Օրենքով գողը կաթվածահար է արել Ռուսաստանի ներքին գործերի նախարարությունը

Երեկվանից սկսել են ձերբակալել Ռուսաստանի ներքին գործերի նախարարության հարյուրավոր աշխատակիցների: Պարզվում է` ՆԳՆ-ում գործել են մեծ թվով քրեական հանցախմբեր, որոնց ղեկավարել են համակարգի առանցքային պաշտոններ զբաղեցնող բարձրաստիճան ոստիկաններ: Բոլորին ղեկավարել են մի «գլխավոր շտաբից», որը ոչ մի կապ չունի ոստիկանության հետ:

Այս ամենի առանցքում դարձյալ «օրենքով գող» Զախարի Քալաշովն է` քրեական աշխարհի հանարահայտ Շաքրո Մոլոդոյը: Շատերը կես կատակ-կես լուրջ նրան համարում են ՆԳՆ կոորդինատոր: ՌԴ ՆԳՆ հակակոռուպցիոն վարչության պետի տեղակալ Դմիտրի Զախարչենկոյի ձերբակալությունից հետո քննչական մարմինները պարզել են, որ հանցավոր խմաբավորումների անդամների թիվն անցնում է երկու հարյուրի սահմանները:

Հիշեցնենք, որ Զախարչենկոյի բնակարանից հայտաբերել են 125 մլն ԱՄՆ դոլար և երկու միլիոն եվրո: Իրավապահները հայտարարել են, որ երբևէ որևէ «օրենքով գող» այսքան մեծ ազդեցություն չի ունեցել երկրի իրավապահ մարմինների և առևտրի ոլորտի վրա, քան Շաքրո Մոլոդոյը:

Երեկվանից ձերբակալություններ են սկսվել նաև ՌԴ հարկային մարմիններում: Շաքրոյի ձեռքն այնտեղ էլ է հասել: Ձերբակալվել է Մոսկվա քաղաքի գլխավոր պետական հարկային տեսուչ Եվգենի Պետլևաննին: Նա մեղադրվում է առանձնապես խոշոր չափերի կաշառք ստանալու մեջ: Կոնկրետ մեկ դեպքով նա կաշառք էր վերցրել չորս միլիոն ռուբլու և 85 000 եվրոյի չափով: Բոլոր ձերբակալությունները իրականացնում են ՌԴ անվտանգութության դաշնային ծառայության աշխատակիցները: