Ամենաէքսցենտրիկ Դոնալդ Թրամփը․ ո՞վ է նա։ Մանրամասներ

Տարիքը՝ 70 տարեկան
Ֆինանսական կարողությունները. Forbes-ի և Bloomberg-ի վարկածներով՝ 3 միլիարդ, իսկ ըստ Թրամփի՝ մոտ 9 միլիարդ: Հիմնական բիզնեսը՝ շինարարություն, սակայն նրա The Trump Organization-ը զբաղվում է գրեթե ամեն ինչով՝ սկսած գեղեցկության մրցույթներից մինչև սեղանի խաղերի կազմակերպում: Բիզնես-իմպերիայի հիմնադիրները եղել են Թրամփի տատիկ Էլիզաբեթն ու նրա հայրը:

Քաղաքական կարիերան
Երբեք ոչ մի քաղաքական պաշտոն չի զբաղեցրել ու չի մասնակցել ոչ մի ընտրության, չնայած 1980-ականներից սկսած անընդհատ խոսում էր երկրի նախագահ կամ Նյու-Յորքի նահանգապետ դառնալու ցանկության մասին: Այս տասնամյակների ընթացքում Թրամփը 3 անգամ փոխել է կուսակցական պատկանելությունը. սկզբում նա Հանրապետական կուսակցության կողմնակից էր, այնուհետև Ռեֆորմների կուսակցությանը սկսեց սատարել, 2001-ից 2008թթ. դեմոկրատ էր, իսկ 2008թ․-ին վերադարձել է հանրապետականների մոտ: 2011թ. Թրամփը 5 ամսով իրեն անկուսակցական է հայտարարել, իսկ հետո նորից անդամագրվել է Հանրապետական կուսակցությանը:

Առաջադրվելու ուղին
Հանրապետականների օրակարգում թեկնածության ֆավորիտ կարող էր լինել ցանկացած մեկը՝ բացի Թրամփից: Դեռևս նախընտրական քարոզարշավի մեկնարկից առաջ արդեն կար կարծիք, որ «ձվաձև» կաբինետի աթոռի համար պայքարելու են Հիլլարի Քլինթոնն ու Ջեբ Բուշը: Թրամփի առաջադրումը բոլորը կատակ էին համարում, սակայն Թրամփի պոպուլիստական հռետորաբանությունը և նրա կտրուկ, սկանդալային արտահայտությունները ներգաղթի, ավանդական քաղաքական գործիչներից ձանձրացած ընտրողների վերաբերյալ, ինչպես նաև մրցակիցների ճակատագրական ու բազում սխալները տվեցին իրենց արդյունքները: Սկզբում նախագահական մրցավազքից հրաժարվեց Ջեբ Բուշը, իսկ հետո նույնը արեցին Մարկո Ռուբիոն, Թեդ Քրուզը և Ջոն Քեյսիկը: Նրանցից ոչ ոք չկարողացավ Թրամփի համար ապահովել արժանի մրցակցություն դեբատների ժամանակ:

Նախընտրական ծրագրի կարևոր կետերը
Մեքսիկայի սահմանի վրա պատ կառուցել, դադարել ձգտել այլ երկրներում քաղաքական ռեժիմների փոփոխության, հաղթել «Իսլամական պետությանն» այնպես, ինչպես դա ԱՄՆ-ն արել էր «սառը պատերազմի» դեպքում, ավելացնել մայրության արձակուրդի տևողության ժամկետը, ստեղծել 25 մլն աշխատատեղ, պաշտպանել զենք կրելու իրավունքը:

Հարկային առաջարկներ
Հարկերից խուափելու ելքերը փակել, հարկային առավելություններ ստեղծել ընտանիքների համար, պակասեցնել ընկերությունների հարկերը, համոզվել, որ հարկահանությունը չի վնասում բիզնեսին: Էքսպերտները Քլինթոնի և Թրամփի նախընտրական ծրագրերը հակապատկերներ են համարել: Հանրապետականը առաջարկում է իջեցնել հարկերը քաղաքացիների բոլոր խավերի համար, և ինչպես գրում է Forbes-ը, Թրամփը առաջարկում է պակասեցնել հարկերը 6,2 տրիլիոն դոլարով առաջիկա 10 տարիների ընթացքում:

Ներգաղթի նկատմամբ վերաբերմունքը
Թրամփը բազմիցս է նշել Մեքսիկայի հետ սահմանի վրա պատ կառուցելու մասին, ընդ որում՝ անել դա Մեքսիկայի հաշվին: Նա խոսել է մուսուլմանների ներգաղթի վտանգավորության մասին և պնդում է, որ աշխատատեղերը առաջնահերթ պետք է բաժին հասնեն ամերիկացիներին և ոչ թե եկվորներին: Միլարդատերը խոստանում է մաքսիմալ խստացնել սահմանային վերահսկողությունը, զրկել ներգաղթյալներին սոցիալական նպաստներից և չեղարկել Բարաք Օբամայի բոլոր այն օրենքները, որոնք թուլացնում են անօրեն ներգաղթյալների պատասխանատվությունը:

Քարոզարշավի գլխավոր ձախողումը
Սեռական ոտնձգությունների մեջ մեղադրվելուց հետո դեբատների ժամանակ Թրամփը հայտարարեց, որ երբեք չի ոտնձգել ու չի համբուրել որևէ կնոջ՝ առանց նրա համաձայնության: Ձախողում էր նաև 11 տարվա վաղեմության այն ժապավենը, որտեղ Թրամփը հայհոյում է կանանց: Այս դեպքերից հետո Թրամփից մասսայաբար երես էին թեքում նրա հովանավորներն ու ազդեցիկ հանրապետականները: Մնացած հարվածները, այդ թվում՝ ոչ կոմպետենտության ու հարկերից խուսափելու վերաբերյալ մեղադրանքները Թրամփը գրեթե անցավ հաղթահարեց:

Սիրում են նրա համար, որ...
Ուղղամիտ է, նման չէ ավանդական քաղաքական գործչի, ծայրահեղ պահպանողական է և ցանկանում է Ամերիկային վերադարձնել երբեմնի փառքը: Թրամփն ասում է այն, ինչը շատերն են մտածում, բայց չեն համարձակվում արտահայտել: Համարվում է, որ նա արտահայտում է ԱՄՆ բնակչության այն հատվածի շահերը, որին բոլոր մյուս քաղաքական գործիչները չեն անդրադառնում:

Քննադատում են նրա համար, որ...
Նրա քաղաքական մրցակիցների կարծիքով՝ Թրամփը չունի բավականաչափ որակ ու փորձառություն երկիրը ղեկավարելու համար։ Նա շուտ բռնկվող է՝ գլխավոր զորահրամանատար լինելու և ԱՄՆ ատոմային զինանոցը ղեկավարելու համար: Թրամփի հայացքները բացահայտ ռասիստական են համարվում (նա լավ հայտնի է ամերիկյան ծայրահեղ աջերի շրջանում), իսկ նրա՝ ներգաղթյալներից մեկուսանալու առաջարկները համարվում են վտանգավոր:

Հարաբերությունները Ռուսաստանի հետ
Թրամփը բազմիցս է ասել, որ լեզու կգտներ Վլադիմիր Պուտինի հետ, սակայն ընդգծել է, որ ծանոթ չէ Ռուսաստանի նախագահի հետ անձամբ, և չի կարող ասել՝ ինչպես կընթանան գործերը: Նա կողմ է Ռուսաստանի հետ հարաբերությունների բարելավմանը, և քննադատում է Օբամային Պուտինի հետ լեզու չգտնելու համար: Սակայն, ընդհանուր առմամբ, ո՛չ իր ելույթներում և ո՛չ էլ նախընտրական քարոզարշավի ժամանակ Մոսկվայի հետ հարաբերություններին նա երբեք կարևորություն չի տվել: