Կարեն Կարապետյանին ստիպո՞ւմ են

1in.am

Ուզել-չուզելը քաղաքական կատեգորիա չէ՝ ասում է ՀՀԿ խոսնակ Էդուարդ Շարմազանովը՝ պատասխանելով պաշտպանության նախարարի՝ ՀՀԿ անդամ դառնալու դիմումը դեռևս գրված չլինելու վերաբերյալ հարցին։

Նոյեմբերի 26-ին տեղի է ունենալու ՀՀԿ համագումարը, և սպասվում է, որ այդ համագումարում տեղի է ունենալու ղեկավար կազմի փոփոխություն, ՀՀԿ անդամ են դառնալու վարչապետն ու նոր նախարարները։ Առայժմ նոր նախարարներից միայն Վիգեն Սարգսյանը՝ պաշտպանության նախարարն է հայտարարել, որ մտադիր է դիմում գրել ՀՀԿ անդամ դառնալու համար։ Դեռևս այլ դիմումներ կամ դրանց մտադրության մասին հայտարարություններ չկան։

Ընդ որում, ՀՀԿ խոսնակի հայտարարությունը բերում է շատ ուշագրավ մի պատկեր։ Նա փաստորեն ասում է, որ նոր կառավարության կամ կառավարության նոր անդամների ուզել-չուզելուն ոչ ոք չի նայում, և նրանք ստիպված են դառնալ ՀՀԿ անդամ։

Այն, որ Կարեն Կարապետյանը և նախարարները, ի տարբերություն Վիգեն Սարգսյանի, առայժմ բարձրաձայն չեն խոսում ՀՀԿ անդամ դառնալու մտադրության մասին, վկայում է, որ նրանք առնվազն այդքան էլ հոժար չեն այդ հեռանկարից։ Եվ եթե անգամ վերջին պահին նրանք դիմում գրեն և անդամակցեն ՀՀԿ-ին, դա դեռ չի նշանակի, որ այդ բանն անում են իրենց նախաձեռնությամբ և կամքով։ ՀՀԿ խոսնակի հայտարարությունը հենց դրա վկայությունն է և ցույց է տալիս, որ պարզապես դրվել է կառավարության նոր կազմի՝ ՀՀԿ-ին անդամակցելու խնդիր։

Եվ այն, որ այդ խնդրին փաստորեն տարբեր կերպ են վերաբերվում Կարեն Կարապետյանի թիմն ու Վիգեն Սարգսյանը, խոսում է այն մասին, որ կա նաև որոշակի հակադրություն Կարեն Կարապետյանի և Սերժ Սարգսյանի միջև, որի փաստացի ենթական է պաշտպանության նախարարը։

Այսպիսով, ՀՀԿ-ին անդամակցությունն այս տեսանկյունից, ամենայն հավանականությամբ, կարող է դառնալ Կարեն Կարապետյանի քաղաքական պարտությունը։ Իհարկե, կարող ենք դիտարկել նաև այն տարբերակը, երբ նա մտնում է ՀՀԿ՝ այսպես ասած, գործող մեծամասնությանը երկրորդ պլան մղելու կամ Սերժ Սարգսյանի հայտարարած «նոր ոգին» հաղորդելու համար։

ՀՀԿ-ին անդամակցելու դեպքում Կարապետյանը այլ տարբերակ չունի էլ, առնվազն ինքնապահպանման բնազդի թելադրանքով, եթե նույնիսկ նրա մեջ ուժեղ չլինեն քաղաքական հավակնություններն ու դրանցից բխող մոտիվացիոն խթանիչները։ Առնվազն ինքնապահպանության համար Կարեն Կարապետյանը պետք է ձգտի հաղթել ՀՀԿ ներկայիս մեծամասնությանը։ Բայց այստեղ, իհարկե, խնդիրն այն չէ, որ այդ գործընթացը ենթադրելու է բավականին թեժ դիմակայություն թե՛ այդ մեծամասնության, թե՛ Սերժ Սարգսյանի հետ։

Խնդիրն այն է, որ դա դեռևս ապագայի հարց է, իսկ առայժմ, քանի դեռ Կարեն Կարապետյանը լուռ է գնում ՀՀԿ անդամակցման, դա տեղի ունենալու դեպքում լինելու է նրա քաղաքական պարտությունը գոնե այս պահին։ Որովհետև եթե անդամակցումը տեղի է ունենում այդպիսի լռության պայմաններում, և Կարեն Կարապետյանը չի նախանշում ՀՀԿ-ում իրավիճակ փոխելու նպատակներ, դա նշանակում է, որ իրավիճակը փոխում է ՀՀԿ-ն և Կարապետյանին ստիպում ընդունել իր «կրոնը»՝ չնայելով նրա «ուզել-չուզելուն»։