«Դիզվառելիքի և բանանի շուկաներում նոր ներկրողներ կան»

«Մի ամիս է, ինչ ես բիզնեսի ներկայացուցիչ չեմ, 25 տարի եղել եմ շատ խոշոր բիզնեսի ներկայացուցիչ: Լավ գիտեմ բիզնեսի ունեցած պրոբլեմները և այն խնդիրները, որոնք պետք է լուծել բիզնեսի համար, որպեսզի դաշտն ավելի բաց լինի: Այնպես որ, քայլերը կանենք, կտեսնեք»,- այսօր ԱԺ-ում լրագրողների հետ զրույցում հայտարարեց ՊԵԿ նախագահ Վարդան Հարությունյանը:

Նա նշեց, որ պայքարելու է ստվերի դեմ. «Կպայքարեմ, կտեսնեք: Կա՛մ պիտի պայքարենք, կա՛մ չպայքարենք: Ես միտված եմ պայքարելու»:

Վ. Հարությունյանի խոսքով` վարչապետի հայտարարությունից հետո դիզվառելիքի և բանանի շուկաներում նոր ներկրողներ կան. «1-2 հոգին էլ արդեն ներկրող են: Հարկային-մաքսային մարմինների կողմից ոչ մի խոչընդոտ չի եղել»:

Թե որքա՞ն ժամանակ է պետք ուսումնասիրելու և հայտարարելու համար, թե ովքե՞ր են ստվերում, ՊԵԿ նախագահը պատասխանեց.

«Ես իմ փոխարեն եմ պատասխան տալիս, ես կարող եմ ասել այն, ինչ ես եմ անելու: Իհարկե, պետք է յուրաքանչյուր հարկային տեսչության պետ իր տարածքում հասկանալի ունենա, գույքագրի, հասկանա, ներկայացնի: Եթե կա ստվեր, պետք է ես տեղն իմանամ: Շատ կարճ ժամանակ է պետք դրա համար, երկար ժամանակ դրան պետք չի: Կարճ ժամանակ գույքագրելուց հետո պետք է պայքարել, որը և անելու եմ: Պայքարելու տարբեր ձևեր կան, միակ ձևը` պետք է պայքարել»:

Թե ո՞րն է ստվերի դեմ պայքարի երաշխիքը, ՊԵԿ նախագահը պատասխանեց. «Իմ անձն է, եթե վստահում եք, վստահեք, պահանջեք»: Նա խնդրեց լրագրողների աջակցությունը կոռուպցիոն ռիսկերը բացահայտելու համար:

Հյուսիս-Հարավ ավտոմայրուղու հետ կապված նախկին ստուգումների արդյունքների մասին ՊԵԿ նախագահը խոստացավ պատասխանել ավելի ուշ` ծանոթանալուց հետո:

Ըստ Վ. Հարությունյանի` հսկիչ գին հասկացողություն գոյություն չունի, գոյություն ունի մաքսազերծման ձև, և, եթե կան համապատասխան փաստաթղթեր, դրանց հիման վրա կկատարվի մաքսազերծում, եթե չկան, նմանատիպ օրինակով է որոշվում:

«Բոլոր պրոբլեմներից տեղյակ եմ, ժամանակ տվեք, կլուծենք»,- խոստացավ նա:

Նա նաև հերքեց, որ իրեն երկար ժամանակ համոզում էին դառնալ ՊԵԿ նախագահ: «Նման բան չկա»,- ասաց նա:

Վ. Հարությունյանը հաստատեց, որ ՊԵԿ-ում լուրջ կադրային փոփոխություններ են իրականացվում.

«Համալրվում է իմ մարդկանցով, համալրվում են պրոֆեսիոնալ մարդկանցով և էլի են համալրվելու: Այն մարդիկ, որոնք իմ կողմից դրված խնդիրները չեն կարողանալու իրականացնել, նրանք պետք է դուրս գան: Խաղի կանոն է փոխվել, և այդ խաղի կանոնը ես եմ ֆիքսում: Ես ունեմ իմ ֆիքսած խաղի կանոնները և պետք է աշխատեմ իմ թիմի հետ, որը ես եմ ընտրել»:

Վ. Հարությունյանի խոսքով` ՊԵԿ-ը պետության ներկայացուցիչն է յուրաքանչյուր բացված բիզնեսի մեջ հարկերի տեսքով, պետությունը հանդիսանում է փայատեր ցանկացած բիզնեսի, և այդ բիզնես մեջ փայի ներկայացուցիչը հարկային մարմինն է: Նա նշեց, որ եթե բիզնեսմենը պարկեշտ և առանց խաբելու պետության փայաբաժինը վճարում է, իրենք պետք է ուղղակի աջակցեն այդ բիզնեսի զարգացմանը, իսկ եթե կլինեն բիզնեսմեններ, որ կփորձեն թաքցնել, կպայքարեն նրանց դեմ:

Հարցին` ՊԵԿ նախագահն ունի՞ բիզնեսներ, Վ.Հարությունյանը պատասխանեց. «Ես ունեցել եմ: Իմ ընտանիքն ունի՞: Ունի: Որևէ հովանավորչություն բացառվում է»:

Նյութն՝ ըստ 168.am-ի