Օգոստոսի 4-ից հետո Բեյրութից Հայաստան է վերադարձել ավելի քան 1100 հայ. ինչպես է նրանց ընդունում հայրենիքը

Օգոստոսի 4-ին Բեյրութում տեղի ունեցած հուժկու պայթյունից հետ Հայաստան է վերադարձել ավելի քան 1100 հայ, որոնց10-15 տոկոսը երեխաներ են: Այս մասին NEWS.am-ին հայտնեց Սփյուռքի հարցերով գլխավոր հանձնակատարի գրասենյակի ռազմավարությունների մշակման բաժնի պետ Հովհաննես Ալեքսանյանը` հավելեով, որ հուլիսի 14-ից մինչեւ օգոստոսի 4-ը եւս 4 չվերթեր են տեղի ունեցել եւ այդ չվերթերով էլ մինչ պայթյունը ժամանել էին 280 հայեր:

«Հայաստանից մեկնած պատվիրակությունը Բեյրութում իրավիճակի նկարագրություն է իրականացրել եւ դրանից անմիջապես հետո Կառավարության հանձնարարականով մշակվել է լիբանանահայերի ինտեգրման ծրագիր, որի նպատակն է աջակցել մեր հայրենակիցներին իրենց խնդիրները լուծելու համար: Այս ծրագրի մեջ ներառված են առողջապահականա խնդիրների լուծում, սոցիալ-տնտեսական կարիքների լուծում` ինչպես օրինակ բնակվարձերի, ներառված է տեղական հարկերից, տուրքերից ազատելու հնարավորությունները, եթե սկսում են բիզնես գործունեություն, ներառված է կրթական կոմպոնենտ, այսինքն` տարբեր ֆոնդերից հայթայթել միջոցներ լիբանանահայ ուսանողների հետ կապված եւ մի շարք այլ հնարավորությունները»,-ասաց նա:

Հովհաննես Ալեքսանյանի խոսքով` աշխատանքի տեղավորման հարցում աջակցում են ոչ միայն պետական մարմինները, այլ նաեւ մասնավոր ընկերությունները:

«Համավարակով պայմանավորված Հայաստանի աշխատաշուկան նույնպես տուժել է եւ դեռ չի վերականգնվել, բայց հնարավորինս փորձում ենք աշխատանքի տեղավորել»,- հավելեց նա:

Գլխավոր հանձնակատարի գրասենյակի ռազմավարությունների մշակման բաժնի պետի խոսքով` վերադարձողների մեծ մասն արդեն տեղավորվել է, կամ բնակարաններ ունեն, կամ վարձակալել են:

«Սփյուռքի գործերի գլխավոր հանձնակատարի գրասենյակը ինտեգրման ծրագիր է Մշակել, որը դեռ պետք է հաստատվի Կառավարության կողմից: Մինչ այդ մեր կողմից տարբեր բարեգհործական հիմնադրամների միջոցով ապահովվել է նրանց վարձակալության խնդիրը: Հիմնական մասը լիբանանահայերի Երեւանում է կենտրոնացած, նաեւ Երեւանին մոտ մարզերում, նաեւ գյուղաբնակ վայրերում: Մեկ տասնյակ ընտանիք էլ բնակություն է հաստատել Արցախում»,-ասաց նա:

Հիշեցնենք, որ օգոստոսի 4-ին Բեյրութի նավահանգստում պահեստում հզոր պայթյուն էր որոտացել: Պայթյունի ալիքն ավերել եւ վնասել է տասնյակ տներ, ավելի քան 300 հազար մարդ մնացել է անօթեւան: Առնվազն 154 մարդ մահացել է, վիրավորվել է մոտ 5 հազար մարդ: Շատ մեծ վնասներ էին կրել նաեւ Բեյրութի հայկական թաղամասերը:

Լիբանանի ՆԳՆ-ի փոխանցմամբ` ողբերգության պատճառը 2.7 հազար տոննա ամոնիումի նիտրատի բռնկումն էր եռակցման աշխատանքների ընթացքում, որը վեց տարի առաջ առգրավվել էր մաքսային ծառայությունների կողմից: