Կառավարությունը «գոլդի» տակ մնաց

Բոլորը թերահավատ էին, կասկածանքով էին վերաբերվում, ասում էին՝ նոր վարչապետ Կարեն Կարապետյանից Պողոս-Պետրոս դուրս չի գա: Սրտի թրթիռով սպասում էին, որ գործադիրի ղեկավարը, բացի խոստումներից ու ցանկություններից, գոնե մի տեսանելի, շոշափելի գործ կատարի: Ու ահա վերջապես վրա հասավ այդ բաղձալի պահը: Հիմա արդեն վարչապետի երկրպագուները կարող են հաղթականորեն շեշտել. «Տեսա՞ք, որ ասում էինք, իսկ դուք չէիք հավատում»:

Այո, փաստն աչքի առաջ է: Կառավարության նիստում որոշում է ընդունվել ավտոմեքենաների, այսպես կոչված, «Գոլդ» համարանիշերի նախկինում սահմանված բարձր արժեքները նվազեցնելու վերաբերյալ: Եվ այս պատմական որոշման ներքո վարչապետի ստորագրությունն է:

Ներկայումս «Գոլդ» համարանիշերի տրամադրման համար սահմանված են 150 հազար, 600 հազար, 1 մլն 500 հազար, 3 մլն և 8 մլն դրամ արժեքներ: Նման համարանիշերը, որպես կանոն, վաճառվում են աճուրդով, իսկ գոյացած գումարները համալրում են «Ճանապարհային ոuտիկանություն» ծառայության արտաբյուջետային ֆոնդը: Բայց արի ու տես, որ վերջին շրջանում այս թանկարժեք համարանիշերն այլևս պահանջարկ չունեն, և ճանապարհային ոստիկանությունն այլևս չի կարողանում դրանց վաճառքի հաշվին արտաբյուջե համալրել: «Ներկայումս 150 հազար, 600 հազար, 1 մլն 500 հազար, 3 մլն և 8 մլն դրամ արժեք ունեցող շատ համարանիշեր վճարի բարձր չափի պատճառով պահանջարկ չունեն և չեն իրացվում, իսկ վճարների չափի գործող սահմանումները հնարավորություն չեն տալիս համարժեք նվազեցնել դրանց վճարների չափերը»,- նշվում է որոշման նախագծի հիմնավորման մեջ:

Որքան էլ ուզում եք՝ գլուխ կոտրեք, չեք կարողանա գտնել Կարեն Կարապետյանի մեկ այլ որոշում, որն արդեն կիրառվում է: Սա միակն է՝ ստորագրման պահից ուժի մեջ է: Այսինքն, մեր վարչապետից բավականին ժամանակ պահանջվեց, մինչև նա կարողացավ խոսքից գործի անցնել: Իսկ գործն էլ, ինչպես տեսնում եք, ամենահրատապն էր: Հիմա երկրի բնակչությանը հենց միայն «գոլդ» համարներն էին հետաքրքրում, հացից ավելի մեծ պահանջարկ ունեին:

shame.am