Մկրտիչ Մինասյան. «Ես կողմ եմ արմատական, կոպիտ լուծմանը՝ ապօրինի շինությունները պետք է քանդել, թույլ չտալ»
ՀասարակությունԵրևանի քաղաքապետարանի կողմից Նոր Նորք վարչական շրջանում համայնքային սեփականություն հանդիսացող տարածքում կառուցված շինությունն ապամոնտաժելու գործընթացն արժանացավ մի շարք քննարկումների: Ընտրված միջոցը դրական գնահատողների կողքին կային նաև դիրքորոշումներ առ այն, որ երևույթը այլ կողմ ևս ունի՝ կառուցապատողը, այնուամենայնիվ, գումար է ծախսել:
Ճարտարապետների միության նախագահ Մկրտիչ Մինասյանը այն քաղաքացիների շարքում է, որոնք ճիշտ են որակում քաղաքապետարանի ընտրած քաղաքականությունը:
«Ի՞նչ է նշանակում ապօրինություն: Այդ բառն արդեն ամեն ինչ ասում է: Դա նշանակում է, որ հասարակական, չթույլատրվող տեղերում և կանաչ տարածքներում կառուցվող օբյեկտները հնարավոր է ինչ–որ թույլտվություններ են ստացել, բայց ստացել են զարտուղի ճանապարհներով: Մենք երկար տարիներ է, ինչ ասում ենք, որ ապօրինի կառույցներն անթույլատրելի են: Կլինեն դրանք հասարակական տարածքների վրա, թե կլինեն կցակառույցներ, ձեղնահարկի անվան տակ կառուցված հարկեր, անթույլատրելի են»,–Newsarm.am-ի հետ զրույցում ասաց ճարտարապետը՝ ընդգծելով, որ այսքան տարի հետո առաջին անգամ է, որ քաղաքային իշխանության որոշմամբ նման կերպ ապօրինի շինություն է քանդվում:
«Առաջին անգամ է, որովհետև նախկինում թաքնվում էին «հայը տուն քանդող չի» ձևակերպման հետևում: Եվ դա ենթադրում էր հետևյալը. կա թողտվություն, և եթե ինչ–որ բան սարքված է, չի կարելի քանդել, որովհետև ինչ–որ մեկը փող է ծախսել դա սարքելու համար: Իսկ եթե չի՞ կարելի սարքել, կարելի՞ է արդյոք մի բնակարան սարքելու թույլտվություն ստանալու համար վտանգի տակ դնել շենքի ողջ բնակչությանը: Սա կոչվում է լավ բա՞ն: Իհարկե՝ ո՛չ: Պետք է քանդել: Պետք է թույլ չտալ: Պետք է այսպիսի՝ թեկուզև մի քիչ կոպիտ ուժով բոլորին բացատրել... Սա դաս կլինի, և կստիպի հասկանալ, որ այլևս չեն կարողանալու նման բաներ անել: Եթե իմանան, որ սա անընդհատ կրկնվող գործողություն է լինելու, և քաղաքային իշխանությունը հետևողական է լինելու, կզսպվեն: Երևի, ի վերջո, կհասկանան, որ չի կարելի անօրինական, կասկածելի փաստաթղթերով շինարարություն իրականացնել»,–ասաց մեր զրուցակիցը՝ շեշտելով, որ թույլտվությունների փաստաթղթերը, ստորագրությունները ևս պետք է հստակ ուսումնասիրության առարկա դառնան:
«Երբեմն շենքեր եմ տեսնում, որոնք չափազանց գեղեցիկ են, բայց դրանց կողքին այնպիսի կցակառույցներ են, որոնք իսկապես պետք է քանդել: Այստեղ երկու կարծիք չի կարող լինել: Վերջը պետք է գա՞նք օրենքը հարգելու կարգավիճակի, թե՞ չէ: Մենք ոչ մի բանի չենք հասնի, եթե հաշվի առնենք ընկերական կամ որևիցե մեկի գումարային շահերը: Մենք կարևոր քաղաքաշինական նորմեր ենք խախտում, և նման բաներով ոչ ասում մարդկանց անվտանգությանը: Տեսեք, թե այգիներում ի՞նչ է կատարվում: Թույլ են տվել 20 քմ, բայց գրավել են մի ամբողջ 1000 քմ, ո՞նց կարելի է այդպիսի բան անել, ի՞նչ ուժով: Դուք տեսեք, թե ինչ է կատարվում մեր «Հաղթանակ» զբոսայգում: Այգին մեր զոհերի հիշատակին է կառուցվել, բայց այն բզկտեցին: Մնացած բոլոր զբոսայգիներն էլ են նույն վիճակում, բայց սևեռվեցի «Հաղթանակ» զբոսայգու վրա, որովհետև կան բաներ, որոնց ընդհանրապես չի կարելի մոտենալ ու ձեռք տալ»,–նշեց Մ. Մինասյանը՝ նկատելով, որ այս ամբողջն իմի բերելը շատ ծանր աշխատանք է ենթադրում:
«Ինչպես ասում են՝ հեշտ է քարը գցել հորի մեջ, բայց այն հանելն է շատ դժվար: Մենք թաղամասեր ունենք, որտեղ այնքան կցակառույցներ են սարքվել, որ նույնիսկ հրշեջ մեքենան չի կարող մտնել այդ բակեր: Ինչպե՞ս կարելի է նման բան թույլ տալ: Մենք օրենք չսիրող ժողովուրդ ենք: Ես կողմ եմ կոպիտ լուծմանը, որովհետև մեկը չէ, երկուսը չէ: Գումար են ծախսել՝ շատ լավ իմանալով, որ սխալ բան են անում: Հասարակական տարածքների վրա կառուցված սրճարանները, այգիների ու բակերի մեջ ավելացրած քառակուսի մետրերից պետք է ազատվել: Վերջին հաշվով, այդ տարածքները որևիցե մեկի սեփականությունը չեն: Գիտեմ, թե սեփականության թուղթն ինչ ճանապարհներով են հանել... Պետք է քանդել, ես կողմ եմ դրան, ես կողմ եմ այդպիսի արմատական լուծմանը... Միայն ու միայն օրենքով պետք է շարժվել: Քաղաքապետարանի ճարտարապետական, ինչպես նաև քաղաքաշինության վարչությունը որևէ մեկի քմահաճույքը չպետք է դիտարկի: Կան օրենքով թույլատրելի նորմեր, եթե հնարավոր է ինչ–որ բան սարքել, ուրեմն՝ այդ պատասխանատվությունը կրում է նաև այն մարդը, ով ստորագրում է: Չկա համապատասխան օրենք, նորմ, ուրեմն՝ չպետք է թույլ տալ: Իսկ ովքեր օրենք են խախտում, պետք է պատժվեն»,–ընդգծեց մեր զրուցակիցը:
Մկրտիչ Մինասյանը շեշտեց նաև, որ շատ ուշադիր պետք է լինել թույլտվություններ ստորագրելու ժամանակ ներկայացված նախագծերին:
«Երբեմն ներկայացվում են նախագծեր, որոնք հետո բոլորովին ուրիշ ծավալներով ու ամբողջովին այլ տեսք են ստանում: Նաև այլ կոնստրուկցիաներով են իրականացվում և վտանգում ոչ միայն իրենց, այլև մյուս բնակիչներին: Տեսեք, թե մեր մայթերն ինչ են դարձել: Մենք, փաստորեն, մեծ հաշվով մայթ չունենք: Որոշ տեղեր կան, բայց մայթ ասված գաղափարն ընդհանրապես վերացել է»,–եզրափակեց ճարտարապետը:
1
2
3
4
5
1
2
4
5
2
4
