«Դա իմ ցավոտ թեման է». «Վիտամինի» Զառան անկեղծանում է

 Դերասանուհի Զառա Սահակյանին արդեն տեւական ժամանակ է, ինչ էկրաններին չենք տեսնում, իսկ դադարի պատճառների եւ այլ թեմաների շուրջ Life.panorama.am-ը անկեղծ զրույց է ունեցել նրա հետ:

Հարցին, թե Զառային ինչու այժմ չեսնք տեսնում հեռուստանախագծերում եւ ե՞րբ կարող ենք սպասել, պատասխանեց.

«Ես դուրս եմ եկել այն տարիքից, որ ամեն պրոյեկտում երեւամ, եւ առհասարակ, շատ էկրաններին երեւալն էլ ճիշտ չէ, հոգնեցնում է. ժամանակ առ ժամանակ պետք է հանգիստ վերցնել ու հասկանալ, թե ինչ ես ուզում: Ինչ վերաբերում է առաջիկա ծրագրերին, այս պահին ընտրության առաջ եմ կանգնած: Մի քանի նախագծերից հրավերներ ունեմ, որոնցից պետք է ընտրեմ այնպիսինը, որը հարմար կլինի նաեւ գրաֆիկի իմաստով, քանի որ տղաս արդեն դպրոցական է ու համապատասխան ուշադրություն է պահանջում: Այս պահին «Վիտամին ակումբը» նոր նախագիծ է պատրաստում, որտեղ հավանաբար ես էլ կնկարահանվեմ»:

Զառային մարդիկ ծանոթ են բացառապես հումորային նախագծերից, քանի որ առաջարկները հենց նման պրոյեկտների կողմից են եղել, սակայն իրականում դերասանուհին պատրաստ է տարբեր ժանրերում ներկայանալ, քանի որ ունի համապատասխան կրթություն:

«Դա իմ ցավոտ թեման է: Այնպես է ստացվել, որ առաջարկները միայն հումորային նախագծերի շուրջ են եղել եւ ես միայն դրանց շրջանակում եմ հանդես եկել: Իհարկե, սիրով եմ անում այդ ամենը, բայց ինձ հետաքրքիր կլինի արդեն նաեւ այլ ժանրերում ներկայանալ, քանի որ ես պրոֆեսիոնալ դերասանուհի եմ: Իսկապես շատ կցանկանամ մի լուրջ ֆիլմում նկարահանվել, որից հետո տարիներ անց չեմ ամաչի եւ ուրախ կլինեմ, որ ժամանակին նման ֆիլմում եմ նկարահանվել»,- նշեց Զառան, իսկ հարցին, թե ըստ նրա՝ հեռուստադիտողն ինչպե՞ս կընդունի նրան դրամատիկ ժանրում, պատասխանեց.

«Միանշանակ որեւէ բան ասելը դժվար է, քանի որ դա ընդամենը կանխատեսում կլինի: Եթե հանդիսատեսը առողջ է, ապա նրան տվյալ նախագծի եւ ներգրավված դերասանների որակն  է միայն հետաքրքրելու, այլ ոչ թե այն, թե այդ դերը խաղում է Զառան, թե մեկ ուրիշը: Այսինքն՝ մարդիկ պետք է գնահատեն որակը, դերասաններին իր կերտած կերպարների հետ չնույնացնեն: Ամեն դեպքում, նկատում եմ, որ հասարակութունը սկսել է  առողջ մոտեցում ցուցաբերել ամեն ինչի նկատմամբ: Այդ ամենը ժամանակի խնդիր է, ի վերջո՝ մենք շատ կոտրված արժեհամակարգեր ունեինք, որ գնալով վերականգնվում են»:

Հետաքրքրվելով, թե Զառա Սահակյանը երբեւէ չի՞ մտածել թատրոն մուտք գործելու մասին, նշեց.

«Իհարկե, մտածել եմ, բայց ես միշտ ասել եւ կշարունակեմ կրկնել, որ նախընտրում եմ զբաղվել մեկ գործով, բայց դա անել լավ: Ես երբեք չեմ ընդունում, որ թատրոնի փորձի ժամին մարդը գնում է նկարահանման, որովհետեւ գումարի խնդիր ունի: Այդ ժամանակ հաստատ լիարժեք չես լինի, ինքդ քեզ հետ էլ անկեղծ չես լինի, տվյալ բանը կանես ուղղակի անելու համար, իսկ ես կյանքում չեմ արել եւ անում մի բան պարզապես անելու համար»:

Հարցին, թե Զառան սկզբունքայի մարդ եւ դերասանուհի է, նկատեց.

«Իրականում ես երբեք չեմ երազել դերասանուհի դառնալու մասին, պարզապես ճակատագիրը այդպես դասավորվեց: Այո, ես որոշակի սկզբունքներ ունեմ: Երբեմն այս կամ այն նախագծի ղեկավարները ասում են պետք է կոմպրոմիսի գնալ, բայց ես դրանց դեմ եմ: Իրականում՝ ես կոմպրոմիսային մարդ եմ, բայց նաեւ մի պարզ ճշմարտություն կա, երբ գնում ես կոմպրոմիսի, տուժում է որակը: Ամեն ինչը ցույց է տալիս, որ լավ արդյունք ունենալու համար պետք է պահել ոսկե միջինը: Վստահ եմ, որ ժամանակը գալու է եւ բոլորն էլ այդպես են կարծելու: Դերասանից պետք է պահանջել լիարժեք աշխատանք, իսկ դերասանն էլ պետք է պահանջի լիարժեք պրոֆեսիոնալ մոտեցում»:

Անցյալ տարի Զառան տղայի եւ ամուսնու հետ մեկնել էր ԱՄՆ, որից հետո շատերը կարծում էին, թե Զառան մշտական բնակություն կհաստատի այնտեղ: Հարցին, թե դերասանուհին երբեւէ մտադրություն ունեցե՞լ է հեռանալ Հայաստանից, ընդգծեց.

«Իմ կարիերայի հենց սկզբից ես միշտ էլ մեկնել եմ ԱՄՆ ու Եվրոպա՝ հյուրախաղերի: Հայաստանից գնալու հնարավորություններ միշտ եմ ունեցել, եւ չեմ ստի, երբ ժամանակին հիասթափություններ եմ ունեցել, մտածել եմ նաեւ հեռանալու մասին: Մտածել, բայց երբեք կտրուկ որոշումներ այդ ուղղությամբ չեմ կայացրել: Դա կլիներ վերջին քայլը, որը պետք է անեի, երբ ամբողջովին, ամեն ինչից հիասթափվեի»:

Հեղինակ՝ Անուշիկ Մելքոնյան