Չինաստանը արձագանքել է Huawei-ի դեմ ԱՄՆ-ի նոր պատժամիջոցներին

ԱՄՆ-ի գործողությունները Huawei-ի դեմ զուտ հեգեմոնիկ վարքագիծ է, որը խախտում է միջազգային առեւտրի եւ արդար մրցակցության սկզբունքները, երեքշաբթ օրը հայտարարել է Չինաստանի ԱԳՆ ներկայացուցիչ Չժաո Լիցզյանը, հայտնում է «ՌԻԱ Նովոստի»-ն:

Ավելի վաղ ԱՄՆ պետքարտուղար Մայք Պոմպեոն հայտարարել էր չինական Huawei հեռահաղորդակցական ընկերության դեմ պատժամիջոցների ընդլայնման մասին: Երկուշաբթի ԱՄՆ առեւտրի նախարարությունը «սեւ ցուցակում» ավելացրել էր Huawei-ի եւս 38 դուստր-ձեռնարկություններ: Բացի այդ, գերատեսչությունն ընդլայնել էր փոփոխությունների շրջանակը, համաձայն որի՝ օտարերկրյա ընկերությունները, որոնք չիպեր պատրաստելու համար օգտագործում են ամերիկյան սարքավորումներ, պետք է արտոնագիր ստանան Միացյալ Նահանգներում՝ նախքան Huawei-ին որոշակի չիպեր մատակարարելը:

Ըստ Չինաստանի արտգործնախարարության պաշտոնական ներկայացուցչի, ԱՄՆ-ի աճող ճնշումը Huawei-ի եւ չինական այլ ընկերությունների վրա միայն վկայում է այդ ընկերությունների հաջողության մասին:

Միացյալ Նահանգները Huawei-ին մեղադրում է ՉԺՀ-ի զինվորականների եւ հետախուզության հետ համագործակցության ու հաճախորդների հնարավոր հետապնդման մեջ եւ մի շարք երկրներին համոզում է 5G բջջային ստանդարտին անցնելիս չօգտագործել Huawei-ի ենթակառուցվածքն ու սարքավորումները: Չինական ընկերությունը հայտարարում է, որ մեղադրանքներն անհիմն են, քաղաքական դրդապատճառներ ունեն եւ խախտում են շուկայի մրցակցության սկզբունքները: