Փող վերցնելու ավանդույթը վերադառնու՞մ է

Վերջերս գրվել էր այն մասին, որ ճանապարհային ոստիկանության աշխատակիցների շրջանում դժգոհություն կա, նրանց այլևս չի բավարարում իրենց աշխատանքը, քանի որ «շահ» չունեն: Հետո նույնիսկ գրվեց այն մասին, որ ՃՈ համակարգից դուրս եկողների հոսք է նշմարվում: Եվ ահա, մի զարմանալի զուգադիպությամբ այսօր ոստիկանությունը քաղաքացիներին հայտնում է այն մասին, որ ՃՈ անձնակազմի հանդերձավորումը դյուրակիր տեսախցիկներով իրականացվել է ողջ ծավալով, և ծառայության ընթացքում բոլոր ճանապարհային ոստիկաններն արդեն համազգեստի վրա այդպիսի տեսախցիկ են կրում:

Հետո գալիս է ավելի հետաքրքիր հատվածը: Պարզվում է, որ այս տեխնիկական հագեցումն արդեն թույլ է տալիս տեղում տուգանել ճանապարհային երթևեկության կանոնները խախտած վարորդներին, որովհետև, ինչպես նրանք են ասում, դա «ժամանակին կասեցվել էր՝ կոռուպցիոն ռիսկերից խուսափելու նկատառումով»: Ստացվում է, որ ՃՈ ներկայացուցիչները հին, բարի ժամանակների պես կարող են փող վերցնել, ուրեմն ոլորտը կրկին դառնում է գայթակղիչ ու շահավետ:

Հիմա կասեք՝ ողջ գործընթացը տեսաձայնագրվում է, ոստիկանը կարող է իրավախախտումն արձանագրելուց հետո տեղում գանձել նշանակված տուգանքը, բայց չի կարող դա գրպանել: Համաձայն ենք: Սակայն ինչեր ասես, որ չի անի մարդկային հնարամիտ միտքը, եթե միայն դրա անհրաժեշտությունը ներկայանա: Ու հենց այստեղ էլ ուզում ենք ուշադրություն հրավիրել այն փաստի վրա, որ դյուրակիր խցիկներով արված տեսաձայնագրությունը պահպանվելու է ընդամենը 48 ժամ: Կլրանա 2 օրը, ձայնագրությունը կջնջվի, և դրանից հետո ո՞վ կարող է ապացուցել, որ ինչ-որ մեկն ինչ-որ մեկից գումար է գանձել:

shame.am