Մոնթեի սպանության մասին

Ադրբեջանական մամուլը գրում է

Ասում եք՝ ո՞վ է խախտել
day.az-ը «Հայկական զինված ուժերը իրականացրել են զանգվածային կրակոցներ ճակատային գծում» հոդվածում գրում է, որ ըստ Ադրբեջանի ՊՆ մամուլի ծառայության հաղորդագրության, «հունիսի 20-ին հայկական ուժերը, խախտելով զինադադարի պայմանավորվածությունը, խոշոր տրամաչափի գնդացիրներից կրակ են բացել Հայաստանի Նոյեմբերյանի, Իջևանի և Բերդի շրջանի անանուն բարձունքներից դեպի Ղազախի շրջանի Ղայմախլու և Թովուզի շրջանի Աղդամ գյուղերի ուղղությամբ: Ադրբեջանական բանակի դիրքերը գնդակոծվել են նաև օկուպացված Աղդամի, Հորադիզի և Ֆիզուլի տարածքներից: Ընդհանուր առմամբ, հրադադարը խախտվել է 87 անգամ»:

Մոնթեի սպանության մասին
turan.az-ը Շահին Գաջիևի «Մակաբուծելու զարմանալի հատկությունը: Ձայն են խնդրում» հոդվածում գրում է, թե ինչպես են հաճախ մարդիկ մակաբուծում: Կարելի է մակաբուծել իշխանությանը գովելով, հայրենասիրությամբ, թշնամուն ատելով, նաև ուրիշի արարքը իրեն վերագրելով: Երբեմն Գաջիևին թվում է, որ մակաբուծելը ազգային գիծ է, քանի որ այն շատ է շրջապատում:
Հեղինակը պատմում է, որ այդպիսի մի մակաբուծության դեպքի հետ ինքն առնչվել է: Պատմությունը սկսվել է 2005 թվականից, երբ նա սկսել է լրագրողական հետաքննություն և հոդված հրապարակել 708-րդ գումարտակի զինվորների մասին: Դա այն գումարտակն է, որը 1993 թվականին սպանել է հայկական դաշտային հրամանատար, ԱՍԱԼԱ ահաբեկչական կազմակերպության առաջնորդ Մոնթե Մելքոնյանին: Հետաքննությունը երկար է տևել, և նյութերը հավաքվել են տարիներով: Ի սկզբանե միայն հայտնի էր, որ Մոնթեն սպանվել է հուլիսի 12-ին Աղդամի շրջանի Միրզալի գյուղի շրջակայքում ընթացող մարտերի ժամանակ ԲՄՊ-ի արձակած արկի բեկորից : Այդ մասին մի քանի օր անց առաջինը հայտնել էր Ֆրանս-պրեսսը, հետո՝ «Կոմսոմոլսկայա պրավդան»:
Գաջիևին հաջողվել է գտնել և հանդիպել 708-րդ գումարտակի այն ժամանակվա հրամանատար Խատայի Բաղիշևի հետ և նրա հետ պարզել այդ օրվա կռվի ամբողջ պատկերը, որը համընկել է հայկական աղբյուրների նկարագրածին: Ըստ հրամանատարի, իրենք չեն էլ իմացել, որ ԲՄՊ-ի արկի կրակոցով սպանել են Մոնթեին: Միայն դեպքերից 2 շաբաթ անց «Գյուն սահար» թերթում հոդված է տպագրվում, որ այդ գործը իրականացրել է ինչ- որ հետախուզական-դիվերսիոն խումբ Իբադի Հուսեյնովի գլխավորությամբ, նաև այն, որ ոչ միայն սպանել են, այլ նաև գլուխը կտրել. «Սա մակաբուծման մեքենայի աշխատանքի միայն սկիզբն էր: Հետո նոր հոդվածներ եղան, գրքեր գրվեցին, անգամ ֆիլմ նկարահանվեց 20-ամյա հետախույզ-դիվերսանտի մասին, որին վստահել էին խմբի հրամանատարությունը:
Այդ մակաբուծումը այնտեղ է հասել, որ հիմա որոշ չինովնիկներ պահանջում են ՊՆ-ի ղեկավարությունից՝ Իբադի Հուսեյնովին Ադրբեջանի ազգային հերոս ճանաչել: Լավ է, որ ՊՆ ղեկավարությունը դրան չի համաձայնում»:

aze.az-ը «Ադրբեջանական բանակը իր վերահսկողության տակ է վերցրել Լաչինի ճանապարհը» հոդվածում գրում է, որ Նախիջևանում հաջող օպերացիա է իրականացվել, որը թույլ է տվել վերահսկողության տակ վերցնել մեծ տարածքներ: Այդ մասին հունիսի 20-ի մամուլի ասուլիսում ասել է Ադրբեջանի պաշտպանության նախարար, գեներալ-գնդապետ Զաքիր Հասանովը: Ըստ նրա, «չեզոք գոտի» հասկացություն չկա, «դա մեր հողերն են և մենք այն ազատագրել ենք: Նա նաև նշել է, որ Ադրբեջանը արդեն վերահսկում է Լաչինի ճանապարհը և դա իրենց հերթական հաջողությունն է»:
Չգիտես ինչու, հիմա է մամուլի ասուլիս հրավիրում Հասանովը: Խոսքը փաստորեն, սեփական երկրի տարածում սեփական զինված ուժերի «ազատագրած» տարածքների մասին է, իսկ թե ինչ կապ ունի Հայաստանը կամ ումից են ազատագրել այդ տարածքները, իրենց երևակայության խնդիրն է:

Կ․ Խաչիկյան