Վարչապետի հրահանգը տեղ է հասնում․ տնօրենի դստեր հարցերը լուծված են

Հոկտեմբերի 13-ին ՀՀ վարչապետ Կարեն Կարապետյանը կառավարության նիստում մի շարք հանձնարարականներ տվեց։ Դրանցից մի քանիսը վերաբերում էին կրթական ոլորտին։ Հենց այդ օրը նա հայտարարեց, որ կրթական գործընթացում նախ պետք է բացառվեն ազգակցական կապերի, հովանավորչության եւ շահերի բախման երեւույթները։

«Օրինակ` մայր ու աղջիկ նույն դպրոցում են աշխատում։ Ես չեմ բացառում, որ կարող են լինել նման դեպքեր, բայց պետք է տարբերակել օբյեկտիվն ու սուբյեկտիվը», հայտարարեց վարչապետը։

«ՉԻ» թերթի տեղեկություններով` մայրաքաղաքի դպրոցների մասով այս խնդրի լուծման քննարկումները սկսվել են դեռեւս գարնանը, իսկ արդեն ամռան ամիսներին բավականին հետաքրքիր որոշում է ընդունվել։ Մասնավորապես Երեւանի քաղաքապետարանի կրթության վարչությունը այսուհետ կբացառի դպրոցների տնօրենների մրցույթների ժամանակ գործող տնօրենի դստեր, առհասարակ նրա հետ ազգակցական կապեր ունեցող թեկնածուների առաջադրումը։ Որոշումը, սակայն, հետադարձ ուժ չունի։ Այն դպրոցներում, որտեղ տնօրենի պաշտոնը մորից «անցել» է աղջկան, վերջիններս կշարունակեն պաշտոնավարել մինչեւ սահմանված ժամկետը։ Նկատենք, որ դպրոցի տնօրեններն ընտրվում են 5 տարի ժամկետով։

Ինչ վերաբերում է նոր մրցույթներին, ապա այսուհետ տնօրենների ընտրության կարգի այս սկզբունքը վերահսկվելու է Երեւանի քաղաքապետարանի համապատասխան վարչության կողմից։ Ի դեպ՝ ընդունված այն մոտեցումը, թե ծնողների մասնագիտությունը դեր է խաղում երեխաների մասնագիտության ընտրության հարցում, ասել է թե՝ բժիշկների ընտանիքում բժիշկներ են առաջանում, երաժիշտներինը՝ երաժիշտներ, դասախոսներինը՝ դասախոսներ, ուսուցիչներինն էլ՝ ուսուցիչներ, բնական է։ Բայց այս դեպքում խոսքը ոչ թե մասնագիտության, այլ պաշտոնի մասին է։ Դպրոցի տնօրենն անպայման ձգտում է, որ իր երիտասարդ զավակն էլ իրենից հետո ստանձնի նույն դպրոցի տնօրենի պաշտոնը` անկախ այն բանից, թե ինչ արժանիքներ ունի իր զավակը։ Հիմա նոր ընդունված որոշմամբ՝ իքս տնօրենի մանկավարժ դուստրն, օրինակ, կարող է տնօրենի հավակնություններ ունենալ, բայց ոչ թե մոր տնօրինության տակ աշխատող դպրոցի, այլ ուրիշ կրթօջախների շրջանակներում։