Եվրոպական երկրներում կորոնավիրուսի նոր բռնկում է, Իրանում մահվան դեպքերը 20 հազարից ավելի են. կորոնավիրուսն աշխարհում

Աշխարհում մինչև օրս արձանագրված կորոնավիրուսի դեպքերի թիվը գերազանցել է 22,5 միլիոնը, հիվանդներից 791 հազարը մահացել են, ավելի քան 15 միլիոնը՝ բուժվել: Այս տվյալները նշված են worldometers.info կայքում:

The Guardian պարբերականի փոխանցմամբ՝ Հնդկաստանը 1 օրում կորոնավիրուսի 69.672 նոր դեպք է արձանագրել, ինչը երկրի համար ռեկորդային ցուցանիշ է:

Ֆրանսիան, Իտալիան և Իսպանիան սահմանափակումների թուլացումից հետո ռեկորդային նոր դեպքեր են արձանագրել: Ֆրանսիայում 3776 նոր դեպք է արձանագրվել: Ֆրանսիայի առողջապահության նախարարությունը հայտարարել է, որ վիրուսի տարածումն ուժեղանում է հատկապես երիտասարդների շրջանում. վիրուսն ակտիվ է հատկապես Փարիզում և Մարսելում: Երկրի նախագահ Էմանուել Մակրոնը կրկին բացառել է ևս մեկ համազգային լոքդաուն հայտարարելու հնարավորությունը:

Իսպանիայում 24 ժամում արձանագրվել է 3715 նոր դեպք, Իտալիայում՝ 642:

Հարավային Կորեան, որը կարծես հաղթահարել էր վիրուսը, արդեն 7 օր շարունակ ամեն օր դեպքերի եռանիշ թիվ է արձանագրում: Նոր բռնկումը սկսվել է Հարավային Կորեայի եկեղեցիներից մեկի այցելուների շրջանում:

Իրանում էլ կորոնավիրուսից մահվան դեպքերը գերազանցել են 20 հազարը, ինչը Մերձավոր Արևելքի երկրներում ամենաբարձր ցուցանիշն է: Լրատվամիջոցը հաղորդում է, որ այս ցուցանիշները գրանցվել են այն բանից հետո, երբ Իրանը համալսարանի ընդունելության քննություններ անցկացրեց շուրջ 1 միլիոն երիտասարդների համար: