«Էս մարդիկ պետք ա իմանան, թե ովքեր են իրենց իրական թշնամիները…». Երրորդմասցի Լյովիկի սպանության մեջ մեղադրվող Ծգըլի հայտարարությունը

1in.am

Էրեբունի և Նուբարաշեն վարչական շրջանների ընդհանուր իրավասության դատարանում Արտուշ Գաբրիելյանի նախագահությամբ շարունակվեց Երրորդմասցի Լյովիկի ու նրա երկու ուղեկիցների սպանության գործի դատական քննությունը:

Ըստ մեղադրանքի՝ Վահան Հակոբյանը՝ «Գաստիկ» մականունով, մի խումբ անձանց հետ նախնական համաձայնությամբ ապօրինի ձեռք է բերել ու պահել մարտական ակոսափող հրազեն հանդիսացող, 1963 թվականի գործարանային արտադրության «ԱԿՄՍ» տեսակի ինքնաձիգ, 1976 թվականի գործարանային արտադրության «ԱԿՄ» տեսակի ինքնաձիգ և 1960 թվականի գործարանային արտադրության «ԱԿՄ» տեսակի ինքնաձիգ, որոնք ապահովված են եղել պահունակներով ու ռազմամթերք հանդիսացող փամփուշտներով:

2015 թվականի մարտի 4-ին, ժամը 13-ն անց 50-ի սահմաններում «Գաստիկ» մականունով Վահան Հակոբյանը, «Տլե» մականունով Սարգիս Հախանումյանը և «Ծգըլ» մականունով Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինաբար պահվող մարտական ակոսափող հրազեն հանդիսացող 3 ինքնաձիգներից կրակահերթ են արձակել «Նուբարաշեն» ՔԿՀ տեսակցության գնացող Լևոն Ղազարյանի՝ Երրորդմասցի Լևոնի, ինչպես նաև Դրաստամատ Թադևոսյանի ու Մեսրոպ Նազարյանցի ուղղությամբ, ինչի հետևանքով Մեսրոպ Նազարյանցը տեղում մահացել է, իսկ Լևոն Ղազարյանն ու Դրաստամատ Թադևոսյանը մահացել են Էրեբունի հիվանդանոց տեղափոխվելու ճանապարհին:

Երեք ամբաստանյալներին մեղադրանք է առաջադրվել նախնական համաձայնությամբ, շատերի կյանքի համար վտանգավոր եղանակով կատարված սպանության ու ապօրինի հրազեն ձեռք բերելու, պահելու, կրելու համար՝ ՀՀ քրեական օրենսգրքի 104 հոդվածի 2-րդ մասի 1-ին, 6-րդ, 7-րդ կետերով և 235 հոդվածի 1-ին մասով:

Ամբաստանյալներն իրենց մեղավոր չեն ճանաչում:

Դատարանը շարունակեց գործով ապացույց ճանաչված տեսաձայնագրությունների հետազոտումը:

Այս նիստին Երրորդմասցի Լյովիկի սպանությանը չվերաբերող հայտարարությամբ հանդես եկավ նեղված Ծգըլը՝ ամբաստանյալ Սարգիս Գրիգորյանը:

Ամբաստանյալի վրդովմունքը վերաբերում էր Չարբախում՝ «Լիա» գեղեցկության սրահում վերջերս կատարված կրկնակի սպանության գործով Սարգիս Հախանումյանի՝ Տլեի եղբոր անվան հիշատակություններին՝ լրատվամիջոցներում:

Ծգըլը այդ հիշատակությունները «զրպարտանք» անվանեց ու հայտարարեց. «Տելեվիզորներով ինչ ասեն՝ դոգմա դարձնեն, իմանան՝ էդ մարդը հանցագործ ա… Բա որ էդ մարդկանց ընտանիքին ինֆարկտ խփեր… Հերիք չի՝ մի հատ էս տղեն ստեղ ա զրպարտանքով, մի հատ էլ՝ ախպերը… Ո՞վ էր պատասխան տալու՝ լրատվամիջոցնե՞րը, թե՞ դատախազը…»: Դատախազներին նկատի ունենալով, Սարգիս Գրիգորյանն ասաց. «Թող շառ անեն իրանց վրա ու տանեն մի 15 օր փակեն, տենամ՝ կդիմանա՞ն: Կամ էլ թող զգան՝ էդ ինչ ա…»:

Ծգըլը անդրադարձավ նաև այս գործով տուժողների հարազատներին՝ նկատի ունենալով, որ իրենք առաջադրված մեղադրանքները չեն ընդունում, իրենց մեղավոր չեն ճանաչում. «Էս մարդիկ պետք ա իմանան, թե ովքեր են իրենց իրական թշնամիները, մարդ ենք, հո գազան չե՞նք»:

