«Դեմքիս որևէ պլաստիկ միջամտություն չկա». Ռոմելլա Թամարյանը՝ գեղեցկության իրեն ընտրելու նախապայմանի մասին

Tert.am Life-ն իր ընթերցողներին հայտնել է, որ «Միսս ԱՊՀ 2018» գեղեցկության միջազգային մրցույթին Հայաստանն այս տարի կներկայացնի մոդել, դերասանուհի Ռոմելլա Թամարյանը: Tert.am Life-ըՀայաստանի մասնակցի հետ զրուցել է մրցույթին մասնակցելու և ակնկալիքների մասին:

 

23-ամյա Ռոմելլան սովորել է Երևանի թատրոնի և կինոյի պետական ինստիտուտում, 9 տարի զբաղվել է պարով: Այժմ զբաղվում է դիմահարդարմամբ:

 

Նա նշեց, որ սա գեղեցկության մրցույթի մասնակցելու իր առաջին փորձը չէ: Նախորդ տարի Ռոմելլան Հայաստանը ներկայացրել է Բուլղարիայում անցկացված Top International Model of the World մրցույթին, որտեղ արժանացել է «Ամենալավ քայլող մոդել» տիտղոսին:  

 

 

«Ավելի շատ ֆոտոմոդելինգով եմ զբաղվել: Միշտ առաջարկներ եմ ստացել լուսանկարվել տարբեր ապրանքանիշների հագուստների և աքսեսուարների գովազդներում:

Ինձ մոտ դա շատ լավ է ստացվել, զգացել եմ, որ տեսախցիկն ինձ սիրել է: Ես ինձ ավելի շատ ֆոտոմոդել եմ համարում քան պոդիումին քայլող մոդել: Երբեք չեմ սիրել, երբ մոդելները սառը հայացքով քայլում են պոդիումին, առանց ժպտալու, ֆոտոմոդելինգում տաքություն ու ջերմություն կա»,-ասաց Ռոմելլան:

 

 

Նա նշեց, որ  «Միսս ԱՊՀ 2018» մրցույթին մասնակցելու հայտն ուղարկելուց հետո մեկ շաբաթ անց կազմակերպիչներն իրեն զանգահարել են ու հաստատել, որ Հայաստանն ինքն է ներկայացանելու. «Սա թոփ-մոդել մրցույթ չէ, այլ գեղեցկության, իսկ դրանք տարբեր բաներ են: Այս մրցույթը փոքր-ինչ ազատություն է տալիս: Ինձ գրավել է այն, որ կարող եմ բեմի վրա ազատ քայլել ու շարժվել»:

 

Ռոմելլայի խոսքով` մրցույթին նախապատարստական աշխատանքներն ակտիվ ընթացքի մեջ են, այժմ զբաղված է հագուստների ընտրության հարցով:

 

«Լողազգեստով ելույթն այս տարի հանվել է մրցույթից մրցույթն ընդունող երկրի պահանջով, քանի որ այնտեղ փոք-ինչ մուսուլմանական ուղղվածություն կա: Առաջինը կներկայանանք սև կարճ զգեստներով, հաջորդիվ սպորտային ու երեկոյան հագուստներով»,-ասաց նա:

 

 

1.71 սմ հասակով Ռոմելլան նշեց, որ մոդելային չափորոշիչներին իր կազմվածքով համապատասխանում է: Խոսելով մրցույթից ունեցած ակնկալիքների մասին` նա նշեց, որ Հայաստանի նախորդ տարվա մասնակցի՝ Շուշան Երիցյանի հաղթանակը իրեն պարտավորեցնում է պահել այդ ցուցանիշը:

 

«Չեմ կարող ասել, թե ինչպես կլինի: Այնպես չէ, որ հատուկ գնում եմ առաջին հորիզոնականը զբաղեցնելու համար, սակայն գնում եմ իմ Հայաստանը լավագույնս ներկայացնելու նպատակով: Ես աշխատում եմ ինձ ավելի համեստ ներկայացնել, լուսանկարներում էլ բաց հագուստ չկրել, ավելի բնական լինել: Դեմքիս որևէ պլաստիկ միջամտություն չկա, աչքերս էլ բնական երանգի են, թեև շատերը հարցնում են` արդյոք լինզաներ եմ դնում: Երևի, հենց այդ բնական տեսքն էլ գրավել է մրցույթի կազմակերպիչներին, որ ինձ ընտրեցին մասնակցոիթյան համար»,- ասաց նա:

 

 

Ռոմելլան նկատեց, որ գեղեցիկ աղջիկների և, հատկապես, մոդելների պարագայում հասարակության մեջ կարծրատիպային մոտեցում կա՝ կապված նրանց ինտելեկտի հետ: Նրա խոսքով` մրցույթին մասնակցելով նպատակ ունի սեփական օրինակով կոտրել այդ կարծրատիպերը:

 

«Բնական է, որ միայն դատարկ գեղեկցությամբ որևէ մեկին չես կարող գրավել: Այդ առումով չեմ անհանգստանում և որևէ մտավախություն չունեմ: Մտածում են, եթե գեղեցիկ ես, ուրեմն ոչնչից տեղյակ չես և ոչինչ անել չես կարող: Օրինակ՝ ես անգամ խոհարարական դասընթացների եմ գնացել, շատերը զարմանում են, որ կարողանում եմ այդքան լավ պատրաստել: Ես իմ շրջապատում արդեն կարողացել եմ ապացուցել, որ գեղեցկուհին կարող է լինել և՛ ինտելեկտով, և՛ բազմաթիվ շնորհներ ունենալ»,-եզրափակեց նա: