Վանաձորի քաղաքապետը հրաժարական կտա՞

Araratnews.am

Ինչպես տեղեկացրել էր Araratnews.am-ը, նոյեմբերի 5-ին՝ ժամը 11:00-ին հրավիրված Վանաձորի ավագանու նիստը չէր կայացել՝ քվորում չլինելու պատճառով: Ավագանու 33 անդամներից նիստին ներկայացել էին 15-ը. «Լուսավոր Հայաստան», «Բարգավաճ Հայաստան» և «Հայկական վերածնունդ» կուսակցությունները ներկայացնող ավագանու 18 անդամները նիստին չէին ներկայացել: Նշենք, որ «Տեղական ինքնակառավարման մասին» ՀՀ օրենքի 14-րդ հոդվածի 2-րդ պարբերության համաձայն՝ «Համայնքի ավագանու նիստն իրավազոր է, եթե նիստին ներկա ենավագանու անդամների կեսից ավելին»: Հիշեցնենք, որ ԼՀԿ-ն, ԲՀԿ-ն եւ ՀՎԿ-ն քաղաքական հուշագիր են ստորագրել, քաղաքապետի ընտրություններում էլ պետք է սատարեին «Լուսավոր Հայաստանի» թեկնածու Քրիստ Մարուքյանին, սակայն նրանցից 4-ը, այդուհանդերձ, փակ գաղտնի քվեարկության ժամանակ իրենց քվեն տվեցին հանրապետական Մամիկոն Ասլանյանին: «Լուսավոր Հայաստանը» որոշեց բոյկոտել նիստերը, հույս ունենալով, որ այդկերպ կպարզի, թե ովքեր են խախտել պայմանավորվածությունը: Քրիստ Մարուքյանը վստահեցնում է՝ շարունակելու են բոյոկոտը, քանի դեռ Մամիկոն Ասլանյանը հրաժարականի դիմում չի ներկայացրել: Թեմայի շուրջ զրուցեցինք Վանաձորի քաղաքապետ Մամիկոն Ասլանյանի հետ:

Վանաձորի ավագանու արտահերթ նիստը չկայացավ, հաջորդ նիստը ե՞րբ է նշանակվելու:

Դեռ հաջորդ նիստի մասին որևէ բան չեմ որոշել, ես շատ ավելի կարևոր՝ տնտեսական բնույթի հանդիպումների մեջ եմ Վանաձորի ապագայի վերաբերյալ: Էդ տեխնիկական, կազմակերպչական հարցերին մի փոքր ավելի ուշ կանդրադառնամ:

Ընդդիմության ներկայացուցիչներն ասում են՝ մինչև օրակարգում չլինի Ձեր հրաժարականի հարցը, չեն մասնակցի նիստերին:

Օրակարգում ավելի հետաքրքիր հարցեր կներառվեն:

Եվ այդ հետաքրքիր հարցերը պատճառ կդառնան, որ ընդդիմադիրները մասնակցե՞ն նիստերին:

Ովքեր Վանաձորի մասին են մտածում, կարծում եմ՝ պատճառ կդառնա, որ մասնակցեն, մանավանդ որ, ընդդիմադիրները նշում էին՝ իրենց նպատակը ոչ թե բոյկոտելն է, այլ ոմանց հայտնաբերելը: Հայտնաբերելու մասին էսօր չեմ ուզում խոսել, իրենք բոյկոտ արեցին, հիմա կարծում եմ՝ ժամանակն է կառուցողական դաշտում ի շահ Վանաձորի գործելու: Ես շատ մեծ ծրագրեր ունեմ Վանաձորի համար, կարծում եմ՝ վանաձորցի ընտրողներն էլ շահագրգռված կլինեն, որ իրենց ընտրած ավագանիները կարողանան մասնակցել քաղաքի ապագային վերաբերող խնդիրների քննարկմանը:

Պարոն Ասլանյան, այնուամենայնիվ, եթե ընդդիմությունը շարունակի բոյկոտել , դա կաթվածահար կանի քաղաքապետարանի աշխատանքները:

Ես քաղաքապետարանի եւ քաղաքի բնականոն կյանքը չեմ թողնի որ կաթվածահար լինի՝ նույնիսկ անձնական միջոցներով եւ անձնական կապերով, հետևաբար, կաթվածահար չի լինի: Իսկ թե ինչի կհանգեցնի բոյկոտը, օրենքում հստակ ամրագրված է՝ եթե երեք ամսում նիստ չկայանա, նոր ընտրություններ տեղի կունենան: Էնպես որ, ավելի լավ է՝ խոսենք քաղաքին վերաբերող խնդիրների մասին, քան ապագայի հետ կապված գուշակություններ անենք:

Իմ ելույթներից մեկի ժամանակ էլ նշել էի, որ Վանաձորն ինձ համար փոքր հայրենիք է եւ քաղաքական ինքնահաստատման կամ բեմականացումների վայր չէ:

Ի՞նչ նկատի ունեք՝ ասելով, որ անձնական կապերի միջոցով խնդիրը կլուծեք:

Այսինքն՝ անձնական միջոցներով, կապերով չենք թողնի՝ մեր սիրելի քաղաքը կաթվածահար լինի:

Ստացվում է, որ ընդդիմության շարքերից Ձեզ ձայն տվեցին, սակայն նիստերին չեն մասնակցում, սա չի՞ նշանակում, որ իրենք ճնշումների հետևանքով են Ձեր օգտին քվեարկել:

Ես կասեի հակառակը՝ մարդիկ ազատ կամարտահայտման արդյունքում են փակ գաղտնի քվեարկությամբ իրենց ձայնն ինձ տվել: Եթե ճնշումներ լինեին, ապա ձեր ասած մեթոդներով էդ մարդկանց կասեին՝ գային ավագանու նիստին: Կարծում եմ՝ ավելի լավ է վերլուծական միտքն էդ ուղղությամբ աշխատի:

Չե՞ք պատրաստվում հրաժարականի դիմում ներկայացնել:

Իհարկե´, ոչ: