Անցում դեպի մարդկանց կարիքների գնահատում, հասցեական աջակցություն. Հայաստանը սոցիալական աշխատանքի մեջ թևակոխել է շրջադարձային փուլ

ԵՐԵՎԱՆ, 3 ՆՈՅԵՄԲԵՐԻ, ԱՐՄԵՆՊՐԵՍ: Լինել համբերատար, պատրաստակամ, անքննադատ շահառուի նկատմամբ, ունենալ լսելու ունակություն. Սոցիալական աշխատողը պետք է օժտված լինի այս և այլ հատկանիշներով: Սոցիալական աշխատող, ՀՕՖ-ի Բերդի գրասենյակի ղեկավար Վալյա Ապրեսյանն արդեն 5 տարի է իր գործունեությունն է ծավալում սոցիալական ոլորտում: Աշխատում է կյանքի դժվարին իրավիճակներում հայտնված մարդկանց հետ, փորձում նրանց օգնել դուրս գալու այդ վիճակից:

«Օգնել չի նշանակում տալ նյութական աջակցություն: Երբ աշխատեցինք դժվարին իրավիճակում հայտնված մարդկանց հետ, հասկացանք, որ ոչ բոլորն են դիմակայուն, նրանք հուսահատության մեջ են: Հետևաբար` նյութական օգնությունը չի կարող իր ցանկալի արդյունքը տալ, եթե այն չուղղորդվի մասնագիտական աշխատանքով»,-«Արմենպրես»-ի մամուլի սրահում հրավիրված ասուլիսում ասաց Վալյա Ապրեսյանը:

Հայաստանում կա 4 հազար սոցիալական աշխատող: Հայաստանի սոցիալական աշխատողների ասոցիացիայի նախագահ Միրա Անտոնյանը նշեց, որ Հայաստանը սոցիալական աշխատանքի, հարցերի կարգավորման իր մտադրությունների մեջ թևակոխել է շրջադարձային փուլ:

«Նոր փուլում փորձ է արվում անցում կատարել բաշխողական համակարգից, աղքատների մեջ առավել աղքատներին գտնելու մոտեցումներից դեպի ավելի համընդհանուր գնահատում, մարդկանց ռեսուրսների քաջալերում ու գնահատում: Սոցիալական աշխատողի դերը մեծ է այս գործընթացում, սակայն լուրջ անելիք ունի նաև հասարակությունը, լրատվամիջոցները: Երբ անցնում եք փողոցով ու գումար եք տալիս երեխան գիրկը մուրացող կնոջը, հիշեք, այդ մի քանի դրամով դուք ապահովում եք կնոջ վաղվա ներկայությունը փողոցում: Դրա փոխարեն, եթե դուք զանգահարում ենք համապատասխան մարմիններին ու մասնագետները գալիս են աշխատում են այդ կնոջ հետ, դա է ճիշտ մոտեցումը»,-ասաց Միրա Անտոնյանը: Ինչ վերաբերում է լրատվամիջոցներին, ապա Միրա Անտոնյանը ճիշտ չի համարում այն մոտեցումը, երբ դժվարին իրավիճակում հայտնված ընտանիքին տալիս են նյութական աջակցություն, մի քանի տուփ հյութ, մաքրող հեղուկ, քաղցրավենիք և դա անընդհատ եթերով ներկայացնում են, ընտանիքին էլ ստիպելով, որ մի քանի անգամ ասի շնորհակալություն:

«Դա անընդունելի է, երբ այդ հյութերը, քաղցրավենիքը սպառվի, ի՞նչ է լինելու այդ ընտանիքի հետ: Դրա համար մասնագետները պետք է աշխատեն, որ դժվարին իրավիճակում հայտնված մարդիկ վերագտնեն իրենց, հավատան իրենց ուժերին»,-հավելեց Միրա Անտոնյանը:

ՀՀ աշխատանքի և սոցիալական հարցերի նախարարության Սոցիալական աջակցության վարչության պետ Աստղիկ Մինասյանի խոսքով, սոցիալական համակարգի համար տարին հոբելյանական է:

«1918 թվականին այս օրը հիմնվել է Հանրային խնամատարության նախարարությունը, որն այժմ Աշխատանքի և սոցիալական հարցերի նախարարությունն է: 25 տարի առաջ սեպտեմբեր ամսին հիմնվել է սոցիալական ծառայությունների համակարգը: Ինչպես տեսնում եք ամենածանր տարիներին հիմնվեց սոցիալական ծառայությունների համակարգը»,-ասաց Աստղիկ Մինասյանը:

ԵՊՀ Սոցիոլոգիայի ֆակուլտետի դեկանի տեղակալ Անահիտ Սահակյանը նշեց, որ 1996 թվականից Հայաստանում սոցիալական աշխատողները հնարավորություն ունեն ստանալու բարձրագույն մասնագիտական կրթություն:

«Առաջինն այդ գծով բարձրագույն կրթություն ստանալն ապահովել է ԵՊՀ-ի սոցիոլոգիայի ֆակուլտետը: Այսօր արդեն 5 պետական համալսարաններ սոցիալական աշխատանքի մասնագետներ են պատրաստում: Անշուշտ, կա անհրաժեշտություն պրակտիկայի, բարձրագույն կրթության ներդաշնակեցման, նորավարների այդ պրակտիկայում ադապտացնելու: ԵՊՀ-ն տարեկան 120 շրջանավարտ է ունենում այդ գծով»,-հավելեց Անահիտ Սահակյանը: