«Հայրիկիս չէի ասել, պարզվեց` գիտի». Մարտա Կիրակոսյանի նոր դաջվածքն ու Ղազախստան մեկնելու առիթը

Երգչուհի Մարտա Կիրակոսյանն արդեն հասցրել է վայելել ամառային հանգիստը: Նա, Գրիգոր Կյոկչյանն ու Երգի պետական թատրոնի մյուս մենակատարները մեկնել էին Ղազախստան: Աստանայում անցկացրած օրերի մասին Մարտան պատմել է Tert.am Life-ին:

 

Երգչուհին նշեց, որ առաջին անգամ էր Ղազախստանում, որտեղ անցկացրած 9 օրվա մեծ մասը Մարտան նախընտրել է պասիվ լինել:

 

«Ի տարբերություն ընկերներիս, շատ չեմ շրջել քաղաքով: Բավարարվում էի երեկոյան զբոսանքներով: Մեկնել էի կոնկրետ պասիվ հանգստի: Այդ իսկ պատճառով տպավորությունների մասին դժվար է խոսել: Քաղաքը նոր էին վերակառուցում: Կարելի էր բազմաթիվ նոր կառուցվող շենքեր տեսնել և սակավաթիվ բնակչություն: Աստանայում հին շունչ կար, բայց փորձում էին մոդեռնիզացնել: Գուցե, տասը տարի անց կարողանան Դուբայի նման քաղաք ստանալ»,- ասաց Մարտան:

 

 

 

Յուրաքանչյուր նոր երկիր բացահայտելիս կարևոր է նաև նրա խոհանոցին ծանոթանալն ու ազգային ուտեստները համտեսելը: Երգչուհին նշեց, որ այդ տեսանկյունից իր համար հետաքրքիր բացահայտումներ չի արել՝ ղազախական խոհանոցն իրեն դուր չի եկել. «Ամեն բան շատ յուղոտ էր պատրաստվում, ինչը ես չեմ սիրում: Հիմնականում գառան մսով ուտեստներ էին»:

 

Մարտայի խոսքով՝ Երգի պետական թատրոնի իրենց խումբը, որն ավելի քան 7 տարի է՝ գործում է, բազմաթիվ երկրներում է եղել ինչպես աշխատանքային այցերով, այնպես էլ հանգստի նպատակով: «Ամեն տարի միասին Ղարաբաղ ենք գնում հանգստի: Եթե բոլորս միասին ենք, ապա նույնիսկ ամենավատ ու անհետաքրքիր վայրում էլ հիանալի ժամանակ ենք անցկացնում: Մենք՝ հինգս էլ շատ տարբեր, բայց ուրախ մարդիկ ենք մեր տեսակով»,- ասաց նա։

 

Մարտան հաճախ է ներկայանում տարբեր ֆոտոշարքերով: Աստանայում լուսանկարվելու առիթը ևս երգչուհին բաց չի թողել: «Դա պրոֆեսիոնալ ֆոտոշարք չէր, պարզապես իմ մտահղացմամբ մի քանի լուսանկար արեցի, որոնք ինքս էլ մշակել եմ»,-ասաց նա:

 

Երգչուհին նշեց, որ կրկին վերադարձել է աշխատանքային ռիթմին, իսկ ամառային հանգստի մասին առայժմ չի մտածել: «Երգի պետական թատրոնում ավարտական խումբ ունեմ: Աշակերտներիս կճանապարհեմ, նոր կմտածեմ հանգստի մասին: Դեռ չգիտեմ երկրից դուրս կհանգստանամ, թե կմնամ այստեղ»,- ասաց նա:

 

 

Մարտայի խոսքով` լիարժեք հանգիստ ունենալու տևողությունն իր դեպքում կախված է հանգստի տեսակից: Նա նշեց, որ պասիվ հանգստի պարագայում երեք օրն էլ իրեն բավական է, թեև նախընտրում է համադրել պասիվ ու ակտիվ հանգիստը։

 

«Հանգստի առաջին մի քանի օրը կարող եմ սենյակից ընդհանրապես դուրս չգալ: Իմ սիրելի ֆիլմերը կամ սերիալները դիտել, հետո միանգամից լիցքավորվում եմ ու անցնում ակտիվ հանգստի: Ինձ համար հանգստի լավագույն տարբերակը ճանապարհորդելն է: Մտածում եմ, որ հնարավորության դեպքում առաջին բանը, որ պիտի անես՝ ճամփորդելն է»,-ասաց Մարտան: 

 

Ի դեպ, Մարտան ևս մեկ նոր դաջվածք ունի, որն արել է ոտքի ստորին հատվածում ՝ Seven մակագրությամբ: Նա նշեց, որ նախապես միայն մայրիկին էր ասել այդս մասին, հայրիկը պետք է տեսներ այն Աստանայից վերադառնալուց հետո: Նրա խոսքով` հայրիկի արձագանքի հետ կապված որոշակի մտավախություններ  ուներ, բայց որևէ խնդիր չի առաջացել։

 

«Պարզվեց, որ հայրիկս մինչև մեկնելս արդեն տեսել էր դաջվածքս, բայց մայրիկին զգուշացրել էր, որ ինձ չասի այդ մասին: Շատ համբերատար հայր ունեմ:),-ասաց նա և ավելացրեց, որ նոր դաջվածքը նույնպես իր համար հատուկ խորհուրդ ունի,- 7-ը իմ ծննդյան օրն ու ամսաթիվն է: Ես որոշել եմ, որ դա նաև իմ հաջողության թիվն է»,-եզրափակեց Մարտան: