Լույս է ընծայվել արդարադատության գեներալ-լեյտենանտ Անատոլի Ավագյանի «Իմաստության ոսկե հանրագիտարան» գիրքը (տեսանյութ)

lurer.com
Հոկտեմբերի 29-ին Ազգային գրադարանի հյուրասրահը մարդաշատ էր. մեծապատիվ ընկերները, հարազատները, գրչակիցները եկել էին շնորհավորելու արդարադատության գեներալ-լեյտենանտ Անատոլի Ավագյանին իր նոր՝ «Իմաստության ոսկե հանրագիտարան» գրքի շնորհանդեսի կապակցությամբ:

Գրքում մեկտեղված են հայ և համաշխարհային հայտնի մտավորականների, գրողների ու փիլիսոփաների իմաստուն խոսքերը, աֆորիզմները, ինչպես նաև նրանց կյանքի հետաքրքիր դրվագները:

Դեռևս դպրոցական տարիքից Անատոլի Ավագյանը հետաքրքրություն է ունեցել առ աֆորիզմներ, տարատեսակ գրքեր կարդալիս դուրս է բերել հետաքրքիր մտքերը, հավաքել և վերջապես որոշում կայացրել՝ տպագրել գրքի տեսքով։

«Գրքի ինքնատիպությունն այն է, որ թե′ բովանդակությամբ, թե′ ձևով, թե′ կառուցվածքով էապես տարբերվում է մինչև հիմա հրատարակված գրքերից։ Այդ առումով նաև անհատականացվում է գիրքը: Սա իսկապես քրտնաջան աշխատանքի շնորհիվ ծնված գիրք է»,- նման բնորոշում տվեց «Իմաստության ոսկե հանրագիտարան»-ին հեղինակը՝ Անատոլի Ավագյանը:

Շնորհանդեսին ներկա էր հեղինակի եղբայրը՝ բժիշկ Վալերի Ավագյանը, ով հակիրճ, բայց լավագույնս բնորոշեց եղբոր աշխատանքը. «Դա գիրք չէ, դա իմաստության գանձարան է»։ Որդին՝ Էդմոն Ավագյանը, խոսելով գրքի մասին, մեծապես կարևորեց տեղի ունեցած իրադարձությունը և նշեց հետևյալը. «Ճանաչելով հորս վստահ էի՝ նրա մոտ կստացվեր նման արժեքավոր աշխատանք իրականացնել և ներկայացնել հանրության դատին»:

Շնորհանդեսին ներկա էր նաև Հանրային ծառայությունները կարգավորող հանձնաժողովի նախագահ Ռոբերտ Նազարյանը, ով հարցազրույցից առաջ կատակեց՝ «սակագներից չեք հարցնում չէ՞», այնուհետև նկարագրեց իր շուրջ 30 տարվա լավագույն ընկերոջը. «Անատոլին իմ լավ ընկերն է, իմ լավ բարեկամն է: Ինձ հաճելիորեն զարմացրեց նման գիրք ստեղծելու իր նախաձեռնությունը, մասնավորապես, այս գիրքը հետաքրքիր ու ուսանելի կլինի երիտասարդների համար: Անատոլի Ավագյանի ապրած կյանքը լավագույն աֆորիզմն է, քանի որ նա ոչ միայն լավ ծնողների լավ զավակ է, ամուսին, հայր, այլ նաև շատ լավ ընկեր է: Հիշում եմ Անատոլիի ընկերության մասին կարգախոսներից մեկը՝ «Ընկերությունը նման է մի առարկայի, որից պետք է ամեն օր քննություն հանձնես ու դրական գնահատական ստանաս: Հակառակ դեպքում՝ այդ օրվանից ընկերությունը փլուզվում է»»:

Իր ընկերոջը՝ Անատոլի Ավագյանին եկել էր շնորհավորելու նաև տ.գ.թ., պրոֆեսոր, ՀՀ ֆինանսների և էկոնոմիկայի նախկին նախարար Էդվարդ Սանդոյանը, ով մեզ հետ զրույցում բացի հեղինակից նաև շնորհավորեց հասարակությանը նման գիրք ունենալու հնարավորության համար.

«Այն անհրաժեշտ է, թե′ ավագ սերնդի և, թե′ երիտասարդ սերնդի համար, որովհետև ստեղծվեց մի հավաքածու, որն ընթերցողի մոտ իբրև ուղեցույց կարող է հանդիսանալ մեծանուն ստեղծագործողների աշխատանքների ընտրության հարցում: Այստեղ ամփոփված են տարբեր հեղինակների մտքեր, բայց, ըստ էության, կա Անատոլի Ավագյանի ճաշակի, իր անցած ուղու, կյանքի փորձի ազդեցությունը: Այս բոլոր աֆորիզմները ծաղկաքաղ են այն հարուստ մտքի, որի միջոցով դարավոր իմաստությունը փոխանցվում է սերնդեսերունդ»:

Նշենք նաև, որ ժանրի առումով սա հեղինակի առաջին գիրքն է, բայց իր կյանքի ընթացքում հեղինակել է մասնագիտական 3 գիրք. 1984 թվականին հայերեն հրատարակել է «Քաղաքացիների անձնական սեփականության դեմ ուղղված հանցագործություններ» և ռուսերեն «Քաղաքացիների անձնական գույքի գողության քրեաիրավական և սոցիոլոգական բնութագիրը» մենագրությունները, ինչպես նաև հայրենական իրավաբանական գրականության մեջ առաջին անգամ 2005 թվականին հրատարակել է կատարողական վարույթին նվիրված «Կատարողական իրավունքի ձևավորման և զարգացման տեսական-կիրառական հիմնախնդիրները Հայաստանի Հանրապետությունում» ծավալուն աշխատությունը, որը ներկայացվել է, որպես դոկտորական ատենախոսություն:

2003 թվականին ծառայության կայացման գործում ներդրած նշանակալի ավանդի համար պարգևատրել է ՀՀ նախագահի շնորհակալագրով: 2005թ. հարկադիր կատարման ծառայության համակարգի կազմակերպման գործում ունեցած անձնական մեծ ավանդի համար ՀՀ վարչապետի որոշմամբ պարգևատրվել է անվանական զենքով: Պարգևատրվել է մի շարք այլ մեդալներով:

Անատոլի Ավագյանը՝ որպես հիմնադիր, մեծ ներդում ունի ԴԱՀԿ ծառայության կազմավորման և կայացման գործում: Այդ տարիների ԴԱՀԿ ծառայության առաջընթացը, կայացումը, ոլորտի ուժեղացումն ու դերի բարձրացումը մեծամասամբ կապված է նրա անվան հետ: Նա այդ համակարգի տարեգիրն է:

2007թ. ազատվել է ՀՀ գլխավոր հարկադիր կատարողի պաշտոնից և նշանակվել Երևանի քաղաքապետի գլխավոր խորհրդական:

2008թ․-ից «Գազպրոմ Արմենիա» ՓԲԸ կադրերի վարչության պետն է:

Անատոլի Ավագյանն ընդգրկված է նաև «1000 հայազգի գեներալներ» կենսագրական հանրագիտարանում: