Մովսեսն ու Ֆիլբերգն անակնկալ են պատրաստել

Դերասան Մովսես Երեմյանն ու երգչուհի Ռոզա Ֆիլբերգը շուտով հեռուստադիտողներին կներկայանան զուգերգով։ «Նռան  հատիկ» կոչվող երգի երաժշտության հեղինակը Արման Պարսամյանն է, խոսքերը գրել է Դիանա Գրիգորյանը։ Վերջինս Tert.am Life–ին պատմել է նոր աշխատանքի մանրամասներն ու տրամադրել լուսանկարներ ձայնագրման ընթացքից։

Եթե Ռոզայի դեպքում երգի կատարումը կանխատեսելի որոշում էր, Մովսեսի երգելը անսպասելի նորություն է։ Դիանան ասաց, որ զուգերգի մտահղացումն իրենն էր։

«Ես ուզում էի, որ հերոսներս, անպայման, երգեն։ Երբ տեղեկացա, որ Մոսոն ունի նաև երաժշտական կրթություն, ինձ համար այդ որոշումը դարձավ միանշանակ։ Իհարկե, Ռոզան կարող էր մենակ երգել կամ այլ երգչի հետ զուգերգ կատարել, սակայն այս դեպքում մենք պետք է գնահատենք ոչ թե Մովսեսի ձայնային տվյալները, այլ իր անկեղծ ու անմիջական մատուցումը։ Սա մրցութային երգ չէ, ֆիլմի սյուժեն տեղափոխված է երգ, որը երեք բաժնից է կազմված.  հերոսուհին հուսալքված է, հերոսը նրան նոր կյանք առաջարկում, արդեն երրորդ հատվածում իրենց համատեղ կյանքն ու հաղթանակն է»։

Դիանայի խոսքով` Մովսեսն ու Ռոզան սիրով են ընդունել իր առաջարկը։ «Անշուշտ, Մովսեսն ուներ մտավախություններ, սակայն  բոլորս քաջալերեցինք իրեն։ Երբ Մհերը լսեց իր ձայնն ու կատարումը, ասաց, որ իր պրոֆեսիոնալ  կարծիքը հայտնեց, որ կարող ենք զուգերգ անել։ Մովսեսն ամեն օր պարապում է, որպեսզի լավագույն արդյունքն ունենանք,– պատմեց Դիանան ու հավելեց,– նկարահանման հրապարակում Մոսոն է օգնում Ռոզային, այս դեպքում` Ռոզան` Մոսոյին։ Երկու պարագայում էլ կարևոր է, երբ մարդիկ օգնում և աջակցում են իրար։ Թիմային աշխատանքը միշտ էլ բերում է լավ արդյունքի»։

Երգը գրվել է հեռուստանովելի սաունդրթեքի հիման վրա։ «Քանի որ սաունդթրեքը շատ էր սիրվել, բոլորն էլ ցանկություն ունեին, որ այն երգ դառնա։ Մի հատված կա, որը շատ հայկական ու ներդաշնակ է հնչում` «Նռան հատիկին» հարիր։ Այդ հատվածը շատ էր տպավորվել հեռուստադիտողների մեջ։ Շատ արձագանքներ էինք ստանում, մարդիկ գրում էին, որ ուզում են այն տեսնել  երգի տեսքով։ Արմանին խնդրեցի, որպեսզի մենք ամբողջական երգ ունենանք։ Իր համար էլ էր դժվար դրանից  երգ ստանալը, որովհետև նա հիմնականում ֆիլմերի համար  է երաժշտություն գրում։ Մեր բոլոր սերիալների սաունդթրեքերն ինքն է գրել։ Փաստացի, ստացանք ցանկալի արդյունքը։ Շատ մեղեդային ստեղծագործություն է ստացվել»,– ասաց պրոդյուսերը։

Երգի պրեմիերան կկայանա մինչև հունիսի կես, ինչից հետո կսկսեն տեսահոլովակի նկարահանումները։