«Թունավոր սեր» սերիալի նոր դեմքերն ու հայտնի դերասանները

«Թունավոր սեր» 25 մասանոց հեռուստասերիալն արդեն Ucom ցանցում գործող «Արմենիա Պրեմիում» հեռուստաալիքի եթերում է: Հարուստ և աղքատ խավերի բախումն ու իրական սիրո ուժը ցույց տվող մելոդրամայում հանդես են գալիս ինչպես արդեն հայտնի դերասաններ, այնպես էլ հեռուստադիտողներին անծանոթ, նոր դեմքեր:

 

Tert.am Life-ը զրուցել է դերասանական հիմնական կազմի անդամների հետ։

 

Մարիամ Դավթյան

 

Դերասանուհի Մարիամ Դավթյանը հեռուստասերիալում մարմնավորում է գլխավոր հերոսուհու մորը՝ Օլգա Արամովնային: Նա դասախոս է, դստեր հետ ապրում է հանրակացարանում, ամուսինը մեկնում է  Արցախ՝ ռազմաճակատ:

 

 

«Հերոսուհիս մի կին է, որին իրադարձությունները ստիպում են ուժեղ դառնալ ու պայքարել հանուն աղջկա: Ինձ համար շատ կարևոր է, որ կերպարը գույներ ունենա: Այն, ինչ ես խաղում եմ, պետք է ներքուստ ինձ հուզող թեմա լինի, կայծ առաջացնի իմ մեջ:

Հակառակ դեպքում, ես ուղղակի չեմ համաձայնում խաղալ»,-ասաց դերասանուհին:

 

 

Ռեժիսոր Հարութ Շատյանի և ստեղծագործական այս թիմի հետ աշխատանքը Մարիամի համար առաջինը չէ: Հեռուստադիոտղները նրան արդեն տեսել են «Փրկեք մեր հոգիները» հեռուստանովելում: Դերասանուհին նշեց, որ կարճատև դադարից հետո այս առաջարկը սիրով է ընդունել. «Այս թիմի հետ հերթական անգամ աշխատելն ինձ համար հաճելի էր: Իմ խաղընկերների մեջ կան թե՛ միջին տարիքի դերասաններ, թե՛ երիտասարդներ: Աղջկաս դերում դերասանուհի Էմմա Սապունջյանն է, որի հետ աշխատել ենք նաև նախորդ հեռուստանովելում»:

 

Գևորգ Հայրապետյան

 

«Թունավոր սեր» հեռուստասերիալում գլխավոր հերոսի՝ Աղասի կերպարը վստահված է երիտասարդ դերասան Գևորգ Հայրապետյանին: Վերջինիս խոսքով` առաջին անգամ է նկարահանվում նման ծավալի նախագծում որպես գլխավոր կերպար: Նա պատմեց, որ դերասանական կրթություն է ստացել «Հայ Ֆիլմ» կինոստուդիայում, Թատերական ինստիտուտում և արդեն ութ տարվա դերասանական փորձ ունի:  Դերասանն ուրախ է նման վստահության համար, միաժամանակ նկատում է, որ դա մեծ պատասխանատվություն է իր համար:

 

 

«Սա առաջին մեծ փորձն է ինձ համար: Մինչև այս հանդես եմ եկել ATV հեռուստաընկերության նախագածերից մեկում երկրորդական կերպարով: Այս թիմի հետ առաջին անգամ էի համագործակցում: Նրանք ամեն բան անում էին, որպեսզի դերասանը չկաշկանդվի, հնարավորինս բացվի: Դերասանական կազմն էլ լավ էր ընտրված: Նրանց հետ աշխատելը շատ հեշտ էր: Մեր նկարահանումներն անցել են շատ հաճելի մթնոլորտում՝ հումորով հագեցած»,-ասաց նա:

 

Խոսելով իր կերպարի մասին՝ Գևորգը նկատեց, որ փորձել է հնարավորինս ճիշտ ներկայացնել հերոսին, թե որքանով է ստացվել, հանդիսատեսը կորոշի: «Կերպարս երիտասարդ ուսանող է, որը խնդրի մեջ է հայտնվում և փորձում է իր մարդկային գծերի շնորհիվ դուրս գալ այդ իրավիճակից: Ես բնավորությամբ այնպիսին եմ, որ միշտ դժգոհ եմ լինում իմ աշխատանքից: Ես աշխատում եմ հանդիսատեսի համար, և ի վերջո իրենք են որոշում, թե ինչպիսի արդյունք եմ գրանցում»,-ասաց նա:

 

Թամարա Գևորգյան

 

Հեռուստասերիալում ներկայանում է նաև երիտասարդ դերասանուհի Թամարա Գևորգյանը՝ Աննայի կերպարով: Նա նշեց, որ կերպարն իրեն գրավել է առաջանահերթ նրանով, որ տեսակով կայուն չէ և ամբողջ սերիալի ընթացքում փոփոխությունների ենթարկվում:

 

 

«Առաջին անգամ եմ նման կերպարով ներկայանում հեռուստադիտողին: Այն իմ խաղացած մնացյալ կերպարներից շատ է տարբերվում: Երբ առաջարկը ստացա, իմացա ինչ կերպարով եմ հանդես գալու, բացեցի զգեստապահարանս ու հասկացա, որ այդ կերպարին համապատասխան ոչ մի հագուստ չունեմ: Այդքան տարբերվում է ինձնից և իմ խաղացած մյուս կերպարներից,-ասաց Թամարան և ավելացրեց, որ իրեն բարդ կերպար է բաժին հասել,- Մեծ պատասխանատվություն էր դրված ինձ վրա: Եվ՛ վստահությամբ, և՛ մեծ վախով եմ մոտեցել կերպարիս, որովհետև իրեն ու իր բոլոր գործողությունները պետք էր արդարացանել, հակառակ դեպքում հեռուստադիոտղը նրան չէր հավատա»:

 

Սեյրան Մովսիսյան

 

Հեռուստասերիալի նոր դեմքերից է սկսնակ դերասան Սեյրան Մովսիսյանը, որը մարմնավորում է Հայկին: Նրա համար «Թունավոր սեր» հեռուստասերիալը դեբյուտային է: 23-ամյա դերասանը Թատերական ինստիտուտի ուսանող է: Նա պատմեց, որ սերիալում հայտնվել է՝ մասնակցելով քասթինգի:

 

«Սերիալի նկարահանող անձնակազմի հետ առիթ ունեցել եմ աշխատել Էրեբունի-Երևան հոլովակի նկարահանման ժամանակ: Իսկ այս հեռուստասերիալում ընդգրկվելս շատ պատահական ստացվեց: Ընկերուհուս ուղեկցում էի քասթինգի, հետո ինքս էլ որոշեցի մասնակցել: Նա ինչ-ինչ պատճառներով չնկարահանվեց սերիալում, իսկ ես մնացի և հաստատվեցի Հայկի կերպարի համար: Սա իմ առաջին հեռուստատեսային նախագիծն է: Շատ ուրախ եմ, որ հենց այս թիմի հետ աշխատելու հնարավորություն ունեցա: Այստեղ մարդիկ փոխադարձ հարգանք, սեր և ըմբռնում ունեն միմյանց նկատմամբ»,-ասաց Սեյրանը:

 

 

Խոսելով իր հերոսի՝ Հայկի մասին, նա նշեց, որ իրենք մեկ ընդհանրություն ունեն` նպատակին հասնելու ձգտումը. «Կերպարս սիրում է գլխավոր հերոսուհուն, բայց այդ զգացմունքը փոխադարձ չէ: Նա նպատակադրված ուզում է հասնել այդ աղջկան: Բնավորության այդ գիծն ինձ մոտ էլ կա: Իհարկե, կան շատ իրավիճակներ, որոնցում ես այնպես չէի վարվի, ինչպես Հայկը»:

Երիտասարդ դերասանը նշեց, որ իր համար մեծ փորձառություն է պրոֆեսիոնալ դերասանների կողքին նկարահանվել հեռուստասերիալում. «Ես պատիվ ունեմ աշխատելու նման դերասանների հետ: Շատ բան ես սովորում իրենցից՝ թեկուզ կողքից հետևելով նրանց խաղին: Իրենց հետ խաղալիս փոքր-ինչ լարվում ես, բայց այս սերիալի թե՛ ադմինիստրատիվ անձնակազմում, թե՛ դերասանկաան կազմում, մեզ ավելի շատ օգնել են, որ կարողնանաք ճիշտ դրսևորվել»: