Ճաղավանդակը կոտրել էր ու թալանել առանձնատունը. Ոսկեղենը գրավադրել էր, օծանելիքը՝ վաճառել

Դեկտեմբերի 2-ին ոստիկանության Երեւան քաղաքի վարչության օպերատիվ կառավարման կենտրոնում գողության վերաբերյալ ահազանգ ստացվեց։ Քաղաքացին հայտնում էր, որ Պտղնի գյուղում գտնվող իր առանձնատնից գողություն են արել։

Տարածքային կարգով հաղորդումը փոխանցվեց ոստիկանության Կոտայքի բաժին։

Օպերատիվ խումբը շտապեց Պտղնի գյուղ։

Ոստիկանները տուժողից հաղորդում վերցրին։ Նա հայտնեց, որ գյուղի Ամառանոցային թաղամասի իրենց առանձնատանը վերջին անգամ եղել են նոյեմբերի 25-ին։ Դեկտեմբերի 2-ի ժամը 10-ին էին վերադարձել, երբ տունն արդեն թալանված էր։ Տուժողը հայտնեց նաեւ, որ 2-րդ հարկի պատշգամբի ճաղավանդակը կոտրած է եղել, իսկ դուռը՝ բաց։ Հավանաբար այդտեղից էլ մտել էին տուն։ Գողացել էին ոսկեղեն, նոութբուք, թանկարժեք օծանելիք ու կենցաղային իրեր։

Աբովյանի ոստիկանները ձեռնարկեցին ծավալուն օպերատիվ-հետախուզական միջոցառումներ՝ հանցագործությունը կատարած անձի, կամ անձանց ինքնությունը պարզելու եւ հայտնաբերելու ուղղությամբ։ Ցանկալի արդյունքն ուշանում էր։

Դեպքից շուրջ 15 օր անց՝ դեկտեմբերի 18-ին, ոստիկանության ՔՀԳ վարչությունում ստացված օպերատիվ տեղեկությունների հետեւողական ուսումնասիրության, ոստիկանության Կոտայքի մարզային վարչության եւ համանուն տարածքային բաժնի համագործակցության արդյունքում պարզվեց գողությունը կատարած հնարավոր անձի ինքությունը։ Երեւանում հաշվառված՝ 36-ամյա Տավրոս Ո.-ն էր, որը նույն օրը հայտնաբերվեց Արմավիրի մարզի Պտղունք գյուղում եւ գողություն կատարելու կասկածանքով բերման ենթարկվեց ոստիկանության Կոտայքի բաժին։

Ձեռնարկված միջոցառումներով հայտնաբերվեց գողոնի մի մասը։ Հայտնաբերվածը ոսկյա զարդերն էին, որոնք Տարոն Ո.-ն գրավադրել էր։ Պարզվել է նաեւ, որ գողացված օծանելիքը վաճառել է, նախնական տվյալներով՝ Վերնիսաժում։ Ձեռնարկվում են միջոցառումներ ողջ գողոնը հայտնաբերելու եւ տուժողին պատճառված վնասի ընդհանուր վնասը պարզելու ուղղությամբ։

Տավրոս Ոսկանյանը ձերբակալվել է։

Քննությունը շարունակվում է։