Թալանի բոլոր տվյալները կուտակված են Վերահսկիչ պալատի հաշվետվություններում

1in.am-ի զրուցակիցն է ՀԱԿ քաղխորհրդի անդամ, տնտեսագետ Զոյա Թադևոսյանը։

-Տիկին Թադևոսյան, վարչապետ Նիկոլ Փաշինյանը հայտարարել է, որ կոռուպցիայի հետ կոմպրոմիս չի լինելու։ Ինչպե՞ս եք գնահատում վերջին շրջանում կոռուպցիոն բացահայտումները և ինչ եք կարծում, սա կմնա միջին օղակներո՞ւմ, թե՞ վերև կհասնի։

-Նախ՝ կոռուպցիայի դեմ պայքարը գնահատում եմ գերազանց նախաձեռնություն։ Եվ իրականում սա առաջնային այն խնդիրն էր, ինչին պետք է վարչապետը ձեռնամուխ լիներ իր պաշտոնավարման հենց սկզբից։ Սա ամենաճիշտ քայլն էր, որ երբևէ կարելի էր մտածել, որովհետև կոռուպցիան միակ և ավելի խոր համակարգային բնույթ ունեցող խոչընդոտն է, որն այս տարիների ընթացքում մեր տնտեսությանը վնաս է հասցրել։ Եվ եթե դա արմատապես չվերանա, նշանակում է՝ մենք չենք ստեղծի այն լավագույն պայմանները, որի հենքի վրա պետք է մեր տնտեսությունը զարգանա։ Ոչ միայն տնտեսության, այլ բոլոր հարաբերություններին խոչընդոտում է կոռուպցիան։ Հետևաբար, այդ պայքարի ուղեծիրը շատ ճիշտ է ընտրված։ Կարծում եմ՝ միջին օղակից սկսելն էլ երևի իր տրամաբանությունն ունի, իսկ թե ինչու է այդպես սկսել ԱԱԾ-ն, և հաստատ ստացել է աջակցություն վարչապետի կողմից, դա արդեն իրենք ավելի լավ կիմանան։ Ես գուշակություններ չեմ ուզում անել, բայց ենթադրում եմ, որ նրանց միջոցով հնարավոր է գտնել այն թելերը, որոնք կտանեն դեպի վերին էշելոնի կոռուպցիոներներ։

-Մանվել Գրիգորյանն ամբողջ շղթայի մեկ օղա՞կն է, պատասխանատվության շղթան պետք է ընդլայնվի՞։

-Իհարկե, ես կարծում եմ՝ բոլորը պետք է ենթարկվեն պատասխանատվության, նրանք, ովքեր գողացել են պետությունից, զինվորից, ԶՈւ-ից, Ազգային անվտանգությունից։ Հետևաբար, կարծում եմ, որ այսօր չպետք է ուղղակի նստել և մտածել՝ նախկին պաշտոնյան մեղավո՞ր է, թե՞ ոչ, ուղղակի պետք է գնալ նրանց հասցեներով, գնալ տեսնել, թե որտեղ են ապրում, ինչ ունեցվածք ունեն, որտեղից են ձեռք բերել այդ ունեցվածքը և կտեսնեն, որ բոլոր գեներալներն ապրում են դղյակներում։ Իսկ այսօր դղյակներ պահելը՝ միայն սպասարկման ծախսերը՝ լույս, ջուր, էլէներգիա և այլն, ամենաքիչը կազմում է 3-5 հազար դոլար, եթե նրանք չեն գողանում էլէներգիան, ջուրը և այլն։ Եվ այս հասցեներով գնալուց հետո անմիջապես կարելի է պարզել, թե ով ինչքան է թալանել երկիրը։ Եվ ընդհանրապես նրանցից յուրաքանչյուրն ունեն կարողություններ նաև այլ երկրներում։ Տարիներ շարունակ ահազանգում էինք՝ թալանում են, տանում են, կառուցում են այստեղ-այնտեղ, բայց այն ժամանակ դրանով որևէ մեկը չէր հետաքրքրվում, որովհետև իշխանությունները ձեռք ձեռքի բռնած կոռուպցիայի պարն էին պարում։ Հետևաբար, նրանց հետաքրքիր չէր դա, իսկ նոր իշխանությունը դա կարող են շատ հեշտ պարզել։ Ես ասեմ, որ թալանի բոլոր տվյալներն այսօր կուտակված են Վերահսկիչ պալատի հաշվետվություններում։ Վերահսկիչ պալատի նախագահն էլ պարտադիր պետք է փոխվի, այնտեղ պետք է լինեն պրոֆեսիոնալներ և այնտեղ պրոֆեսիոնալների միջոցով պետք է նորից նախկին հաշվետվությունները բացել և կտեսնենք, թե ինչ թալան կա այդ հաշվետվություններում։

մանրամասն՝ կայքում