Պուտինի «հերթապահ» ասուլիսը

ՌԴ նախագահը 14-րդ անգամ անցկացրեց ամենամյա մեծ մամլո ասուլիսը և 3 ժամ 45 րոպեում պատասխանեց 61 հարցի: Նա խոսեց Կերչի նեղուցի միջադեպի ու ուկրաինացի նավաստիների, ուկրաինական եկեղեցու, Փոքր ու միջին հեռահարության հրթիռների արգելման պայմանագրից ԱՄՆ-ի դուրս գալու ծրագրերի և Եվրոպայում ԱՄՆ հրթիռների տեղակայման, Սիրիայից ԱՄՆ զոորքերի դուրսբերման, Մարիա Բուտինայի, տնտեսության ստագնացիայի ու Կուդրինի, ռեպերների, կենսաթոշակային բարեփոխման և տասնյակ այլ հարցերի մասին: Ընդհանուր գնահատականով` ՌԴ նախագահը կրկնել է այն տեսակետները, որ տարբեր առիթներով ներկայացրել է և նոր ոչինչ ասուլիսում չի ասվել, որ կարող էր առանցքային նշանակություն ունենալ արտաքին կամ ներքին քաղաքականության մեջ:

Տարեցտարի Պուտինը հրավիրում է լրագողներին, որ նրանք իրեն ճիշտ թեզիսներ հրամցնեն: Նա ներկայանում է մտահոգ ու վճռական քաղաքական գործիչ: Բայց Ռուսաստանի իրավիճակի հետ դա որևէ առնչություն չունի:

Այդ մեծ իրադարձությանը հեռուստաալիքները մի քանի օր նախապատրաստում են ռուսաստանցիներին, ասուլիսը պետք է խորհրդանշի բացությունն ու թափանցիկությունը և ցույց տա մարդկանց, նախևառաջ աղքատ շրջանների, որ իրենց խնդիրներին էլ ուշադրություն է դարձվում, համենայն դեպս` մի քանի ժամ: Բայց բոլոր հարցերը, անկախ իրենց բովանդակությունից, ընդամենը թեզիսներ ու պատրաստի կարծրատիպեր են, որ նախագահին հնարավորություն են տալիս ներկայանալ բարի, հասկացող, իր ժողովրդին սիրող, խնդիրներ լուծող ղեկավարի դերում: Լրացուցիչ հարց տալն անհնար է:

Նրա տեսակենտը մնում է անառարկելի: Պետական հեռուստաալիքի լրագրողներից մեկը ասուլիսում մեջբերեց Ալեքսանդր Կուդրինի տեսակետը ՌԴ տնտեսության թույլ զարգացածության մասին, ի պատասխան Պուտինը ժպիտով ասաց, որ Կուդրինը լավ փորձագետ է ու ինքը հաճախ է լսում նրա կարծիքը: Դա պետք է ցույց տար, որ Պուտինն ընդունում է քննադատությունը: Բայց դրան ոչինչ չի հետևում` նա, ինչպես անցած տարիներին, կրկնում է, որ անհրաժեշտ է փոխել տնտեսության կառուցվածքը, որ համարյա ամբողջությամբ հենված է արտահանման վրա, այդ պատճառով, իր խոսքով, կատարվում են մասշատաբային ներդրումներ թվային տեխոնոլգիաներում ու ռոբոտաշինության մեջ: Այդ պահին դահլիճում գտնվողները հավանաբար հիշեցին վերջերս պետական հեռուստատեսության ռեպորտաժներից մեկում ցուցադրված ռոբոտին, որ իրականում ռոբոտի հանդերձանքով մարդ էր:

Արտաքին քաղաքական համարյա բոլոր թեմաները Պուտինն օգտագործեց Արևմուտքին ռուսաֆոբիայի մեջ մեղադրելու համար, իսկ պատժամիջոցներից, նրա խոսքով, Ռուսաստանը հեշտությամբ է գլուխ հանում` գյուղատնտեսությունը, օրինակ, ծաղկում է ապրում: Դա Պուտինի սիրած փաստարկն է պատժամիջոցներին վերաբերող հարցերում, որ իրականում զգալի հարվածում են ռուսական տնտեսությանը: Ի պատասխան եվրոպական պատժամիջոցների` Ռուսաստանն արգելել է արևմտյան մի քանի երկրներից ապրանքների ներկրումը և հիմա ստիպված է ավելի շատ արտադրել, որ հանգեցրել է ապրանքների որակի կտրուկ անկմանը, հատկապես ոչ շատ թանկ:

Միջուկային պատերազմի վտանգի մասին Պուտինը մեղմ արտահայտվեց, թեպետ վերջերս բոլորովին այլ տոնով էր խոսում: Միջուկային զենքի օգտագործման հանդեպ իռացիոնալ վախի պահպանումը ՌԴ գլխավոր խնդիրն է` կոնվենցիոնալ պատերազմում Ռուսաաստանը շատ ավելի թույլ է Արևմուտքից: Ռեգիոնների վերաբերյալ հարց ու պատասխանի սխեման նույնն է` լրագրողը պատմում է խնդիրը, Պուտինը նշումներ է անում ու խոստանում ամեն ինչ պարզել և օգնել: Խաբուսիկ հավատը, որ օգնությունը կգա, երբ Պուտինը վերջապես ամեն ինչ իմանա, նրա աջակցության գլխավոր հենասյուններից մեկն է բնակչության շրջանում: