Նոր մանրամասներ 22-ամյա երիտասարդին սպանած տնօրենի գործից

«Պատանի լրագրողների» դպրոցում սպանված 22-ամյա Լեւոն Սահակյանի գործով մեղադրյալ Վահան Ղազարյանը Լեւոնին դանակահարելուց հետո սպառնացել է նաեւ հրազենով։ Այս մասին NEWS.am-ը տեղեկանում է իր աղբյուրից: Ապանված երիտասարդն ու քրեական գործով մեղադրյալը պայմանավորվածություն են ձեռք բերել, որ Լեւոնի նշանածի աշխատավարձը դպրոցի տնօրենը վճարելու է հոկտեմբերին 20-ին, սակայն, Վահան Ղազարյանը Լեւոնին հոկտեմբերի 19-ի երեկոյան կանչել է դպրոց՝ ասելով, որ գումարը տալու է: Վահան Ղազարյանն իր աշխատասենյակում ասել է՝ պարտքեր ունի եւ չի կարող տալ գումարը, Լեւոնն էլ պայմանավորվածության մասին է հիշեցրել, որից հետո վիճաբանություն, քաշքշուկ է սկսվել նրանց միջեւ: Այդ ընթացքում էլ Վահան Ղազարյանը դանակահարել է Լեւոնին: Լեւոնը մենակ չի եղել, նա ընկերոջ հետ շտապել է նստել մեքենա՝ մոտակա հիվանդանոց հասնելու համար եւ երբ նրանք մեքենայում են եղել Վահան Ղազարյանը հրազենով դուրս է եկել, որը պահելով Լեւոնի ուղղությամբ՝ սպառնացել է նրան: Երիտասարդները կարողացել են հեռանալ: Որից հետո Լեւոնը զանգել է բժիշկ հորը, որը խորհուրդ է տվել արագ հասնել մոտակա հիվանդանոց: Սրտի եւ թոքի վնասվածքներ ստացած Լեւոնն ինքն է վարել մեքենան, «Արմենիա» բժշկական կենտրոն հասնելուց հետո նա ուժասպառ է եղել եւ ուշաթափվել է:

Լեւոնը հիվանդանոցում երկու օր մնալուց հետո՝ մահացել է:

Ավելի վաղ տեղեկացրել էինք, որ հոկտեմբերի 19-ի երեկոյան «Պատանի լրագրողների» դպրոցի տնօրեն Վահան Ղազարյանի եւ Լեւոն Սահակյանի միջեւ վիճաբանությունն սկսվել էր Լեւոնի նշանածի աշխատավարձը չվճարելու պատճառով: Լեւոնի նշանածը՝ Սեւան քաղաքի բնակչուհի Արեգնազը, աշխատելիս է եղել Վահան Ղազարյանի մոտ, որը նրա աշխատավարձը չէր վճարել: Այդ օրը Վահան Ղազարյանը 22-ամյա երիտասարդին զանգել եւ կանչել է դպրոց՝ նշանածի աշխատավարձը տալու համար, սակայն, նրանց միջեւ վիճաբանություն է սկսվել, որից հետո սրտի եւ թոքի վնասվածքներով Լեւոնը տեղափոխվել է հիվանդանոց, որտեղ երկու օր անց մահացել է:

Վահան Ղազարյանը կալանավորված է: