Չարբախում տեղի ունեցած սպանության պատճառը եղել է 2 հազար դոլարի «բազա՞րը»

Hraparak.am

Չարբախում գտնվող «Լիա» գեղեցկության սրահում նոյեմբերի 13-ին տեղի ունեցած սպանության դրդապատճառների վերաբերյալ կցկտուր տեղեկություններ են հաղորդվում պաշտոնական եւ ոչ պաշտոնական աղբյուրներից: Ըստ Չարբախում շրջանառվող տեղեկությունների, միջադեպի հիմքում փողային հարցերն են. «Խոսքը ոչ թե մեծ գումարի, այլ ընդամենը երկու հազար դոլարի բազար է»: Հիշեցնենք, որ հիշյալ գեղեցկության սրահի նկուղային հարկում հնչած կրակոցների հետեւանքով սպանվել է երկու անձ՝ 38-ամյա Մուշեղ Մուշեղյանն ու 25-ամյա Գեւորգ Ավետիսյանը, իսկ 35-ամյա Արամ Պետրոսյանը հրազենային վնասվածքով այժմ «Սուրբ Աստվածամայր» հիվանդանոցում է: Սպանության մեջ մեղադրվում է հիշյալ գեղեցկության սրահի սեփականատերը՝ «Թոփալ Գեղամ» մականունով հայտնի Պետրոս Իսրայելյանը: Նա շրջապատում հայտնի է որպես ամբողջ կյանքում չաշխատած, բայց ուրիշի հաշվին ապրած մեկը, որը, իբր, մասնակցում է կրիմինալ ինչ-ինչ հարցերի լուծման եւ դրա դիմաց ստանում իր վաստակը: «Բայց չունի այն թափը, որ լուրջ հարցեր լուծի»,-ասում են նրան ճանաչողները:

Անցած երկու օրերին Չարբախում լուրեր էին շրջանառվում, թե այստեղ խառն է ինչ-որ հայտնի հեղինակության «քիլլերի» մատը: Որպես սպանության պատվիրատու՝ մեկ նշվում էր գործով մեղադրյալ Ալիկ Բանդուրյանի անունը, մեկ էլ՝ «Ճվճվ Արո» մականունով հայտնի Արա Վարդանյանի, որի «քիլլերն» էլ, իբր, եղել է սպանված Մուշեղ Մուշեղյանը (ուշագրավ է, որ Ա. Վարդանյանի անունը որեւէ դրվագով չի հիշատակվում նախաքննության շրջանակներում): Ըստ երկրորդ վարկածի՝ Արա Վարդանյանը ժամանակին պարտքով գումար է տվել ոսկու առեւտրով զբաղվող վարդենիսցի ինչ-որ «շիշկեքի». խոսքը 20 հազար ԱՄՆ դոլարի մասին է: Պարտքը վերադարձնելիս պարտապանները 20-ի փոխարեն 18 հազար են տվել՝ պարտք մնալով 2 հազար դոլար, սակայն խոստացել են, որ դա էլ ժամանակի ընթացքում կմարեն: Մինչդեռ պարտատերը՝ Վարդանյանը, պնդել է, որ ոչ, «քյաշ 20 հազար տվել եմ, 20 հազար էլ պիտի ստանամ», եւ ստանալու համար էլ դիմել է Պետրոս Իսրայելյանին: Վերջինս համաձայնել է գործը գլուխ բերել, սակայն, երբ պարզել է, որ ընդամենը 2 հազար դոլարի պարտք-պահանջ է, տեղեկացրել է Վարդանյանին, որ չի կարող նրան օգնել, քանի որ գործ ունի մարդկանց «քցելու» երեւույթի հետ, ինչը դեմ է իր «պանյատներին»: Վարդանյանն էլ ի պատասխան ասել է, թե խոստանալու, բայց խոսքից ետ կանգնելու համար պատիժ է հասնում, եւ պնդել է, որ ոսկու գործ անողների փակվելիք պարտքը պիտի այժմ ինքը՝ «Թոփալը» փակվի: Այդ նպատակով էլ նա որպես միջնորդ դիմում է Մուշեղ Մուշեղյանին (որին էլ, հավանաբար, որպես քիլլեր ներկայացնում էին չարբախցիները), որպեսզի վերջինս «ստանա» ե՛ւ վարդենիսցի ոսկու գործ անողներից, եւ «Թոփալից»: Մուշեղ Մուշեղյանը, ըստ շրջանառվող լուրերի, ժամանակին աշխատել է գործով ձերբակալված «Նորատուսցի» Ալիկ Բանդուրյանի եւ նրա եղբոր մոտ: Սակայն հետագայում Բանդուրյանները նրան հեռացրել են իրենց շրջապատից՝ թմրամոլությամբ զբաղվելու համար: Ա. Բանդուրյանը, որը, ըստ նախաքննության, մեղադրվում է սպանությանը դրդելու մեջ, կապեր ունի իշխանության վերին օղակների հետ, նշում են Սաշիկ Սարգսյանի, Հովիկ Աբրահամյանի եւ այլոց որդիների անունները: Եվ, ահա, նոյեմբերի 13-ին էլ Մուշեղյանը մի քանի հոգու հետ գալիս է հանդիպելու Պ. Իսրայելյանի հետ եւ կատարելու Ճվճվի առաջադրանքը: Հանդիպումը տեղի է ունենում հանցագործության վայր հանդիսացող «Լիա» գեղեցկության սրահի նկուղային հարկում: Կողմերը չեն հասկանում միմյանց, վիճում են, քաշքշուկ է լինում, ապաեւ հնչում են կրակոցներ: Ըստ վարկածի՝ առաջինը կրակում է Մուշեղյանն ու վիրավորում Իսրայելյանի կողմնակիցներից մեկին՝ Գեւորգ Ավետիսյանին, որին այնուհետ մահամերձ վիճակում հիվանդանոց է տեղափոխում Իսրայելյանի որդին՝ Գոռը: Գեւորգը սոցիալապես անապահով ընտանիքից է, նրա եղբայրները որպես բանվոր աշխատում են շինանյութի խանութում: Դատելով այն հանգամանքից, որ Իսրայելյանը եւս մեղադրվում է սպանության մեջ, կարելի է ենթադրել, որ նրա կողմից արձակված կրակոցից էլ մահացել է Մուշեղյանը:

Իսկ թե իրականում ինչ կապ ունեն այս պատմության հետ քրեական աշխարհում հայտնի Բանդուրյան եղբայրները, հանգամանալից ինֆորմացիա ձեռք բերել մեզ առայժմ չհաջողվեց: Ըստ ոչ պաշտոնական վարկածի՝ Բանդուրյանը կապ ունի այս պատմության հետ այնքանով, որ ժամանակին ինչ-ինչ հարաբերություններ է ունեցել Մուշեղյանի հետ, թեեւ, ըստ պաշտոնական աղբյուրի, նա է եղել Մուշեղյանին սպանելու դրդիչը: Նշենք, որ մեղադրանք է առաջադրվել 5 անձի՝ Ալիկ Բանդուրյանին ( սպանությանը դրդելու), Պետրոս Իսրայելյանին (սպանություն կատարելու), Ռուբեն Խաչատրյանին (սպանության օժանդակության), Արմեն Գասպարյանին (նախապատրաստվող ծանր հանցագործության մասին իմանալ-չհայտնելու), Արտակ Նազարյանին (առանձնապես ծանր հանցագործությունը պարտակելու) համար: Բոլոր 5 ձերբակալվածները երեկ կալանավորվել են:

Հեղինե ՄԱՆՈՒԿՅԱՆ