Բռնցքամարտիկները շարունակում են բողոքել

Այսօր բռնցքամարտիկներն իրենց հերթական ակցիան էին կազմակերպել ՀՀ սպորտի և երիտասարդության հարցերի նախարարության շենքի մոտ: Նրանք պաստառներ բռնած փակեցին մայրաքաղաքի Աբովյան փողոցը՝ պահանջելով նախարար Գաբրիել Ղազարյանի հետ հանդիպում: Նախախարն ամիջապես արձագանքեց ակցիայի մասնակիցների պահանջին և մոտեցավ նրանց: Նա նշեց, որ ինքը թեև տեղյակ է Բռնցքամարտի ֆեդերացիայի շուրջ ծավալվող իրադարձություններին, սակայն չգիտեր, որ բռնցքամարտիկները որոշել էին նման ակցիա կազմակերպել:

Գ.Ղազարյանը նշեց, որ առկա խնդիրները պետք է լուծել, սակայն իր համար ընդունելի չեն պայքարի նման տարբերակները: «Չի կարելի քաղաքի բնականոն երթևեկությունը խաթարել: Խնդիրները պետք է լուծենք կլոր սեղանի շուրջ նստելով և խաղաղ ճանապարհով: Ես պատրաստ եմ հենց հիմա լսել ձեր բողոքը»,- ասաց նախախարը: Նախարար Ղազարյանը նշեց նաև, որ հակամարտություններով որևէ հարց լուծել հնարավոր չէ: Ուստի հարկավոր է համերաշխ մթնոլորտ ձևավորել և համատեղ գտնել բոլոր հարցի լուծումները:

Բռնցքամարտիկները, տեղում ձևակերպելով իրենց պահանջը, նշեցին, որ իրենք առաջարկում են ֆեդերացիայի նախորդ ընտրությունները չեղարկել և փակ գաղտնի քվեարկությամբ նոր ընտրություններ անցկացնել: Մարզիկներն ու մարզիչները պահանջում էին նաև ամեն ջանք գործադրվի, որպեսզի հայկական բռնցքամարտի հին ավանդույթները շարունակվեն: Մասնակիցները, համաձայնելով նախարարի առաջարկին, հույս հայտնեցին, որ ֆեդերացիայի շուրջ ձևավորված այս գորդյան հանգույցի վերածված հարցը մոտ ապագայում կստանա իր լուծումը, և հայկական բռնցքամարտը կշարունակի նախկինի պես զարգացում ապրել: