Հայաստանը մասնակցում է ԱՊՀ երկրների ՀՕՊ միացյալ համակարգի մարտական պատրաստվածության ստուգմանը

Անկախ պետությունների համագործակցության (ԱՊՀ) 7 երկրներ ուրբաթ սկսված վարժանքի ժամանակ կստուգեն հակաօդային պաշտպանության միացյալ համակարգի մարտական պատրաստվածությունը։ Մասնավորապես՝ մշակվելու է ՀՕՊ ուժերի կիրառումը ԱՊՀ պետությունների պետական սահմանները խախտող օդանավերի դեմ, Ինչպես հայտնում է News.am-ը, լրագրողներին հայտնել են ՌԴ պաշտպանության նախարարությունից:։

Մոսկվայի ժամանակով 8։00-ին սկսված զորավարժություններին մասնակցում են Ռուսաստանը, Հայաստանը, Բելառուսը, Ղազախստանը, Ղրղզստանը, Տաջիկստանը և Ուզբեկստանը։ ՀՕՊ միացյալ համակարգը ղեկավարում են Մոսկվայում ՌԴ Օդատիեզերական ուժերի կառավարման կենտրոնից։

«Վարժանքի շրջանակում մշակվելու են օդային տարածքի օգտագործման կանոնները խախտող օդանավերի, ԱՊՀ անդամ պետությունների պետական սահմանները խախտող օդանավերի, առևանգված օդանավերի դեմ, ինչպես նաև աղետի ենթարկված օդանավերի անձնակազմերին օգնություն ցուցաբերելիս ՀՕՊ հերթապահ ուժերի կիրառման հարցերը»,- հստակեցրել են գերատեսչությունից։

Վարժանքներին ներգրավված են 7 երկրների տարածքում 130-ից ավելի հրամանատարական կետեր, 60-ից ավելի օդանավեր, զորավարժություններին մասնակցում են նաև Սու-27, ՄիԳ-29, ՄիԳ-31 և Յակ-130 կործանիչներ, Սու-24 և Սու-34 ճակատային ռմբակոծիչներ, Սու-25 գրոհիչներ, Տու-22, Տու-160 ծանր ռմբակոծիչներ։

«Օդանավերի անձնակազմերը վարժանքներին մասնակցող 7 երկրների օդային տարածքում կանցկացնեն փոխադարձ մանևրումներ»,- հավելել են գերատեսչությունից։