Ո՞վ է ՊՊԾ գնդի տանիքում հայտնված դիպուկահարը

«Հրապարակ»-ը գրում է․

ՀՀ ոստիկանության հասարակայնության հետ կապերի եւ լրատվության վարչության պետ Աշոտ Ահարոնյանն օգոստոսի 1-ին` «Սասնա ծռերի» դեպքերի օրերին, իր ֆեյսբուքյան էջում զետեղել էր տեսանյութ, որի կադրերում երեւում էր դիպուկահար՝ զենքը ձեռքին: Տեսագրության հրապարակումից հետո այն հասարակական բուռն քննարկման արժանացավ, եւ շատերը տեսագրությունը որակեցին «մոնտաժված», «կեղծ»՝ կասկածի տակ առնելով դրա իրական լինելը: Դեպքից անցել է մոտ երեք ամիս, սակայն մինչ այժմ հանրությանը հայտնի չէ՝ արդյո՞ք հրապարակված հիշյալ տեսագրությունը ենթարկվել է համապատասխան փորձագիտական քննության, եւ ի՞նչ է պարզել քննությունը դրա իրական կամ կեղծ լինելու մասին: Արդյո՞ք բացահայտվել է տեսագրության մեջ երեւացող անձի ինքնությունը, հայտնաբերվե՞լ է զենքը, որը նրա ձեռքին է: Իրավական ընթացակարգով նախատեսված ի՞նչ գործողություններ են կատարվել ՊՊԾ գնդի այն տարածքում, որտեղից որ հիշյալ դիպուկահարը կրակոց է արձակել: Եթե կատարվել են համապատասխան գործողություններ, ապա ի՞նչ է պարզել հիշյալ տեղանքում կատարված համապատասխան փորձագիտական ուսումնասիրությունը եւ ինչ եզրակացության հանգել: Արդյո՞ք այդ վայրից արձակված դիպուկահար կրակոցից կարող էր զոհվել ոստիկանության զորքերի զինծառայող, ենթասպա Յուրի Տեփանոսյանը, ինչպես որ, ըստ նախնական վարկածի, այդ օրերին հայտարարում էր ոստիկանությունը:

Մենք այս հարցերի հետ կապված պատասխաններ ստանալու ակնկալիքով դիմել ենք Հատուկ քննչական ծառայություն, որտեղ քննվում է «Սասնա ծռերի» գործը, որտեղից մեզ դեռեւս չեն պատասխանել (թեեւ օրենքով սահմանված հնգօրյա ժամկետը լրացել է): Ակնկալում ենք առաջիկա աշխատանքային օրերին ստանալ բարձրացված հարցերի պատասխանները: ՀՔԾ-ին ուղղված մեր հարցերից մեկն էլ վերաբերում էր նրան, թե ինչ է պարզել նախաքննությունն այն երեք ոստիկանների մահվան հանգամանքների վերաբերյալ, որոնք մահացել են ՊՊԾ գնդի գրավման հետեւանքով: Մեր այս հարցի պատասխանն առկա է ՀՔԾ-ի օրերս տարածած հաղորդագրությունում: Ըստ այդմ՝ «պարզվել են ոստիկանության 3 ծառայողների՝ Արթուր Վանոյանի, Յուրի Տեփանոսյանի եւ Գագիկ Մկրտչյանի սպանությունների բոլոր հանգամանքները, հստակ բացահայտվել են այդ սպանությունները կատարած անձինք»: Իսկ թե ովքեր են նրանք՝ նախաքննությունը դեռեւս չի բացահայտում: Նշենք, որ ՀՔԾ-ում շարունակվում է զինված խմբի կողմից հուլիսի 17-ին ՊՊԾ գնդի վարչական շենքերն ու հարակից տարածքը զավթելու եւ պահելու դեպքի առթիվ ՀՀ ՔՕ 219-րդ եւ 235-րդ հոդվածներով հարուցված քրգործի նախաքննությունը, որի ներկա փուլում ընդհանուր առմամբ որպես մեղադրյալ ներգրավված է 62 անձ: