Ադրբեջանը պատրաստվում է նոր ագրեսիայի

«Արտաքին վտանգի դեպքում արագ համախմբվելու ունակությունը մեր պետականության կենսունակության գրավականներից է, հակառակորդի ագրեսիայի պոտենցիալը չեզոքացնելու մեր առավելություններից մեկը: Այդ առավելությունն ակնառու կերպով դրսևորվեց այս ապրիլին, երբ կամավորականության հոսքը դեպի սահման ապշեցրեց Ադրբեջանի ռազմաքաղաքական վերնախավին: Սակայն արագ համախմբվելու նախադրյալը մեր հանրության զգոնությունն է, որը հարկավոր է մշտարթուն պահել: Այդ կերպ միայն հնարավոր կլինի անհրաժեշտության դեպքում արագ մոբիլիզացնել երկրի ռեսուրսներն ու դիմակայել հակառակորդի ագրեսիային: Հենց այդ համատեքստում էլ դիտարկում եմ Վարդան Ավետիսյանի հայտարարությունը»,- «Առաջին լրատվական»-ի հետ զրույցում նշեց ռազմական փորձագետ, պաշտպանության նախկին նախարար Սեյրան Օհանյանի 2013-2016թթ. խորհրդական Դավիթ Ջամալյանը՝ խոսելով օրերս «Պահեստազորի սպաների համահայակական միության» նախագահ, ՊՆ լրատվության և հասարակայնության հետ կապերի վարչության պետ Վարդան Ավետիսյանի այն հայտարարության մասին, որում վերջինս աշխարհազորային ջոկատների հրամանատարներին խնդրում է մոբիլիզացնել կամավորական բոլոր ուժերը՝ նոյեմբերի 11-18-ը Ադրբեջանի կողմից սպասվող զորավարժություններին ընդառաջ։

Այս համատեքստում Դավիթ Ջամալյանը նաև հավելում է. «Բնականաբար, այն հասարակական կազմակերպությունները, որոնք իրենց առաքելությունն են հռչակում հայրենիքի պաշտպանությանը մասնակից լինելը, պետք է ունենան պատրաստականության բարձր մակարդակ, ունակ լինեն արագ մոբիլիզացնել սեփական ռեսուրսները վտանգի պահին: Կարծում եմ՝ հենց այդ մասին է խոսքը եղել:

Զորավարժությունների փաստն ապացուցում է, որ հակառակորդը չի հրաժարվել իր ագրեսիվ նկրտումներից: Ապրիլյան մարտական գործողություններից հետո ադրբեջանական կողմն իր զինված ուժերի մարտունակությունը վերականգնելու խնդիր ուներ: Կարծում եմ, որ թշնամուն դեռևս չի հաջողվել այդ խնդիրը լիարժեքորեն լուծել: Սպասվող զորավարժությունները հարկավոր է դիտարկել հենց այդ համատեքստում՝ որպես մարտունակության վերականգնման քայլերից մեկը»:

Ռազմական փորձագետի խոսքով՝ ըստ ամենայնի, կխաղարկվեն մեր պաշտպանությունը ճեղքելու ինչ-ինչ մարտավարական հնարքներ, ուշադրություն կդարձվի տարբեր զորատեսակների, ստորաբաժանումների ներդաշնակ գործելու հմտությունների ձևավորման վրա:

«Բնականաբար, այդ զարավարժություններին մեր պաշտպանական գերատեսչությունում ուշադրությամբ կհետևեն, և նաև կձեռնարկվեն անհրաժեշտ կանխարգելիչ քայլերը: Հարկ է նշել, որ ապրիլից հետո մեր Զինված ուժերի մարտունակությունը նոր որակի է բերվել՝ բազմապատկվել է ռազմավարական զսպման ռեսուրսը, սահմանին կատարվել են ծավալուն ամրաշինական աշխատանքներ: Հետևաբար այժմ լայնամասշտաբ ռազմագործողությունների դեպքում ադրբեջանական կողմի հաջողության հավանականությունը էապես նվազել է»,- ասաց նա։

Հարցին՝ որքանո՞վ է հավանական համարում լայնամասշտաբ ռազմական գործողությունների վերսկսումը կամ բլից-կրիգը, Դավիթ Ջամալյանը պատասխանեց. «Բլից-կրիգի մասին խոսք անգամ լինել չի կարող: Բլից-կրիգ ասվածն իրենից ներկայացնում է պաշտպանության ճեղքում, ապա կայծակնային արագությամբ հաջողության զարգացում՝ խոր թիկունք մխրճվելու, խոշոր ստորաբաժանումներ շրջափակման մեջ առնելու տեսքով: Վերը նշվածից ոչինչ ադրբեջանական բանակին չի հաջողվել ապրիլին, թեև մտահղացումը ենթադրել է արագ առաջխաղացում: Խոսել ադրբեջանական բլից-կրիգի հավանականության մասին այժմ համարում եմ անիրատեսական՝ անշուշտ, հաշվի առնելով ապրիլյան իրադարձություններից հետո մեր Զինված ուժերում իրականացված աշխատանքները: Այդուհանդերձ, պետք է նկատի ունենալ, որ հակառակորդը պատրաստում է իր Զինված ուժերը նոր ագրեսիայի: Հետևաբար մեր երկրի պաշտպանունակության ամրապնդմանն ուղղված ջանքերն այլընտրանք չունեն»,-եզրափակեց պարոն Ջամալյանը։