Արդեն ճանապարհել է մի նախագահի. ինչ լուծում է Սարգսյանը տանում Ղարաբաղ

Լրագիր | Նախագահ Արմեն Սարգսյանը Արցախի նախագահ Բակո Սահակյանի հրավերով հունիսի 13-ի առավոտյան մեկնել է Արցախ, ինչպես հայտնում է պաշտոնական հաղորդագրությունը: Այցի կամ հրավերի նպատակների մանրամասներ հայտնի չեն: Կապվա՞ծ է արդյոք այցը Արցախում տեղի ունեցող ներքին զարգացումների հետ, որոնք աշխուժության տարբեր աստիճանով ծավալվում են արդեն տեւական ժամանակ եւ հաջորդել են Հայաստանի թավշյա իշխանափոխությանը, թե՞ կա այլ նպատակ:

Անցնող օրերին Արցախում տեղի ունեցավ իրավապահ կառույցների ղեկավարների եւ պետնախարարի պաշտոնանկություն: Բակո Սահակյանի մամուլի խոսնակը մինչ այդ հայտարարել էր, որ սպասվում է աշխույժ քաղաքական զարգացումների նոր փուլ: Օրերս էլ Բակո Սահակյանը հայտարարեց, որ 2020 թվականին չի առաջադրվելու Արցախի նախագահի պաշտոնում:

Բայց Արցախը նոր նախագահ կունենա 2020 թվականի՞ն, թե՞ ավելի շուտ: Դա հետաքրքիր հանգամանք է: Այդ ֆոնին էլ հետաքրքիր է դառնում Արմեն Սարգսյանի այցն Արցախ: Միեւնույն ժամանակ, վերջին մի քանի օրերին Արցախի պաշտպանության բանակն ու նաեւ Արցախի նախագահի խորհրդականներից մեկը բավական հաճախ ահազանգում են սահմանին ադրբեջանական ստորաբաժանումների աշխուժության, կուտակումների մասին: Գրեթե այն, ինչ Հայաստանում թավշյա հեղափոխության օրերին էին անում, երբ դեռ չէր եղել հանգուցալուծում ու վարչապետի թեկնածության քվեարկություն խորհրդարանում:

Արդյոք Արցախի նախագահի շրջապատից ադրբեջանական կուտակումների մասին տեղեկատվական գեներացիան պայմանավորված է ներքին իրողությունների վրա ազդելու հանգամանքով, թե՞ սահմանին ադրբեջանական առանձնահատուկ աշխուժություն իսկապես առկա է եւ դրանով է նաեւ պայմանավորված նախագահ Սարգսյանին Արցախ հրավիրելու հանգամանքը:

մանրամասն՝ կայքում