«Կամուսնանամ իմ ամենալավ ընկերոջ հետ». Մարիա Չանդիրյանն անկեղծանում է

Լինել տաղանդավոր և ունենալ մեծ աշխատասիրություն. մասնագիտությամբ քաղաքագետ և լեզավաբան Մարիա Չանդիրյանի համար սրանք կարևոր բաղադրիչներ են ցանկացած ոլորտում հաջողելու համար: Պարուհի, դերասանուհի Մարիային հեռուստադիտողներից շատերը բացահայտեցին «Շանթ» հեռուստաընկերության Out Dance սիթքոմի միջոցով:

 

Tert.am Life-ը Մարիայի հետ հետաքրքիր զրույց է ունեցել հեռուստատեսությունում հայտնվելու, երազանքների ու անձնական կյանքի մասին:

 

Մարիան բացահայտեց, որ մորական կողմից իր մեջ նաև ռուսական արմատներ կան: Տատիկի մայրն է ռուս եղել, թեև ասում է՝ արտաքինից որևէ նմանություն չունի նրա հետ:

 

Ինչ վերաբերում է դերասանական հակմանը` նա նկատեց, որ այնիր մեջ դպրոցական տարիքից է դրսևորվել, ավելի ուշ հանդես է եկել մյուզիքլ ժանրում որպես պարուհի-դերասանուհի: Այդ առումով, նրա խոսքով, սիթքոմում նկարահանվելիս դժվարություններ կամ տեսախցիկի առաջ կաշկանդվելու խնդիր չի ունեցել:

 

 

 

«Չեմ կարծում, որ պետք է պարտադիր դիպլոմ ունենալ լավը լինելու համար: Ինքնուս մարդիկ մեծ մասամբ ավելի հաջողակ են լինում, որովհետև իրենք չգիտեն կանոններ, չունեն կաղապարներ, այդ ամենը ստացվում է ավելի բնական: Եթե հետագայում ցանկանամ շարունակել աշխատել դերասանի մասնագիտությամբ, ամեն դեպքում, կրթություն կստանամ։ Ներկա պահին տաղանդիս շնորհիվ, կարծում եմ, ինձ մոտ ստացվում է ներկայանալ որպես դերասանուհի: Իմ կրթությունը կապ չունի այն ամենի հետ, ինչով հիմա զբաղված եմ, բայց  ոչ ոք չի ասել, եթե դու պարուհի կամ դերասանուհի ես, պիտի այլ կրթություն չունենաս: Քաղաքագետ-լեզվաբանի մասնագիտությամբ երբևէ չեմ աշխատել: Դա կանեմ այն ժամանակ, երբ մարմինս թույլ չտա պարել»,-ասաց նա:

 

Մարիան Out Dance սիթքոմում ներկայանում է ոչ միայն որպես դերասանուհի, այլև պարային համարների բեմադրիչ: Նա նշեց, որ սիթքոմի խաղընկերների մեծ մասին ճանաչել է մինչև նկարահանումը. «Քանի որ նախագծում մեծ մասամբ հավաքվել են պարողներ, իրար ճանաչում ենք ավելի քան 10 տարի, տարբեր նախագծերում միասին աշխատել ենք: Չեմ կարող ասել, որ կյանքի ընկերներ ենք, բայց մտերմություն ունեցել ենք: Նախագծից իմ ամենամտերիմ ընկերը Հրաչի կերպարը մարմնավորող Կարեն Ճաղարյանն է»:

 

Մարիայի խոսքով` պարուհի դառնալն իր մանկության երազանքն է եղել: Պարել սկսել է 14 տարեկանից: Նա պարի լեզուն սովորեցնում է նաև այլ մարդկանց: Ասում է` բազմաթիվ համագործակցություններ է ունեցել Սիրուշոյի, Արամ MP3, Իվետա Մուկուչյանի, Էրիկի և հայկական շոու-բիզնեսի այլ արտիստների հետ: Այս փուլում, սակայն, պարուհու խոսքով, ավելի շատ ներկայանում է որպես բեմադրիչ, քան կատարող:

 

 

«Այս պահին փորձում եմ դադար վերցնել տեսահոլովակներում նկարահանվելու համար: Չեմ ուզում համար ուղղակի նկարահանվել ամենուր երևալու համար։ Որպես ստեղծագործող, բեմադրիչ` ակտիվ գերծունեություն եմ ծավալում: Կուզեի պարային մյուզիքլներ շատ լինեին, որտեղ պարողը կկարողանար ամբողջապես դրսևորել իրեն: Հայաստանում խնդիր ունենք. կատարողը տեսահոլովակում պարելու համար նախընտրում է ոչ թե մի քանի ամիս հաճախել դասընթացների, այլ  ընդամենը մեկ ամսում սովորել ամենը, արդյունքում պարային շուկայում ունենք այն, ինչ ունենք: Դրանից բոլոր պարողներն էլ վատ են զգում»,- ասաց նա:

 

Խոսելով իր մյուս նախասիրությունների մասին՝ պարուհին նշեց, որ շատ է սիրում ջրացատկը և համարվում է ջրացատկի միջազգային կարգի մրցավար. «Ժամանակ առ ժամանակ մեկնում եմ մրցումների: Ես հանդիսանում եմ ջրացատկի՝ աշխարհում ամենաերիտասարդ մրցավարը»:

 

Մարիան աշխատում է նաև որպես մարզիչ։ Ասում է` ուժային դասեր է տալիս մարդկանց և փորձում օգնել նրանց վերագտնելու սեփական մարմնի ու հոգու ներդաշնակությունը. «Այդ աշխատանքն ինձ բավականություն է պատճառում։ Սիրում եմ բացատրել մարդկանց, որ իրենք գեղեցիկ են՝ կապ չունի նիհա՞ր են, թե՞ գեր: Դա ավելի շատ հոգեբանական աշխատանք է, ինչն ինձ շատ է դուր գալիս: Շատ եմ սիրում շփվել տարբեր մարդկանց հետ, բացահայտել նրանց: Փոքր ժամանակ շատ էի ուզում հոգեբան կամ հոգեբույժ դառնալ: Ի դեպ, վերջինի մասին դեռ երազում եմ:) Հասկանում եմ, որ սովորելու համար երբեք էլ ուշ չէ»:

 

 

25-ամյա պարուհին չի թաքցնում մշտապես ուշադրության կենտրոնում է։ Ինչպես ցանկացած աղջկա, դա իրեն դուր է գալիս։  Խոսելով անձնական կյանքի մասին՝ պարուհին նկատեց, որ իր կյանքում պաշտոնական որևէ հարաբերություն առայժմ չկա։ «Հենց փոփոխություն լինի, անմիջապես կհրապարակեմ  այդ մասին, որպեսզի բոլորն ինձ հետ ուրախանան,– ասաց նա և ավելացրեց, որ նախկինում սիրել է,- Իհարկե սիրել եմ, կոտրվել եմ, բայց երկար ժամանակ է անցել: Ես երբեք դեպրեսիայի կամ սթրեսի մեջ չեմ հայտնվում։ Կարծում եմ՝ իմ տեսակի մարդու համար, որը հստակ գիտի կյանքի ընթացքը, ինչպիսին է իրեն տեսնում 35 կամ 40 տարեկանում, պետք է համապատասխան ուժեղությամբ տղամարդ: Երբ իմ կյանքում ինչ-որ բան չի ստացվում, ասում եմ` թող  Աստծո կամքը լինի»:

 

Մարիայի խոսքով` փոքր տարիքում հաճախ է սիրահարվել և ավելի ռոմանտիկ է եղել, հիմա այդպիսին չէ: Ասում է՝ հակառակ սեռի մեջ գնահատում ծանրակշիռ ու հասուն լինելը, իսկ ամենագրավիչ տղամարդն իր համար նա է, ում հետ կարող է խոսել ցանկացած թեմայի մասին:

 

«Ես կամուսնանամ իմ ամենալավ ընկերոջ հետ, որի հետ կկիսեմ հետաքրքրություններ, երազանքներ, որն ինձ համար կլինի հոգեբանական թիկունք: Չեմ վախենա նրա կողքին ցույց տալ իմ թույլ կողմերը: Հիմա չեմ սիրահարվում. կամ սիրում եմ, կամ ոչ: Սիրահարվածությունը սխալներ, թերություններ չի տեսնում, սերը տեսնում է, և դու որոշում ես` ընդունե՞լ այդ մարդուն, թե՞ ոչ: Ինձ համար հարաբերությունները պետք է հիմնավորվեն ընտանիքի ստեղծումով։ Ես չեմ կարող խոսել հարաբերությունների մասին առանց այդ հեռանկարի: Ինձ համար գոյություն ունի «կին, ամուսին, երեխաներ» մոդելը:Իմ կարծիքով` կնոջ առաջին առաքելությունն ընտանիք կառուցելն ու տան ջերմությունն ապահովելն է։ Ինձ կարիերիստ չեմ համարում, չնայած միշտ էլ աշխատելու եմ այս ոլորտում»,-ընդգծեց նա։