Էրդողանը Պուտինին ստիպել է սպասել իրեն տեսախցիկների առաջ․ տեսանյութ

Ինչպես արդեն հաղորդել է Tert.am-ը` Սանկտ Պետերբուրգում օգոստոսի 9-ին կայացել է Ռուսաստանի նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի հանդիպումը: Ռուսաստանի և Թուրքիայի նախագահների բանակցությունները երկրների միջև ծագած ճգնաժամից հետո առաջին հանդիպման շրջանակներում մոտ երկու ժամ են տևել, այնուհետև կողմերը սկսել են ընդլայնված կազմով երկկողմ համագործակցության հարցերի քննարկումը, որից հետո կայացել է համատեղ մամուլի ասուլիս:

Մի շարք լրատվամիջոցներ անդրադարձել են նախագահների հանդիպմանը: Ինչպես հայտնում է ABC News-ը` Էրդողանն ուշացել է Պուտինի հետ հանդիպումից, առաջնորդի, ով ինքն է հաճախ ուշանում պետական մակարդակի հանդիպումներից, սակայն բանակցություններից հետո տեղի ունեցած մամուլի ասուլիսի ժամանակ նրանք որոշել են, որ վեճն ավարտված է, և երկրներն արդեն պատրաստ են իրենց հարաբերությունների վերականգնմանը:

Ուկրաինական segodnya.ua կայքը նշում է, որ հանդիպումից առաջ Վլադիմիր Պուտինը ստիպված է եղել մի քանի րոպե սպասել իր թուրք գործընկերոջը` այդ ընթացքում բազմաթիվ տեսախցիկների դիմաց անհանգիստ շարժումներ անելով:

Նշենք, որ երկու երկրների առաջնորդների հանդիպումն անցկացվել է օգոստոսի 9-ին՝ Սանկտ Պետերբուրգում գտնվող Ստրելնա բնակավայրի Կոնստանտինյան պալատում։

Սա նախագահների առաջին հանդիպումն է Մոսկվայի և Անկարայի միջև հարաբերություններում ծագած ճգնաժամից հետո, որի պատճառ է հանդիսացել 2015 թվականի նոյեմբերին թուրքական օդուժի կողմից ռուսական Су-24 ռմբակոծիչի խոցումը