Բոնին` ընկերուհուց բաժանվելու, անցած ուղու և «Ոսկե դպրոցի» մասին

Վահե Բեգլարյանին հեռուստադիտողներից շատերը ճանաչում են որպես Բոնի: Տարիներ առաջ հեռուստաէկրանին հայտնված տղան ասում է՝ Բոնի կեղծանունն իրեն արդեն հարազատ է դարձել, դրանից հրաժարվելու մասին երբևէ չի մտածել: Այս շրջանում նա որպես դերասան ներկայանում է «Ոսկե դպրոց» սիթքոմում։ Վահեն նաև սիթքոմի սցենարիստներից մեկն է: Tert.am Life-ը Վահեի հետ զրուցել է սիթքոմում իր կերպարի, Բոնի անունը ստանալու և անձնական կյանքի մասին:

 

Վահեն ավարտել է Մշակույթի պետական քոլեջը, մասնագիտությամբ կինոռեժիսոր է: Տեսախցիկի առաջ հայտնվել է դեռ 4 տարեկանում: Ասում է՝ հեռուստատեսային աշխատանքով միշտ է հետաքրքրվել, թեև դերասանի մասնագիտական կրթություն չի ստացել, միշտ զբաղվել է ինքնակրթությամբ:

 

«Իմ առաջին աշխատանքը տեսախցիկի հետ եղել է 4 տարեկանում, երբ  «Ճստիկ-պստիկ» հաղորդումից եկել էին ինձ նկարահանելու` որպես տաղանդավոր երեխայի: Այն ժամանակ ես Մայքլ Ջեքսոնի նմանակումն էի անում և արտասանում»,- հիշեց նա:

 

 

Վահեն պատմեց, որ Բոնի անունը ստացել է «32 ատամ» ակումբի տղաների կողմից, որը հետագայում հիմնավորվեց նաև «Մեր բակում» նրա դերակատարման ժամանակ: «Երբ աշխատում էի «32 ատամ» ակումբում, սկսեցի երկարացնել մազերս, լրիվ գանգրահեր դարձա, ակումբի տղաներն ինձ տվեցին Բոնի անունը։ Այդ անվան հետ կապված բարդույթներ չունեմ: Դա արդեն բեմական անուն է դարձել ինձ համար։ Նրանք, ովքեր ինձ ճանաչել են ավելի վաղուց, շարունակում են Վահե դիմել»:

 

Բոնին նկատեց, որ հեռուստատեսային որոշակի դադարից հետո սիթքոմում նկարահանվելն իր հայտնիությունը թարմացրել է: Նրա խոսքով` իր կերպարի վերաբերյալ հիմնականում դրական կարծիքներ է լսում ինչպես դպրոցահասակ երեխաներից, այնպես էլ նրանց ծնողներից: Վահեն ասաց, որ մասնագիտական գործունեության ընթացքում սիթքոմում գլխավոր դերակատարման և սցենարիստի աշխատանքի փորձ դեռ չէր ունեցել, Մաքսի կերպարում հանդես գալն էլ իր համար հետաքրքիր էր:

 

«Երևի, իմ խաղացած ամենաբարդ կերպարներից մեկն է, որովհետև ինքը փակ մարդ է, տարբերվում է իր դիմախաղով, շարժուձևով, ձայնի ինտոնացիայով: Այդ ամենի ուղղությամբ շատ եմ աշխատել: Սովորաբար, այս կամ այն կերպարը մարմնավորելիս ես իրեն նմանեցնում եմ իրականությունից վերցրած մեկին: Օրինակ, «քյառթու» մարմնավորելիս հիշում եմ իմ այդպիսի ծանոթներին, այս դեպքում մի քանի տարբեր մարդկանց եմ հիշել ու համադրել Մաքսի կերպարում: Ինքը, այսպես ասած, փախած, ցնդած կերպար է, որն իր սիրած աղջկա համար ոչինչ չի խնայում, չնայած գիտի, որ նա ընկեր ունի»,-ասաց նա:

 

 

Վահեի խոսքով` խաղընկերներից ոմանց ճանաչել է, շատերի հետ էլ ծանոթացել է նկարահանման հրապարակում. «Մեր սիթքոմի թիմը շատ լավն է՝ սկսած տեխնիկից մինչև պրոդյուսեր: Կարող եմ ասել ոսկե թիմ է հավաքված:)»:

 

Երիտասարդ դերասանն ասաց, որ նոր առաջարկներ ունի, որոնք դեռ քննարկման փուլում են, ուստի դրանց մասին խոսելը վաղ է. «Առաջարկն ընդունելիս ինձ համար առաջնայինն այն է, որ իմ սիրելի աշխատանքով եմ զբաղվում, հետո միայն հոնորարն եմ հաշվի առնում»:

 

Վահեից հետաքրքվեցինք՝ մասնագիտությամբ լինելով կինոռեժիսոր, երբևէ չի՞ մտածել աշխատել նաև այդ ասպարեզում և ֆիլմ նկարահանել։ Ի պատասխան` նա ասաց. «Ես մտածում եմ, եթե դու ուզում ես ինչ-որ բան սկսել, պետք է լավ անես դա: Երբ հասկանամ, որ կարող եմ նկարահանել այնպիսի ֆիլմ, որը կհետաքրքրի բոլորին, ես դա կանեմ: Այդ լեվելին դեռ չեմ հասել»։ Վահեն նշեց, որ ապագայում մտադիր է երաժշտական ուղղությամբ առաջ գնալ, մասնավորապես զբաղվել DJ –ի աշխատանքով:

 

 

Վահեն նշեց, որ հումորը մեծ տեղ ունի իր կյանքում, սակայն չի մոռանում նաև լրջության մասին: Վահեն իրեն բնութագրեց որպես փոքր-ինչ վատատես ու թերահավատ մարդ, թեև դա թերություն չի համարում:

 

24 –ամյա դերասանին շատերը ավելի փոքր տարիք են վերագրում: Վահեն ասում է, որ դրանից երբևէ չի նեղսրտել. «Մինչև հիմա էլ շատերը զարմանում են իմանալով իրական տարիքս: Քանի որ մարդիկ գիտեն, որ ես շատ ավելի մեծ եմ, քան երևում եմ արտաքնապես, մարդիկ կան, որոնք կարծում են, թե շատ ավելի մեծ եմ: Երբ ասում եմ՝ 24 տարեկան եմ, ասում են՝ մենք գիտեինք 30–ն անց ես: Դա ինձ համար արդեն սովորական երևույթ է դարձել»,-ասաց նա:

 

Խոսլով անձնական կյանքի մասին՝ Բոնին նկատեց, որ թեև լուրջ հարաբերություններ է ունեցել, վաղուց բաժանվել է ընկերուհուց, հիմա սիրտն ազատ է: «Հիմա ընկերուհի չունեմ ու դեռ չեմ էլ պատրաստվում ունենալ: Ինձ համար հիմա առաջնահերթ է կարիերան: Կարծում եմ պիտի կայանաս, հետո մտածես անձնականը կառուցելու մասին,- ասաց նա և ավելացրեց, որ իր կողքին պատկերացնում է այնպիսի մարդու, որը կկիսի իր տեսակետները,-  Հասուն տարիքում մեր պատկերացումները փոխվում են, մարդու մեջ սկսում ես գնահատել հենց մարդ լինելը: Կարծում եմ` սերը առաջնայինը չէ, որ պահում է զույգին: Ամուսնանալուց հետո մարդիկ իրար միշտ սիրում են, իրենց շարունակում է կապել ուղղակի միասին ապրելու միտքը»: