Ռեստորանում հնչած կրակոցների հետեւում դաշնակնե՞ր են կանգնած. մանրամասներ

Armtimes.com-ի Գյումրիի թղթակիցը հայտնում է․

Նոյեմբերի 16-ին Գյումրիի «Եռանկյունի» ռեստորանում տեղի ունեցած վիճաբանության և հնչած կրակոցների հետևում, ինչպես խոսվում է քաղաքում, մարզի դաշնակցականներից են կանգնած:

Կայքի թղթակիցը փոխանցել է, որ Շիրակի նախկին մարզպետ Ռոմիկ Մանուկյանի եղբայրը՝ Ռոբերտ Մանուկյանը, ով ավելի հայտնի է Կոշտո մականվամբ, դեպքի օրը, ըստ ականատեսների, եղել է «Եռանկյունի» ռեստորանում: Նրան է պատկանում Գյումրիում գործող «Վեգա» էլեկտրատեխնիկայի խանութը:

Դաշնակցական Մանուկյանները մտերմիկ շրջանակում կերել-խմել են: Նրանցից մեկը անհարգալից է վերաբերվել «Եռանկյունի» ռեստորանի աշխատակիցներից մեկի հետ: Ռեստորանի սեփականատիրոջ՝ Դարբին Գագոյի որդին, որին առավել ճանաչում են Պելե անվամբ և որը պարբերաբար աչքի է ընկնում տարբեր վիճաբանություններում, չի հանդուրժել Մանուկյանների պահվածքը:

Նշյալ անձանց միջեւ վիճաբանություն է ծագել: Սկսել են հայհոյել, ինչին հաջորդել են կրակոցներ:

Առայժմ պարզ չէ, թե որ կողմն է կրակել:

Խոսակցություններ կան, որ Շիրակի դաշնակցական մարզպետ Հովսեփ Սիմոնյանը դեպքից անմիջապես հետո միջամտել է՝ խնդիրը կարգավորելու համար:

Armtimes.com-ի հետ զրույցում Շիրակի մարզպետը փոխանցեց, որ ինքը տեղեկություններ չունի այն մասին, որ Ռոմիկ Մանուկյանը կամ նրա ազգականները անմիջական կապ ունեն դեպքի հետ:

«Ես տեղյակ չեմ, Դուք ասում ենք, ես նոր իմանում եմ: Չգիտեմ՝ ով կապ ունի: Ես ոչ մի տեղեկություն չունեմ: Դատախազությունը հայտարարություն է արել, կարաք բացեք, նայեք»,- ասաց Հովսեփ Սիմոնյանը:

Մեր այն դիտարկմանը, թե՝ որպես մարզի ղեկավար, իրեն չի՞ հետաքրքրում կատարվածը, որ տեղեկություններ չունի, Հովսեփ Սիմոնյանը զայրացած պատասխանեց.

«Հետաքրքրել, դեռ չի նշանակում, որ պիտի ինչ-որ բան ասեմ: Դատախազությունը այդ մասին հայտարարություն արդեն տվելա: Ունե՞ք ուրիշ հարց: Ես կապ չունեմ այդ դեպքի հետ»,- ասաց Հովսեփ Սիմոնյանը եւ անմիջապես անջատեց հեռախոսազանգը:

Տեղեկություններ փորձեցինք ստանալ նաեւ Շիրակի նախկին մարզպետ Ռոմիկ Մանուկյանից, բայց նա չպատասխանեց մեր հեռախոսազանգերին:

Ոստիկանության Գյումրու «Կումայրիի» բաժնի իրավապահները նոյեմբերի 16-ից կատարում են օպերատիվ-հետախուզական աշխատանքներ: Պաշտոնապես կրակոցների մասին խոսակցությունները մինչ այս պահը ոչ հերքվում, ոչ՝ հաստատվում են:

Այսօր՝ նոյեմբերի 18-ին, ՀՀ ոստիկանության հասարակայնության հետ կապերի եւ լրատվության վարչությունից Armtimes.com-ին փոխանցեցին, որ օպերատիվ-հետախուզական աշխատանքները շարունակվում են:

«Եռանկյունի» ռեստորանում աշխատանքները դադարեցված են, ռեստորանի դռները կնքված են:

Հիշեցնենք, որ դեպքից անմիջապես հետո շրջանառվեցին վարկածներ այն մասին, որ վիճաբանությունը եղել է Մարմաշեն համայնքի մեծահարուստներից մեկի՝ Գարենի որդու ընկերոջ՝ Վահրամի եւ Դարբին Գագոյի որդու՝ Պելեի միջեւ:

Սակայն կան տեղեկություններ, որ դեպքի օրը Վահրամի հայրն անձամբ է այցելել Շիրակի մարզի քննչական վարչություն եւ տեղեկացրել՝ որդին կնոջ հետ մեկ շաբաթ է՝ գտնվում է Ծաղկաձորում: