Կառավարական «դաչայում» ապրող և դրանից հրաժարված պաշտոնյաները
Քաղաքականություն
Պռոշյան-Դեմիրճյան խաչմերուկում գտնվող կառավարական առանձնատներում կարող են ապրել ՀՀ բարձրաստիճան պաշտոնյաներից ՀՀ նախագահը, ԱԺ նախագահը, վարչապետը, Պաշտպանության նախարարը, Սահմանադրական դատարանի նախագահը և Ազգային անվտանգության խորհրդի քարտուղարը:
ՀՀ նախագահ Սերժ Սարգսյանը բարձրաստիճան պաշտոնյաների համար նախատեսված առանձնատնում բնակվողներից է: Այս առանձնատունը հաճախ «հավաքատեղի» է դառնում այն մարդկանց համար, ովքեր ունեն ինչ-որ խնդիր և բողոքի ձայն են բարձրացնում: Մշտապես այդտեղ ակցիա է իրականացնում քաղաքացիական ակտիվիստ Վարդգես Գասպարին՝ իր ցուցապաստառով:
Աժ նախագահ Գալուստ Սահակյանը պաշտոնավարման ընթացքում իր տնից չի տեղափոխվել կառավարական առանձնատուն: Ինչպես արդեն տեղեկացրել ենք, Գալուստ Սահակյանը փորձում է հետ չմնալ մյուս օլիգարխ պաշտոնյաներից շքեղ առանձնատների մասով: «Սասուն» ռեստորանի հարեւանությամբ Սահակյանը տեւական ժամանակ է՝ շքեղ առանձնատուն է կառուցում՝ երկհարկանի, սյուներով:
Նախկին վարչապետ Տիգրան Սարգսյանը ապրել է կառավարական առանձնատանը, նրան հաջորդած Հովիկ Աբրահամյանը իր 2,5 տարվա պաշտոնավարման ժամանակ շարունակել է ապրել Մոնումենտում գտնվող իր սեփական տանը, որը գտնվում է «Հաղթանակ» զբոսայգու դեմ-դիմաց և նման է ԱԺ շենքին:
Այս տարվա սեպտեմբերին վարչապետ նշանակված Կարեն Կարապետյանն էլ որոշել է չտեղափոխվել կառավարական առանձնատուն, նա ապրում է Արաբկիր համայնքում գտնվող իր տանը: Նշենք նաև, որ մամուլը գրել էր, թե նոր վարչապետի առանձնատունը նույնպես գտնվում է Մոնումենտում՝ ճիշտ եւ ճիշտ Հովիկ Աբրահամյանի ու Գագիկ Բեգլարյանի առանձնատների կողքին։ Եվ ոչնչով չի զիջում դրանց՝ ոչ չափերով, ոչ ճոխությամբ, ոչ գնով:։
Պաշտպանության նորանշանակ նախարար Վիգեն Սարգսյանը այժմ ապրում է իր սեփական տանը, իսկ նախկին նախարար Սեյրան Օհանյանը դուրս է եկել կառավարական առանձնատնից: Վերջինս տեւական ժամանակ է` շքեղ առանձնատուն է կառուցում Վահագնի թաղամասում: Ասում են՝ անգամ ապրիլյան պատերազմի օրերին նախարարն անձամբ էր զբաղվում շինարարական աշխատանքների համակարգմամբ, այնպես, որ շինարարները բողոքում էին, թե օրական 5 անգամ զանգում է՝ ի՞նչ եղավ, ո՞ւր եք հասել:
Կառավարական ամառանոցների «Հրազդան» համալիրի մշտական բնակիչներից է Սահմանադրական դատարանի նախագահ Գագիկ Հարությունյանը: Ի դեպ, մամուլում շրջանառվող լուրերի համաձայն՝ Գագիկ Հարությունյանը Մոնումենտում` Հաղթանակ զբոսայգու հարևանությամբ, Բաբայան փողոցում, շքեղ առանձնատուն ունի։ Եվ այն վարձով է տրված Հայաստանում ճապոնիայի դեսպանատանը։ Գագիկ Հարությունյանի և նրա կնոջ հայտարարագրերում թեև որևէ անշարժ գույք նշված չէ. բայց շրջակայքի բնակիչները պնդել են, որ այդ տունը հենց նրան է պատկանում։
Ազգային անվտանգության խորհրդի քարտուղար Յուրի Խաչատուրովն էլ չի բնակվում կառավարական «դաչայում», ապրում է սեփական տանը: Ու թեեւ բարձրաստիճան պաշտոնատար անձանց էթիկայի հանձնաժողով ներկայացրած հայտարարագրում նա նշել է, որ անշարժ ու շարժական գույք չունի, բայց մամուլում հրապարակումներ են եղել Խաչատուրովի` Կոտայքի մարզում գտնվող երկհարկանի շքեղ առանձնատան մասին:
Աննա Պապիկյան
1
2
3
4
5
1
2
4
5
2
