Տիգրան Մեծից մինչև Գալուստ Սահակյան

shame.am-ը գրում է․

Հայաստանյան օլիգարխիայի և բարձրաստիճան պաշտոնյաների համար սեփական հնարավորությունների և կարողությունների ցուցադրման լավագույն ձևերից մեկն է դարձել շքեղ, ահռելի չափերի հասնող առանձնատների կառուցումը: Եվ, իբրև կանոն, դրանք պիտի գտնվեն ամենատեսանելի վայրերում, բոլորի աչքի առաջ, որպեսզի եկող-գնացող իրեն ճնշված ու խեղճացած զգա դրանց տարողունակ ստվերի ներքո:

Ահա այս երևույթի գայթակղությանը չի դիմացել նաև Ազգային ժողովի նախագահ Գալուստ Սահակյանը: Վերջինս ևս Աջափնյակ վարչական շրջանում գտնվող «Սասուն» ռեստորանի հարևանությամբ առանձնատուն է կառուցում: Եռահարկ պալատն աչքի է ընկնում արտաքին շքեղությամբ, սյունաշարերով, լողավազանով: Բայց արի ու տես, որ առանձնատան ամենազարմանահրաշ բաները ներսում չեն, այլ դրսում՝ հենց տան մուտքի վերևում:

Մեր բոլորի կողմից շատ սիրված ու հարգված Գալուստ Սահակյանը որոշել է իր կեցության վայրին մի նոր խորհուրդ հաղորդել, այսինքն՝ զուգահեռներ տանել իր անձի և այն անհատի միջև, որը կարող է հավակնել նմանվել Սահակյան Գալուստին: Ու հենց գլխավոր մուտքի և դռան վրա տեղադրել է Հայոց արքա Տիգրան Մեծի դիմաքանդակը: Այժմ արդեն այցի եկողները կհասկանան, թե ինչ մեծ պատվի են արժանանում իրենք և ում մոտ են բարեբախտություն ունենում գնալու:

Հայոց պատմության ողբերգությունն ու կոմիզմն է սա՝ Տիգրան Մեծից մինչև Գալուստ Սահակյան: Ինչպիսի անկում…