Հայաստանում ավելացել են բուժման նպատակով ներգնա տուրիզմի մեկնողները

Հայաստանը որպես զբոսաշրջային կենտրոն գնալով ավելի գրավիչ է դառնում օտարերկրյա և հայազգի զբոսաշրջիկների համար, ինչի մասին փաստում են Ազգային վիճակագրական ծառայության պաշտոնական կայքում տեղ գտած ուսումնասիրությունները: Թվերն առավել քան խոսուն են: 2018 թ. հունվար-մարտ ամիսներին Հայաստան այցելած զբոսաշրջիկների թիվը կազմել է 346 հազար 458 նախորդ տարվա նույն ժամանակահատվածի 298 հազար 533-ի համեմատությամբ: Այս տարվա առաջին եռամսյակում Հայաստան ժամանող զբոսաշրջիկների թիվն ավելացել է 47 հազար 925-ով:

Ըստ ՄԱԿ-ի զբոսաշրջության համաշխարհային կազմակերպության մեթոդաբանության՝ միջազգային զբոսաշրջիկ է համարվում ցանկացած անձը, ով հանգստանալու, բուժվելու, հարազատներին այցելելու, գործնական, կրոնական կամ այլ նպատակներով ճանապարհորդում է իր հիմնական բնակության վայրից մեկ այլ վայր ոչ պակաս քան 24 ժամ և ոչ ավել քան անընդմեջ 1 տարի ժամանակով: Այսինքն` նրա հիմնական նպատակը ճանապարհորդելն է, այլ ոչ թե աշխատանքային գործունեությամբ զբաղվելը: Բայց, ամեն դեպքում, անհնար է ժխտել, որ տարեց տարի Հայաստան այցելողների թիվը աճում է, թեկուզ և դրանց որոշ մասը բուն զբոսաշրջիկ չեն, այլ, օրինակ, հայրենիք վերադարձող քաղաքացիներ:
Այդ 346 հազար 458 զբոսաշրջիկներից 52 հազար 651-ը տեղավորվել են հյուրանոցային տնտեսության օբյեկտներում, իսկ մնացած 293 հազար 807-ը՝ բարեկամի ու հարազատի տանը, կամ էլ՝ վարձով տրվող բնակարաններում:
Հայաստանից մեկնողների թիվը նույն ժամանակահատվածում ավելի փոքր թիվ է կազմել՝ 300 հազար 832: Բայց սա կրկին ավելի է նախորդ տարվա առաջին եռամսյակում գրանցված մեկնումների թվից: 2017 թ. հունվար-մարտ ամիսներին այն կազմել է 266 հազար 324:
Հայաստանից մեկնողների մի չնչին մասը՝ 600 հոգի, իրենց ուղևորությունը կազմակերպել են զբոսաշրջային գործակալությունների կողմից: Նախորդ տարի գրեթե նույնքան մարդ է կրկին օգտվել գործակալությունների ծառայություններից, այն է՝ 599: Իսկ 300 հազար 232 քաղաքացի էլ ինքնուրույն է կազմակերպել իր մեկնումը:
Հայաստանում այս տարի ավելացել է ոչ միայն միջազգային, այլև՝ ներքին զբոսաշրջությունը: Եթե 2017 թ. հունվար-մարտ ամիսներին ունեցել ենք 91 հազար 707 զբոսաշրջիկ, ապա այս տարի՝ 111 հազար 888: Ներգնա զբոսաշրջիկների թիվն ավելացել է 20 հազար 181-ով:
Այս տարվա առաջին եռամսյակում ներգնա տուրիստների ճնշող մեծամասնությունը՝ 77 հազար 162-ը, այլ համայնք են գնացել հանգստի ու ժամանցի, 26 հազար 369-ը գործանական, 3410 բուժման և 4947-ն էլ՝ այլ նպատակներով: Ընդ որում, այս տարի նախորդ տարվա համեմատությամբ ավելացել է բուժման նպատակներով զբոսաշրջության մեկնելը: Այսպես, 2017 թ. առաջին երեք ամիսներին այսպիսի զբոսաշրջիկների թիվը կազմել է 2910:

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