«Դու ինձ մի ասա՝ ես ինչ անեմ»

shame.am-ը գրում է․

«Մայրերի ու աղջիկների» մաֆիայի մասին վարչապետ Կարեն Կարապետյանի արտահայտությունն ու հանձնարարականը կարծես թե այնքան պարզ ու հասկանալի էր, որ նույնիսկ քննարկելու կամ մեկնաբանելու անհրաժեշտություն էլ չկա: Բայց արի ու տես՝ ոչ բոլորի համար: Օրինակ, ԱԺ աշխատակազմի ղեկավար Հրայր Թովմասյանը հակված է ոչ միայն դա չհասկանալ, այլև չընդունել: Բայց չհասկանալն ու չընդունելն այս դեպքում հասկացողության ու համաձայնության հետ կապ չունեն: Պարզապես Թովմասյանը չի ցանկանում ինքն իրեն հարվածել, դրա համար էլ ոչ թե երևույթն է ընկալում, այլ անմիջապես կառչում է օրենքի տառից. «Բարեկամների աշխատանքը նույն հիմնարկում բացառելու առթիվ վարչապետ Կարեն Կարապետյանի հանձնարարականը չի կարող վերաբերել Աժ-ին, քանի որ վարչապետը չի կարող ԱԺ-ին հանձնարարական տալ»,- հայտարարում է նա՝ փաստացի վարչապետին ասելով. «Դու ինձ մի ասա, թե ես ինչ պիտի անեմ»:

Լավ, ասենք վարչապետի ուժը Հրայր Թովմասյանի վրա չի պատում: Իսկ ազնվություն ու արդարություն բառերը գոնե լսե՞լ է: Ով՝ ով, սակայն Թովմասյանը հրաշալի գիտի, թե ինչ է կատարվում խորհրդարանում, ու քանի ձրիակեր ազգական է այդ տանիքի տակ ապահովություն գտել: Այդ պատճառով էլ, վտանգի հոտն առած, մի կողմ է քաշվում՝ խոսքը կտուրը գցելով ու շտապ-շտապ տեղեկացնելով, թե վերջին 2 տարում կրճատվել է ԱԺ 40-50 աշխատակից, մինչև տարվա վերջ ևս պայմանագրային աշխատակիցներ կկրճատվեն: Բայց թե սա ինչ կապ ունի «մայրեր ու աղջիկներ» մաֆիայի հետ, ոչ ոք չգիտի: Մանավանդ որ մի ձեռքը եթե կրճատում է, մյուսն արագորեն հավելում է: Օրինակ, հիմա էլ 12 միլիոն դրամ կպահանջվի ԱԺ նախագահի ևս մեկ տեղակալին աշխատավարձ տրամադրելու համար: Իսկ հենց հարցնում են, թե ԱԺ կրճատված աշխատակիցների կազմում կա արդյոք մեկ պատգամավորի կամ պաշտոնյայի զավակ, Թովմասյանը նախընտրում է համառ լռություն պահպանել: Ի՞նչ պատասխանի: 50-ի անունն էլ հո չի՞ թվարկելու: