպես իշխանության դեմ ակցիա։ Բայց եթե իշխանությունը ունի երկրի քաղաքացիների աջակցությունը, ակցիան կարելի է մեկնաբանել որպես ակցիա ժողովրդի դեմ, իսկ նման բան կազմակերպել չի կարելի։

— Շուտով երկրում խորհրդարանական ընտրություններ կանցկացվեն։ Խորհրդարանական մեծամասնությունը հիմա Հայաստանի Հանրապետական կուսակցությանն է պատկանում, որը ընդդիմադիր է ձեզ։ Ձեզ համար որքանո՞վ է կարեւոր, թե ով կհաղթի։

Ես իշխանության եմ եկել այնպիսի իրավիճակում, երբ հանրապետականներն ունեին մեծամասնություն, բայց նրանք չկարողացան ոչինչ անել։

Ու մեզ համար դա շատ կարեւոր է ՝ կազմակերպել, ունենալ այնպիսի ընտրություններ, որպեսզի չնայած արդյունքներին, քաղաքացիներն ունենան զգացողություն, որ իրե՛նք են հաղթել այդ ընտրություններում։ Ու իրե՛նք են որոշել, թե ով պետք է լինի իշխանություն։ Մենք վստահ ենք, որ մեր խնդիրները սկսվել են այն պահից, երբ Հայաստանում սկսել են կեղծել ընտրությունների արդյունքները։