Գործով ապացույց ճանաչված տեսանյութերից դիտվեցին Ավան-Առինջի «Նոր Զովք» սուպերմակետի տեսախցիկներով կատարված տեսանկարահանումները, որոնց վրա, ըստ նախաքննական մարմնի, երևում է՝ ինչպես են ջինսե անդրավարտիքներ, կապյուշոնով մարզահագուստներ հագած, կապյուշոններով դեմքերը քողարկած երեք երիտասարդ անցել սուպերմարկետի մոտով ու գնացել «Միլենա» տաքսի-ծառայության գրասենյակ:

Ըստ նախաքննական մարմնի՝ երեք ամբաստանյալները Նուբարաշենում հնչեցրած կրակոցներից հետո խուճուճ ճանապարհներով ու տաքսիներ փոխելով՝ ժամը 14-ի սահմաններում հասել են Ավան-Առինջի «Նոր Զովք» սուպերմարկետի մոտ, մտել են «Միլենա» տաքսի-ծառայություն, որտեղից «Խռիկ» մականունով Նարեկը նրանց մեքենայով տեղափոխել է նրանց ցանկացած վայրը:

Քննիչը տեսանյութերից մեկի զննության արձանագրությունում գրել էր, թե երևում է սուպերմարկետի տեսախցիկի դիմացով անցնող Սարգիս Գրիգորյանի դեմքը: Սակայն դատարանում այդ տեսանյութի հետազոտության ժամանակ ոչ մի դեմք նշմարել հնարավոր չեղավ:

Ամբաստանյալների շահերի պաշտպան Լուսինե Սահակյանը մի քանի անգամ հանդես եկավ հայտարարություններով: Մասնավորապես, նա, հետազոտվող տեսանյութերը նկատի ունենալով, ասաց. «Չեմ հասկանում՝ ի՞նչ ապացուցողական նշանակություն ունեն այս տեսանյութերը: Ավանի «Նոր Զովքը»՝ ո՜ւր, սպանության վայր Նուբարաշենը՝ ո՜ւր… Քննիչը գրել է՝ երևում է Սարգիս Գրիգորյանի դեմքը, բայց ես ոչինչ չեմ տեսնում… Բայց եթե անգամ երեքի դեմքն էլ շատ պարզ երևա, դրանով ոչինչ չի ապացուցվում՝ որտե՜ղ՝ Ավանը, որտե՜ղ՝ Նուբարաշենը…»:

Պատասխան հայտարարությամբ հանդես եկավ Երրորդմասցի Լյովիկի իրավահաջորդի ներկայացուցիչ, փաստաբան Երեմ Սարգսյանը. «Իմ գործընկերը ճիշտ նկատեց՝ քննիչը իրավունք չունի արձանագրել մի բան, որը չի երևում, եթե դեմքը չի երևում, չպետք է նշի, թե երևում է… Բայց՝ մի փաստ. ինչ է գրել քննիչը՝ նշանակություն չունի: Կարևոր է՝ ինչ ենք տեսնում: Տեսնում ենք, որ երեք անձ՝ հագուստի նույն նկարագրությամբ, նույն մարմնակազմությամբ անցնում են սուպերմարկետի մոտով, նրանցից մեկն առանձնանում ու անցնում է սուպերմարկետի դիմացով, մյուս երկուսը թեքվում են աջ ու սպասում են… Ով՝ ում է նմանեցնում՝ հետո կանդրադառնանք, կարևորը՝ երեք հոգի են: Մյուս ապացույցների համակցությամբ թե ինչ կհաստատվի՝ կերևա: Թե յուրաքանչյուր ապացույց ինչ է ապացուցում՝ ամեն մեկս մեր ճառերում կանդրադառնանք: Միայն քննիչի գրածը ապացույցն անթույլատրելի ճանաչելու համար հիմք չի տալիս…»:

Փաստաբան Լուսինե Սահակյանն ասաց. «Մենք պետք է անդրադառնանք ոչ միայն ապացույցների ոչ թույլատրելիությանը, այլև՝ ոչ վերաբերելիությանը… Եթե այս տեսանյութի, ասենք, մեկ ժամվա նկարահանված նյութը նայենք, երեք էլ, տասներեք էլ կապյուշոնով մարդ կտեսնենք, դա ոչինչ չի նշանակում: Ուրիշ բան, եթե ինչ-որ արտառոց իրավիճակ պատկերված լիներ, բայց արտառոց ոչինչ չկա… Անձանց մեղադրել էսպիսի՜ ապացույցով…»:

Դատախազ Արամյանը միջամտեց. «Եթե ապացույցը լավը չի, խի՞ եք անհանգստանում»:

Ամբաստանյալների շահերի պաշտպան Լուսինե Սահակյանը դատախազին ասաց. «Ակնկալում ենք, որ մեղադրանքից հրաժարվելու եք»:

Դատախազը պատասխանեց. «Էդ ակնկալիքը չի իրականանա»:

Հաջորդ դատական նիստին դատարանը կշարունակի գործով ապացույց ճանաչված տեսանյութերի հետազոտումը: Հնարավոր է՝ դատարան կհրավիրվի մասնագետ, քանի որ տեսանյութերի մի մասը դիտելու համար դատարանի համակարգիչը պետք է համապատասխան ծրագրային ապահովում ունենա: