Դիանա Մալենկոն` ընկերուհու աչքերով. նոր ֆոտոսեսիա

Հաղոդավարուհի ոճաբան Մադոննա Հարությունյանն օրերս լուսանկարել է ընկերուհուն` հաղորդավարուհի, դերասանուհի Դիանա Մալենկոյին։ Մադոննան ընկերուհու հետ արած ֆոտոշարքը տրամադրել է Tert.am Life–ին ու պատմել, որ մանրակրկիտ նախապատրաստվել է ֆոտոշարքին, իսկ լուսանկարներն արել է հեռախոսով։

Սա լուսանկարելու Մադոննայի առաջին փորձը չէ։ Նա լուսանկարել է նաև մյուս ընկերուհուն` հաղորդավարուհի Էմմա Հակոբյանին։

Մադոննան մտադիր է զարգացնել լուսանկարչությունը, քանի որ այն անմիջականորեն կապված է իր առաջին մասնագիտության` ոճաբանության հետ։ Այս դեպքում ևս ստեղծում է կերպարը, որն ուզում է տեսնել իր օբյեկտիվում, ընտրում հագուստը, աքսեսուարները։ Դե իսկ մոդելին ընտրելուց հետո փնտրում է նկարահանման համապատասխան տեղը։ Այս անգամ համապատասխան տեղը նրանց հասցրել է Սևան, որտեղ ընկերուհիները ոչ միայն ֆոտոշարքն են իրականացրել, այլև լավ ժամանակ են անցկացրել։

«Լուսանկարչությունը միշտ հետաքրքրել է ինձ։ 6-7 տարի առաջ որոշեցի ֆոտոխցիկ գնել և սկսել լուսանկարել։ Այդպես սկսեցի կերպարներ ստեղծել և լուսանկարել. կամ ինքս հայտնվել ֆոտոխցիկի առջև, կամ լուսանկարել ուրիշներին։ Ես երբեք չեմ հետևում լուսանկարչական կանոններին, իմ լուսանկարները ստացվում են այնպես, ինչպես ես եմ ուզում տեսնել։ Շատ պրոֆեսիոնալ լուսանկարիչների համար կարող է սխալ լինել, օրինակ, որ մոդելի գլուխը վերևի հատվածից կտրված է, ըստ իսկ, եթե այդպես ավելի գեղեցիկ է, կարող է լինել»,– ասաց Մադոննան։

Ընկերուհիների աշխատանքը հեշտ ու հաճելի մթնոլորտում է անցել։ Մադոննայի խոսքով` այս դեպքում ավելի հեշտ էր ստանալ այն, ինչ ուզում էր. «Հաճախ ֆոտոշարք ստեղծելիս ոճաբանը, լուսանկարիչը և մոդելը կարող են տարաձայնություններ ունենալ, քանի որ յուրաքանչյուրը յուրովի է տեսնում գեղեցիկը։ Այս դեպքում ամեն ինչ շատ հեշտ ու արագ ստացվեց»։

Հղիության 7-րդ ամսում գտնվող հաղորդավարուհու համար աշխատելը բարդ չի եղել։ Ասում է` համատեղել են հանգիստն ու լավ ժամանակը։ «Սևանում ջերմաստիճանը մի քիչ ավելի ցածր է։ Հրաշալի եղանակ, գեղեցիկ տեսարան, լավ երաժշտություն ու համեղ սնունդ։ Կարելի է ասել, հանգիստը համատեղեցինք աշխատանքի հետ»,– ասաց նա։