Ազգուտակով պաշտոնյա․ Խոսրով Հարությունյան, Արտաշես Գեղամյան

«Հրապարակ»-ի «Ազգուտակով՝ պաշտոնյա» շարքի հերոսը այս անգամ ՀՀԿ ցուցակով խորհրդարան մտած մի քանի պատգամավորներն են: Այսպես, Հայաստանի Քրիստոնեա-դեմոկրատական միության ղեկավար, ՀՀԿ-ական պատգամավոր, նախկին վարչապետ Խոսրով Հարությունյանը տարիների ընթացքում կարողացել է լավ լեզու գտնել իշխանությունների հետ՝ կորզելով պաշտոն ոչ միայն իր, որդու, այլեւ փեսայի համար: Նախկին վարչապետը սիրում է հատկապես արտաքին գերատեսչությունը, այդ պատճառով էլ թե որդուն՝ Ռոբերտ Հարությունյանին եւ թե փեսուն՝ Եվրոպայի խորհրդում Հայաստանի նախկին մշտական ներկայացուցիչ Արմեն Պապիկյանին նշանակել է Արտաքին գործերի փոխնախարար: Արտաքին գործերի նախարարության աշխատակիցներն անգամ կատակում են, թե կարելի է իրենց գերատեսչության անունը փոխել և դնել «Խոսրովի անտառ»: ԱԳՆ աշխատակիցները փառք են տալիս Աստծուն, որ Խոսրով Մելիքիչն ընդամենը մեկ որդի և մի փեսա ունի, այլապես ԱԳՆ հին աշխատողներին լուրջ վտանգ էր սպառնալու: 

Ռոբերտ Հարությունյանը նախկինում եղել է Զարգացման հայկական գործակալության գլխավոր տնօրեն, Եվրասիական տնտեսական հանձնաժողովի անդամ (նախարար) եւ ստացել է 12 հազար դոլար աշխատավարձ: Արմեն Պապիկյանն էլ աշխատել է Եվրոպայի խորհրդի Ծրագրերի, բյուջեի և աշխատակազմի հարցերով զեկուցողների խմբի (կոմիտեի) նախագահ, Եվրոպայի խորհրդի Նախարարների պատվիրակների նախագահ, Եվրոպայի խորհրդում ՀՀ մշտական ներկայացուցիչ, ԵԱՀԿ-ում ՀՀ մշտական ներկայացուցչության խորհրդական, ՀՀ մշտական ներկայացուցչի տեղակալ, ԱԳՆ Սպառազինությունների վերահսկման և միջազգային անվտանգության վարչություն սովորական սպառազինությունների վերահսկման բաժնի վարիչ:

2011 թվականից լինելով ԵԽ-ում Հայաստանի ներկայացուցիչ՝ Արմեն Պապիկյանը ստացել է 4 հազար 50 եվրո աշխատավարձ: Ի դեպ, Պապիկյանի կնոջ` Էլեն Խոսրովի Հարությունյանի աշխատավայրի մասին ոչինչ հայտնի չէ, բայց դատելով նրա «օլիգարխիկ» հայտարարագրից՝ դժվար գործազուրկ լինի: Խոսրով Հարությունյանի դուստրը՝ Էլեն Հարությունյանը հայտարարագրել է 45 հազար 233 եվրո եւ 8 միլիոն դրամ փոխառություն։ Վերջինիս եկամուտները գոյացել են 15 հազար 600 եվրո աշխատավարձից, երկու հազար 233 եվրո եւ մեկ միլիոն 202 հազար 721 դրամ փոխառությունների դիմաց ստացված տոկոսից։ Մամուլը ժամանակին գրել էր, որ հնարավոր է՝ Ստրասբուրգում ապրելու տարիներին նա աշխատանքի է անցել ԵԽ-ում Հայաստանի ներկայացուցչությունում: 

Խոսրով Հարությունյանի եղբայրն էլ՝ Սամվել Հարությունյանը հիվանդանոց ունի՝ երրորդ կլինիկական հիվանդանոցը, որը կոչվում է «Արամյանց» բժշկական կենտրոն: Մենք ժամանակին գրել էինք, որ այստեղ պարբերաբար աշխատավարձերը ուշացնում են, այս հիվանդանոցը սնվում է նաեւ պետբյուջեից:

«Ազգային միաբանություն» կուսակցության ղեկավար, ՀՀԿ-ական պատգամավոր Արտաշես Գեղամյանը երկու որդի ունի. Մամիկոն Գեղամյանը դատախազ է, իսկ Արմեն Գեղամյանը՝ ՀՀ նախագահի Վերահսկողական ծառայության 2-րդ կարգի մասնագետ: Արտաշես Գեղամյանի որդիներից մեկը եռյակ թոռնիկների հայր է, պատգամավորի հարսիկը «Երկիր մեդիայի» երբեմնի հաղորդավարուհի Հռիփսիմե Վարդանյանն է, ով վարում էր «Միաշաբթի» հաղորդումը, նա միանգամից երեք թոռնիկ է պարգեւել Մամիկոնիչին: 

Ի դեպ, 1993թ մամուլը գրեց, որ Արտաշես Գեղամյանի կինը «Զվարթնոց» օդանավակայանում բռնվել է, քանի որ ներքնաշորի մեջ մաքսանենգ ճանապարհով փորձել էր ոսկեղենն արտասահման տանել եւ բռնվել էր։ Այս հրապարակման պատճառով Գեղամյանի ներկայացուցիչները դիմեցին դատախազություն, քրեական գործ հարուցվեց եւ Նիկոլ Փաշինյանը զրպարտության մեղադրանքով դատապարտվեց մեկ տարվա ազատազրկման, սակայն պատիժը պայմանականորեն չկիրառվեց: