Նորադուզցի Ալիկը լարված հարաբերությունների մեջ է եղել Չարբախում սպանված Մուշեղյանի հետ

armtimes.com-ը գրում է․

Մեզ հայտնի դարձավ, նոյեմբերի 13-ին Շենգավիթ վարչական շրջանում գործող «Լիա» գեղեցկության սրահում տեղի ունեցած աղմկոտ սպանության գործով երրորդ անձ է ձերբակալվել:

Նույն այդ տեղեկություններով, ձերբակալված ոմն Ղազարյանը Չարբախցի Գեղամի (Պետրոս Իսրայելյան) շրջապատից է: Նա նույնպես այդ օրը եղել է դեպքի վայրում:

Այդ օրվա «գլխավոր մեղավոր» Մուշեղ Մուշեղյանը ինչ-ինչ գումարային հարցերի շուրջ տարաձայնություններ է ունեցել Չարբախցի Գեղամի հետ:

Գեղեցկության սրահի տարածքում տեղի ունեցած «ռազբորկային» մասնակցել է մի քանի տասնյակ մարդ՝ հիմնականում Քրեական հեղինակություն Գեղամի շրջապատից:

Նրանց ու Մուշեղ Մուշեղյանի միջեւ վիճաբանություն է սկսվել, որը վերածվել է լուրջ ընդհարման, ինչի ժամանակ Մուշեղ Մուշեղյանը իր մոտ եղած զենքով կրակել է իրեն շատ մոտ գտնվող Գեւորգ Ավետիսյանի գլխին, որից հետո էլ տեղի է ունեցել փոխհրաձգություն: Ի դեպ, Մուշեղյանին նաեւ դանակահարել են. բացի հրազենային վիրավորումից նրա դիակի զննությամբ հայտնաբերել են նաեւ կտրող-ծակող առարկայով պատճառված մարմնական վնասվածք՝ որովայնի շրջանում։

Ինչպես արդեն տեղեկացրել ենք, այս գործի շրջանակներում այսօր ձերբակալվել են Քրեական հեղինակություն Նորադուզցի Ալիկն ու նրա ընկերը՝ Բդոն: Սպանված Մուշեղ Մուշեղյանը Նորադուզցի Ալիկի վստահված անձանցից մեկն է եղել: Սակայն հետագայում, ինչ-ինչ պատճառներից ելնելով Ալիկը վստահությունը կորցրել է եւ դադարել է նրա հետ աշխատել: Մեր տեղեկություններով, նա մոտ հարաբերությունների մեջ է Չարբախցի Գեղամի հետ:

Այս գործի շրջանակներում սպասվում են նաեւ նոր ձերբակալություններ:

Հիշեցնենք, որ այդ օրը բացի Մուշեղ Մուշեղյանից սպանվել է 25-ամյա Գեւորգ Ավետիսյանը եւ ծանր հրազենային վիրավորում ստացել Արմեն Պետրոսյանը:

Դեպքի առթիվ հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասի, 34-104-րդ հոդվածի 2-րդ մասի 1-ին կետի և 235-րդ հոդվածի 1-ին մասի հատկանիշներով:

Տաթև ԽԱՉԱՏՐՅԱՆ