ՀԱՆՐԱՀԱՅՏ ՄՈԼՈՐՈՒԹՅՈՒՆՆԵՐ. ինչքան շատ ես վճարում, այնքան վտանգավոր տեղ ես նստում

Ավիավթարներ. ինչքան շատ ես վճարում այնքան վտանգավոր տեղ ես նստում

Մենք գիտենք, որ...
Ավիավթարների ժամանակ ինքնաթիռում գտնվողների կենդանի մնալու հավանականությունը խիստ աննշան է։ Իրականում այդպես չէ։
Այստեղ խոսքն անգամ այն մասին չէ, որ որպես տրանսպորտային միջոց՝ ամենաանվտանգը ինքնաթիռն է (վթարների, նաև մահացու ելքերով վթարների թվով առաջին տեղում ավտոմեքենաներն են)։ Խոսքը վերաբերում է ավիավթարներին և այդ վթարի ընթացքում կենդանի մնալու հավանականությանը։ Օրինակի համար ասենք, որ 1983-2000 թթ. ընթացքում ԱՄՆ-ում արձանագրվել է 568 ավիավթար, որի ընթացքում 53487 անձ գտնվել է վթարված ինքնաթիռում, և նրանցից կենդանի է մնացել 51207-ը կամ 96 տոկոսը։ Նշենք նաև, որ ԱՄՆ-ը ավիավթարների թվով աշխարհում գտնվում է առաջին տեղում։ Ամբողջ հարցն այն է, որ սովորաբար վթարներ լինում են ցածր բարձրությունների վրա՝ թռիչքի սկզբում կամ վայրէջքի ժամանակ (նաև հարկադրական վայրէջքի)։ Ներկայումս հարկադրական վայրէջքներ են կատարվում նաև ջրի վրա և հաճախ բավականին հաջողված։ Մատների վրա հաշվված վթարների դեպքեր են լինում, որ ինքնաթիռը ամբողջությամբ կործանվում է (սովորաբար հենց այդ դեպքերն են մնում մեր հիշողության մեջ, և մեզ թվում է, որ անհնար է կենդանի մնալ վթարի ժամանակ): Համարվում է, որ մահվան դեպքերի որոշակի մասի պատճառը լինում է ուղևորների խուճապը (կամ ժամանակից շուտ են արձակում անվտանգության գոտիները, կամ էլ չեն կարողանում արձակել), վտանգ է ներկայացնում հրդեհը (տոքսիկ գազերից խեղդվում են)։
Հաշվարկված է, որ ինքնաթիռում ամենաանվտանգ տեղերն են պոչային հատվածի տեղերը՝ 69 տոկոս կենդանի մնալու հավանականությամբ, թևերի հատվածի տեղերը՝ 56 տոկոս, իսկ ահա առաջնամասում գտնվողները՝ 49 տոկոս։ Ստացվում է լրիվ ճիշտ, բայց հակառակը, ինչքան շատ ես վճարում, այնքան վտանգավոր տեղ ես նստում։
Ակամայից հիշեցի ՍՍՀՄ-ի ժամանակների մի գովազդ. « Քաղաքացիներ, թռեք Աէրոֆլոտի ինքնաթիռներով» ։ Սա գովազդների արքան է, քանի որ այն ժամանակ Աէրոֆլոտից բացի այլ ավիափոխադրող այդ երկրում չկար։

Կամո Խաչիկյան